କଳିଙ୍ଗନଗର : କଳିଙ୍ଗନଗର ଶିଳ୍ପାଞ୍ଚଳର ଏକମାତ୍ର ରାଷ୍ଟ୍ରାୟତ୍ତ ଉଦ୍ଯୋଗ ବୋଲାଉଥିବା ନୀଳାଚଳ ଇସ୍ପାତ ନିଗମରୁ କେନ୍ଦ୍ର ସରକାର ପୁଞ୍ଜି ପ୍ରତ୍ୟାହାର ନିଷ୍ପତ୍ତି ପରେ ଏହାକୁ ବିରୋଧ କରି ଲାଗିରହିଥିବା ଧାରଣା ଆଜି ୧୪ ଦିନରେ ପହଞ୍ଚିଛି । କେନ୍ଦ୍ର ସରକାର ଓ ରାଜ୍ୟ ସରକାରଙ୍କ ଶ୍ରମିକ ମାରଣ ନୀତି ବିରୁଦ୍ଧ ଓ ଏକ ରାଷ୍ଟ୍ରାୟତ୍ତ ଉଦ୍ଯୋଗକୁ ଘରୋଇକରଣ ଚକ୍ରାନ୍ତ ବିରୋଧରେ କାରଖାନା କର୍ମଚାରୀଙ୍କୁ ନେଇ ସୃଷ୍ଟି ହୋଇଥିବା ମିଳିତ ମଞ୍ଚ ଦ୍ବାରା କାରଖାନା ଫାଟକ ସମ୍ମୁଖରେ ଆଜକୁ ଚଉଦ ଦିନ ହେବ ପ୍ରତିବାଦ ଓ ଧାରଣା ଦିଆଯାଇଛି । ଏହି ସଭାରେ ରାଜ୍ୟର ବିଭିନ୍ନ ଶ୍ରମିକ ସଙ୍ଗଠନ ତଥା ରାଜ୍ୟ ତଥା କେନ୍ଦ୍ରର ବହୁ ନେତା ଆସି ସମ୍ବୋଧିତ କରି ଫେରିଛନ୍ତି ।ହେଲେ କାରଖାନାରେ କାମ କରୁଥିବା ପ୍ରତ୍ୟକ୍ଷ ଓ ପରୋକ୍ଷ ପ୍ରାୟ ୧୦ହଜାର କର୍ମଚାରୀଙ୍କ ଭବିଷ୍ୟତ ଅନ୍ଧକାର ଆଡକୁ ଅଗ୍ରସର ହେଉଛି । ବିଗତ ଦିନ ମାନଙ୍କରେ ଗଣ୍ଡା ଗଣ୍ଡା ନେତା ଭାଷଣ ଦେଇ ଚାଲିଯାଇଥିବା ବେଳେ ଫଳ କିନ୍ତୁ ଶୂନ୍ । ଏପରି ସ୍ଥଳେ ମୂଲ୍ୟ ଆକଳନ ନିମନ୍ତେ ବିଭିନ୍ନ ସଂସ୍ଥା ଆହ୍ବାନ ଦିଆଯାଇଥିଲା । ଯାହାର ଶେଷ ସୀମା ୨୦୨୦ମସିହା ଜାନୁୟାରୀ ମାସ ୨୪ତାରିଖ ଧାର୍ଯ୍ୟ ହୋଇଥିଲା । କିନ୍ତୁ ମିଳିଥିବା ସୂଚନା ଅନୁଯାୟୀ ଧାର୍ଯ୍ୟ ତାରିଖ ମଧ୍ୟରେ କୌଣସି ସଂସ୍ଥା ଉକ୍ତ ପ୍ରକ୍ରିୟାରେ ଭାଗ ନେଇନଥିବାରୁ ,ସମୟ ସୀମାକୁ ଫେବୃଆରୀ ମାସ ୬ ତାରିଖ ପର୍ଯ୍ୟନ୍ତ ଘୁଞ୍ଚାଇ ଦିଆଯାଇଛି । କାରଖାନାର କର୍ମଚାରୀ ମାନଙ୍କର ୨୪ ତାରିଖ ଦିନ ଭାଗ୍ଯ ନିର୍ଦ୍ଧାରଣ ଦିନ ଥିବାରୁ ଘରୋଇକରଣକୁ ବିରୋଧ କରି ଧାରଣାରତ ଶ୍ରମିକ ମାନେ ଏହି ଦିନଟିକୁ କଳା ଦିବସ ଭାବେ ପାଳନ କରି କଳା ପତାକା ଉଡାଇବା ସହ କଳା ବ୍ଯାଚ୍ ପରିଧାନ କରିଥିଲେ । ଧାରଣାରତ କର୍ମଚାରୀ ରାଜ୍ୟ ସରକାର ଓ କେନ୍ଦ୍ର ସରକାରଙ୍କ ବିରୋଧରେ ନାରାବାଜି କରି ଯଥାଶୀଘ୍ର ସରକାର ହସ୍ତକ୍ଷେପ ପାଇଁ ଦାବି କରିଥିଲେ । ଯଦି ସରକାର ଏଥିପ୍ରତି ଦୃଷ୍ଟି ନ ଦିଅନ୍ତି ତେବେ ଆଗାମୀ ଦିନରେ ସପରିବାରେ ରାଜରାସ୍ତାକୁ ଓଲ୍ହାଇ ଅର୍ଥନୈତିକ ଅବରୋଧ କରାଯିବ ବୋଲି ଚର୍ଚ୍ଚା ଜୋର ଧରିଛି ।
