କଳିଙ୍ଗନଗର: କଳିଙ୍ଗନଗର ଶିଳ୍ପାଞ୍ଚଳର ରାଷ୍ଟ୍ରାୟତ୍ତ ଉଦ୍ୟୋଗ ବୋଲାଉଥିବା ନୀଳାଚଳ ଇସ୍ପାତ ନିଗମରେ ଆଜି ପୁଣି ଶ୍ରମିକ ଅଶାନ୍ତି ଦେଖାଦେଇଛି । ଗତକାଲି କାରଖାନାର କର୍ମଚାରୀମାନେ ଅଧିକାରୀ ମାନଙ୍କୁ ଘେରିଥିବା ବେଳେ ଆଜି କାରଖାନାର ସହସ୍ରାଧିକ ଠିକା କର୍ମଚାରୀ ସଖାଳୁ ଫାଟକ ସମ୍ମୁଖରେ ଧାରଣାରେ ବସିଛନ୍ତି । ବହୁ ବର୍ଷ ଧରି ନିମ୍ନତମ ମଜୁରୀରେ ଖଟୁଥିବା ଶ୍ରମିକଙ୍କ ମଧ୍ୟରେ ନିଜ ମାସିକ ଦରମାକୁ ନେଇ ପ୍ରତିବାଦର ସ୍ବର ଉଠିଛି । ଆଜି ସଖାଳୁ ସହସ୍ରାଧିକ ଠିକା କର୍ମଚାରୀ ଯୋଜନାବଦ୍ଧ ହୋଇ କାରଖାନାର ମୂଖ୍ୟ ଫାଟକ ସହ ମେଟେରିଆଲ୍ ଓ ରେଲ୍ବେ ଫାଟକ ବନ୍ଦ କରି ରଖିଛନ୍ତି । ଫଳରେ ସକାଳ ସିଫ୍ଟ୍ ରେ କାରଖାନାକୁ ଯାଉଥିବା କର୍ମଚାରୀ କାରଖାନା ଭିତରକୁ ଯାଇପାରି ନାହାନ୍ତି । ଧାରଣରେ ବସିଥିବା ଶ୍ରମିକଙ୍କ ମଧ୍ୟ ଅନୁରୂପ ଦାବି । ଫରନେସ୍ କୁ ଯଥାଶୀଘ୍ର କାର୍ଯ୍ୟକ୍ଷମ କରିବା, ନିର୍ଦ୍ଧାରିତ ସମୟରେ ଦରମା ଦେବା,ଶ୍ରମିକଙ୍କୁ ବୋନସ୍ ପ୍ରଦାନ ଇତ୍ୟାଦି । କାରଖାନାର ଉତ୍ପାଦନ କ୍ଷେତ୍ରରେ ହେଉ କିମ୍ୱା ରକ୍ଷଣାବେକ୍ଷଣ କ୍ଷେତ୍ର ସମସ୍ତ ଦିଗରେ ଏହି ଠିକା କର୍ମଚାରୀ ମାନଙ୍କ ଭୂମିକା ସର୍ବଦା ଆଗରେ ଥାଏ । ସବୁ କ୍ଷେତ୍ରରେ ଆଗୁଆ ଥିବା ଶ୍ରମିକମାନେ ବହୁ ସମୟରେ କର୍ତ୍ତୃପକ୍ଷଙ୍କ ଠାରୁ ଆରମ୍ଭ କରି ଠିକାଦାର ମାନଙ୍କଦ୍ବାରା ଶୋଷଣର ଶିକାର ହେଉଛନ୍ତି । ଏହି କ୍ରମରେ ଦୀର୍ଘ ଦିନ ଧରି ଲାଗିରହିଥିବା ଶ୍ରମିକ ଅଶାନ୍ତି ଆଜି ଶେଷରେ ଉଗ୍ରରୂପ ନେଇଛି । ଆନ୍ଦୋଳନକାରୀଙ୍କ ଦାବି ପୂରଣ ନହେବା ପର୍ଯ୍ୟନ୍ତ ଧାରଣାରେ ବସି ରହିବେ ବୋଲି ନେତୃତ୍ବ ନେଉଥିବା ବହୁ ଶ୍ରମିକ କହିଛନ୍ତି ।
