ଭୁବନେଶ୍ୱର : ବିକାଶର କର୍ଣ୍ଣଧାର ଗଣମାଧ୍ୟମ ଓ ସେମାନଙ୍କ ଭୂମିକାକୁ ପ୍ରଣାମ କରୁଛି । ସାମ୍ବାଦିକଙ୍କ ପେନସନ, ପ୍ରୋଟେକ୍ସନ ଓ ଏକ୍ରିଡ଼େସନ ଦାବୀ ହେଉଛି ଯଥାର୍ଥ ଦାବୀ । ନିର୍ବାଚନ ପୂର୍ବରୁ ଏସବୁ ଦାବୀ ପୂରଣ ନେଇ ଦେଇଥିବା କଥାକୁ ରଖିବା ପାଇଁ ରାଜ୍ୟ ସରକାରଙ୍କ ସହ ମଧ୍ୟସ୍ଥତା କରିବି ବୋଲି ଘୋଷଣା କରିଛନ୍ତି କେନ୍ଦ୍ରଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଜୟଦେବ ଭବନଠାରେ ଆୟୋଜିତ ଓଡ଼ିଶା ୟୁନିୟନ ଅଫ ଜର୍ଣ୍ଣାଲିଷ୍ଟିସ୍ (ଓୟୁଜେ)ର ୫୩ତମ ପ୍ରତିଷ୍ଠା ଦିବସ ପାଳନ ଉତ୍ସବରେ ମୁଖ୍ୟ ଅତିଥି ଭାବରେ ଯୋଗଦେଇ ଶ୍ରୀ ପ୍ରଧାନ ଏପରି ଘୋଷଣା କରିବା ସହ ଓଡ଼ିଶାରେ ସାମ୍ବାଦିକ ସୁରକ୍ଷା ଅଧିନିୟମ ଆଣିବାକୁ ପରାମର୍ଶ ଦେଇଛନ୍ତି । ସାମ୍ବାଦିକଙ୍କ ଦାୟିତ୍ୱ ନେଇ ସଂଘ ନୀତି ନିର୍ଦ୍ଧାରଣ କରୁ ବୋଲି ସେ ବିନମ୍ରତାର ସହ ଆହ୍ୱାନ କରିଛନ୍ତି । ସତ କହିବା ଓ ଲେଖିବାର ସାମର୍ଥ୍ୟ ସାମ୍ବାଦିକମାନଙ୍କୁ ମିଳୁ ବୋଲି କାମନା କରିଛନ୍ତି ।
ଏହି ଉତ୍ସବରେ ସମ୍ମାନିତ ଅତିଥି ଭାବରେ ରାଜ୍ୟ ପୂର୍ତ୍ତ, ଆଇନ ଓ ଅବକାରୀ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ଯୋଗଦେଇ ସାମ୍ବାଦିକ ଦାବୀ ନେଇ ବିହିତ ପଦକ୍ଷେପ ନିଆଯିବ ବୋଲି ଘୋଷଣା କରିଛନ୍ତି । ଶାସନ ବ୍ୟବସ୍ଥାରେ ପରିବର୍ତ୍ତନ ଆଣିବା ପାଇଁ ସମାଲୋଚନା ଗ୍ରହଣୀୟ ବୋଲି ସେ ମତବ୍ୟକ୍ତ କରିଛନ୍ତି । ଓୟୁଜେ ସଭାପତି ପ୍ରସନ୍ନ ମହାନ୍ତିଙ୍କ ସଭାପତିତ୍ୱରେ ଅନୁଷ୍ଠିତ ଏହି ଉତ୍ସବରେ ଅନ୍ୟମାନଙ୍କ ମଧ୍ୟରେ ଭୁବନେଶ୍ୱର ଏକାମ୍ର ବିଧାୟକ ବାବୁ ସିଂ ଓ ଜଗତସିଂହପୁର ବିଧାୟକ ଅମରେନ୍ଦ୍ର ଦାସ ଯୋଗ ଦେଇଥିଲେ । ଓୟୁଜେ ଟ୍ରିବ୍ୟୁନାଲ ଅଧ୍ୟକ୍ଷ ଅଶୋକ ନନ୍ଦ ସ୍ୱାଗତ ଭାଷଣ ଦେଇଥିବା ବେଳେ ଅକ୍ଷୟ ସାହୁ ଅତିଥି ପରିଚୟ ପ୍ରଦାନ କରିଥିଲେ । ସାଧାରଣ ସମ୍ପାଦକ କମ୍ବୁପାଣି ମିଶ୍ର ସମ୍ପାଦକୀୟ ବିବରଣୀ ପାଠ କରିଥିଲେ । ଉପସଭାପତି ରାଜେଶ ପଟ୍ଟନାୟକ ଧନ୍ୟବାଦ ଅର୍ପଣ କରିଥିଲେ । ଏହି ଅବସରରେ ବିନ୍ଦୁ ମହାନନ୍ଦ, ଶତରୂପା ସାମନ୍ତରାୟ, ଅର୍ଚ୍ଚନା ଶତପଥୀ, ଦୁଷ୍ମନ୍ତ ବେହେରା ପ୍ରମୁଖ ବିଶିଷ୍ଟ ସାମ୍ବାଦିକମାନଙ୍କୁ ଓୟୁଜେ ମିଡ଼ିଆ ଆୱାର୍ଡ଼ରେ ସମ୍ବର୍ଦ୍ଧିତ କରାଯାଇଥିଲା । ସେହିପରି ନାରାୟଣ ବାରିକ, ରାମ ନାରାୟଣ ଶତପଥୀ, ହରିହର ପାତ୍ର, ସୁବାସ ସାହୁ, ନିରଞ୍ଜନ ପଣ୍ଡା, ବସନ୍ତ ହାତୀ ଆଦିଙ୍କୁ ବରିଷ୍ଠ ସାମ୍ବାଦିକ ସମ୍ମାନରେ ସମ୍ମାନିତ କରାଯାଇଥିଲା । ପରିକ୍ଷୀତ ବିଶ୍ୱାଳ, କିସାନ ରାଉତ, ଅଭୟ ପତି, ଆଦିତ୍ୟ ମେକାପ, ବାଳକୃଷ୍ଣ ପଟ୍ଟନାୟକ, ମନୋଜ ପଟ୍ଟନାୟକ, ପ୍ରଶାନ୍ତ ବେହେରା, ସୁଧାଂଶୁ ଶେଖର ପରିଡ଼ା, ଦୀପକ ସମଝଦାର, ପ୍ରସନ୍ନ ପାଇକରାୟ, ଅମୂଲ୍ୟ ରଞ୍ଜନ ସ୍ୱାଇଁ, ସନ୍ତୋଷ ସିଂଦେଓ, ପ୍ରମୋଦ ସାମନ୍ତରାୟ, ଚିନ୍ମୟ ମହାପାତ୍ର, ରାଜୀବ ମହାନ୍ତି, ସୁରେଶ ଦାସ ଓ ସୁଧାଂଶୁ ପାତ୍ର ଉତ୍ସବ ଆୟୋଜନରେ ସହଯୋଗ କରିଥିଲେ । ଏହି ଅବସରରେ ୩୦ଜିଲ୍ଲାର ନବନିର୍ବାଚିତ ସଭାପତି ଓ ସାଧାରଣ ସମ୍ପାଦକଙ୍କୁ ସ୍ୱାଗତ ସମ୍ବର୍ଦ୍ଧନା ଦିଆଯାଇଥିଲା ।
ଏଥି ପୂର୍ବରୁ ଓୟୁଜେର ଏକ ରାଜ୍ୟ କାର୍ଯ୍ୟକାରିଣୀ ବୈଠକ ଅନୁଷ୍ଠିତ ହୋଇଥିଲା । ଯେଉଁଥିରେ ଏକ ସଂଘ, ଏକ ନିର୍ବାଚନ ନେଇ ବ୍ୟାପକ ଆଲୋଚନା ହୋଇଥିଲା । ଏଥିରେ ରାଜ୍ୟର ୩୧ଟି ସାଂଗଠନିକ ଜିଲ୍ଲାର ପ୍ରତିନିଧିମାନେ ଅଂଶଗ୍ରହଣ କରି ନିଜ ନିଜର ମତ ରଖିଥିଲେ ।
