ଯାଜପୁର : ଦିନ କେଇଟା ପରେ ଅଗ୍ର ପୂଜ୍ଯ ଗଣେଷଙ୍କ ପୂଜା । ହେଲେ ଏ ବର୍ଷ ମହାମାରୀ କରୋନା ସମସ୍ତଙ୍କ ଜୀବନ ଜୀବିକାକୁ ଉଜାଡି ଦେଇଥିବା ବେଳେ ସେଥିରୁ ମୂର୍ତ୍ତୀ କାରିଗର ମଧ୍ୟ ବାଦ୍ ପଡିନାହାଁନ୍ତି । ଭାଲୁକୁଣୀ ପୂଜା ଠାରୁ ଆରମ୍ଭ ହୋଇ ଗଜଲକ୍ଷ୍ମୀ ପୂଜା ପର୍ଯ୍ୟନ୍ତ ଫୁରସତ୍ ମିଳୁ ନଥିବା ମୂର୍ତ୍ତୀ କାରିଗର ଏବେ ହାତ ବାନ୍ଧି ବସିଛନ୍ତି । ପାର୍ବଣର ଋତୁ ଆରମ୍ଭ ହେବାକ୍ଷଣି ଚଳଚଞ୍ଚଳ ହୋଇ ଉଠୁଥିବା କାରିଗର ବର୍ତ୍ତମାନ ମୁଣ୍ଡରେ ହାତ ଦେଇ ବସିଛି ।ସରକାର କରୋନାକୁ ପ୍ରତିହତ କରିବା ପାଇଁ ସର୍ବସାଧାରଣ ସ୍ଥାନ , ଶିକ୍ଷା ଅନୁଷ୍ଠାନ କିମ୍ବା କୌଣସି କ୍ଲବ୍ ରେ ଗଣେଷ ପୂଜାକୁ ନିଷିଦ୍ଧ କରିଛନ୍ତି । ତେଣୁ ବିଭିନ୍ନ ଶିକ୍ଷା ଅନୁଷ୍ଠାନ କିମ୍ବା କ୍ଲବ୍ ମାନଙ୍କ ଦ୍ବାରା ଆଦୃତ ବଡ଼ ମୂର୍ତ୍ତୀ ବରାଦ ବନ୍ଦ। ଯାହା ଫଳରେ ବହୁ କାରିଗରଙ୍କ ପାଖରେ କାମ ନାହିଁ। ଯାହାଦ୍ବାରା କାରିଗରଙ୍କ ସହ କାମରେ ସହାୟତା କରୁଥିବା ସହାୟକ, ରଙ୍ଗ ଦୋକାନୀ, ମାଟି ଓ ବାଉଁଶ ନଡା ଯୋଗାଉଥିବା ବ୍ଯକ୍ତି ମଧ୍ୟ ପରୋକ୍ଷରେ ପ୍ରଭାବିତ ହୋଇଛନ୍ତି । କିଛି କାରିଗରଙ୍କ କହିବା ଅନୁଯାୟୀ ଗତବର୍ଷ ଗଣେଷ ପୂଜା ସମୟରେ ପ୍ରାୟ ତିନି ରୁ ଚାରି ଲକ୍ଷ ଟଙ୍କାର କାରବାର ହୋଇଥିଲା , କିନ୍ତୁ ଏ ବର୍ଷ କୋଡିଏ ହଜାର ହେବା ସ୍ବପ୍ନ । ଏଭଳି ସ୍ଥଳେ ଆଗାମୀ ଦିନରେ କ’ଣ କିପରି ହେବ ସେ ନେଇ ଚିନ୍ତା ବ୍ଯକ୍ତ କରିଛନ୍ତି । ଅଜୟ ସାହୁ (ବିଗ୍ ନିଉଜ୍ ଓଡିଶା )
