ଶିକ୍ଷା, ଏପରି ଏକ ଶବ୍ଦ ଯାହାକୁ ନେଇ ଏ ସମାଜ ଗର୍ବିତ। କିଏ ଶିକ୍ଷା ଅର୍ଜନ କରି ସମାଜରେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛି ତ ଆଉ କିଏ ଶିକ୍ଷା ଦାନ କରି ସମାଜରେ ଏକ ଅନନ୍ୟ ଉଦାହରଣ ପାଲଟିଛି । ଏହପରି ଏକ ବ୍ଯକ୍ତିତ୍ବ ହେଉଛନ୍ତି ଯାଜପୁର ଜିଲ୍ଲା ସୁକିନ୍ଦା ବ୍ଲକ୍ ଅନ୍ତର୍ଗତ କନ୍ତିରା ଗ୍ରାମର ନନ୍ଦ କିଶୋର ପୃଷ୍ଟି । ଯାହାଙ୍କୁ ସମଗ୍ର ଅଞ୍ଚଳରେ ନନ୍ଦ ସାର୍ ରୂପେ ଜାଣନ୍ତି। ସେ ହେଉଛନ୍ତି ଜଣେ ନିଆରା ବ୍ଯକ୍ତିତ୍ବ। ଦୀର୍ଘ ଆଠ ଦଶନ୍ଧିରୁ ଉର୍ଦ୍ଧ୍ବ ଦିନ ହେବ ଶିକ୍ଷା କ୍ଷେତ୍ରରେ ରହିଛି ତାଙ୍କର ଅତୁଳନୀୟ ଅବଦାନ। ଗାଁ ପିଲାଙ୍କୁ ଶିକ୍ଷିତ କରିବା ଲକ୍ଷରେ ଆଜକୁ ୮୨ବର୍ଷ ପୂର୍ବେ ନିଜ ଗାଁରେ ସ୍ଥାପନ କରିଥିଲେ ଏକ ଛୋଟିଆ ଚାଟଶାଳୀ । ସେହି ଚାଟଶାଳୀରେ ବିନା କୌଣସି ପାରିଶ୍ରମିକରେ ନିରବଚ୍ଛିନ୍ନ ଭାବରେ ମାଗଣାରେ ପଢାଉଛନ୍ତି ପିଲାଙ୍କୁ। ସବଠାରୁ ଗୁରୁତ୍ୱପୂର୍ଣ୍ଣ ବିଷୟ ହେଉଛି ୧୦୪ବର୍ଷ ବୟସରେ ମଧ୍ୟ ସେ ଛାଡି ନାହାନ୍ତି ନିଜ ନିଶାକୁ।ଏହି ଖବର ଗଣମାଧ୍ୟମରେ ପ୍ରସାରିତ ହେବା ପରେ, ଏପରି ଏକ ନିଆରା ବ୍ଯକ୍ତିତ୍ବଙ୍କୁ ନିକଟରେ ଭାରତ ସରକାରଙ୍କ ପକ୍ଷରୁ ପଦ୍ମଶ୍ରୀ ସମ୍ମାନରେ ସମ୍ମାନିତ କରିବା ପାଇଁ ଘୋଷଣା କରାଯାଇଥିଲା । ତେବେ ଏହି ସମ୍ମାନ,ନନ୍ଦସାର୍ ଆସନ୍ତା ନଭେମ୍ବର ମାସ ୯ତାରିଖରେ ଗ୍ରହଣ କରିବାକୁ ଦିଲ୍ଲୀ ଯାଉଥିବା ବେଳେ, ତାଙ୍କ ଜୀବନିକୁ ନେଇ ଆରମ୍ଭ ହୋଇଛି ଏକ ପ୍ରାମାଣିକ ଚଳଚ୍ଚିତ୍ର । ଅଭିସ୍ମିତା ପ୍ରଡକ୍ସନ୍ ବ୍ଯାନର୍ ରେ ନିର୍ମିତ ଏହି ଚଳଚ୍ଚିତ୍ରକୁ ପ୍ରାମାଣିକ ଚଳଚ୍ଚିତ୍ର ଜଗତର କ୍ଷାତନାମା ଯୁବ ନିର୍ଦ୍ଦେଶକ ପ୍ରଣବ କୁମାର ଆଏଚ ନିର୍ଦ୍ଦେଶନା ଦେଇଥିବା ବେଳେ, ରୋଟାରୀଆନ ଅଭୟ ପତି ଏହାକୁ ପ୍ରଜୋଜନା କରୁଛନ୍ତି। ଏହି ପ୍ରାମାଣିକ ଚଳଚ୍ଚିତ୍ରର କାହାଣୀ ଲେଖିଛନ୍ତି ଅସ୍ମିତା ପତି ଓ ସହ -ପ୍ରଯୋଜକ ଭାବେ ଚଳଚ୍ଚିତ୍ର ଜଗତର କ୍ଷାତନାମା ତାରକା ନୈନା ଦାଶ ହାତ ବଢାଇଛନ୍ତି । ଏହି ଚଳଚ୍ଚିତ୍ରର ଏକ ପୋଷ୍ଟର୍ ଆଜି ଯାଜପୁର ରୋଡ୍ ଜେମ୍ସ୍ ସ୍କୁଲ୍ ପରିସରରେ ଥିବା ରୋଟାରୀ ଭବନ ସଭାଗୃହରେ ଅନୁଷ୍ଠିତ ହୋଇଯାଇଛି। ଏହି ଅବସରରେ ଚଳଚ୍ଚିତ୍ରର ପ୍ରଯୋଜକ, ନିର୍ଦ୍ଦେଶକ, କାହାଣୀ ଲେଖିକା ଓ ସହ-ପ୍ରଜୋଜକ ତଥା ଚଳଚ୍ଚିତ୍ର ସହିତ ଜଡିତ ବହୁ ବ୍ଯକ୍ତି ଯୋଗ ଦେଇଥିଲେ। ପଦ୍ମଶ୍ରୀ ନନ୍ଦ ସାରଙ୍କ ଜୀବନି ଉପରେ ଆଧାରିତ ଏହି ଚଳଚ୍ଚିତ୍ରକୁ ଆନ୍ତର୍ଜାତୀୟ ସ୍ତରରେ କ୍ଷାତି ମିଳିବା ନେଇ ସମସ୍ତ ଯାଜପୁର ବାସୀଙ୍କ ସହ ପ୍ରଜୋଜକ ,ନିର୍ଦ୍ଦେଶକ ଓ ସଂମ୍ପୃକ୍ତ ବ୍ଯକ୍ତି ମାନେ ଆଶାବାଦୀ ଅଛନ୍ତି । ଏହି ପ୍ରାମାଣିକ ଚଳଚ୍ଚିତ୍ରର ରିଲିଜ୍ କୁ ନେଇ ସ୍ଥାନୀୟ ଅଞ୍ଚଳର ଲୋକଙ୍କ ମନରେ ବହୁ ଉତ୍ସାହ ଦେଖିବାକୁ ମିଳିଛି ।
- ଯାଜପୁରରୁ ଅଙ୍କିତ୍ କୁମାର ସାହୁ ବିଗ୍ ନିଉଜ୍ ଓଡିଶା
