() ୨୦୨୪ ନୁହେଁ, ୨୦୨୩ ନଭେମ୍ବର କି ଡ଼ିସେମ୍ବରକୁ ହୋଇପାରେ ସାଧାରଣ ନିର୍ବାଚନ । ଦେଶ ଓ ରାଜ୍ୟରେ ଆଗୁଆ ନିର୍ବାଚନକୁ ନେଇ ମଧ୍ୟ ନିର୍ବାଚନୀ ମାହୋଲ ବି ସୃଷ୍ଟି ହେଲାଣୀ । ଓଡ଼ିଶାରେ ମଧ୍ୟ ୨୪ ପାଇଁ ସବୁ ଦଳର ଜୋରଦାର ପ୍ରସ୍ତୁତି । ପଂଚାୟତ ,ପୌର, ବ୍ରଜରାଜନଗର ଉପ ନିର୍ବାଚନ ଫଳାଫଳ ଦେଖିଲେ ୨୦୨୪ ନିର୍ବାଚନରେ ସେମିତି କିଛି ଘଟିବନି ତାହା ରାଜନୈତିକ ମହଲରେ ଚର୍ଚ୍ଚା ହେଉଛି । ଅର୍ଥାତ ବିଜେଡ଼ି ୨୦୨୪ରେ ପୁଣିଥରେ ରାଜ୍ୟରେ ୧ ନମ୍ବର ଦଳ ଭାବେ ଉଭା ହେବା ତାହାର ଆକଳନ ଏବେଠାରୁ ରାଜନୈତିକ ସମୀକ୍ଷକଙ୍କ ଠାରୁ ଆରମ୍ଭ କରି ସାଧାରଣ ଲୋକମାନେ ଆକଳନ କରୁଛନ୍ତି । ଆଉ ଏସବୁ ଆକଳନ ବି ହେବା ସ୍ୱାଭାବିକ । 
କାରଣ ବିଜେଡ଼ିକୁ ଟକ୍କର କି ସମକକ୍ଷ ହେବାକୁ ଦୁଇ ଜାତୀୟ ଦଳ ବିଜେପି ଓ କଂଗ୍ରେସ ଏବେ ବି ସକ୍ଷମ ନୁହେଁ ଏହା ପଂଚାୟତ ଓ ପୌର ଫଳାଫଳ ଜରିଆରେ ଓଡ଼ିଶାବାସୀ ସ୍ପଷ୍ଟ ସଙ୍କେତ ଦେଇଛନ୍ତି । ତେବେ ଆଗୁଆ ନିର୍ବାଚନ ହେଲେ କିଏ ପାଇବ ଫାଇଦା , କାହାକୁ ବେଶୀ ସୁହାଇବ । ତାହାକୁ ନେଇ ଅଙ୍କକଷା ଚାଲିଥିବା ବେଳେ ରାଜ୍ୟରେ ୩ ପ୍ରମୁଖ ରାଜନୈତିକ ଦଳ ମଧ୍ୟ ନିର୍ବାଚନକୁ ନେଇ ଜୋରଦାର ପ୍ରସ୍ତୁତି ଆରମ୍ଭ କରିଛନ୍ତି । ଏବେ ନଜର ପକାନ୍ତୁ ପ୍ରକୃତରେ କିଏ କେତେ ପ୍ରସ୍ତୁତ ।
ବିଜେଡି : ୨୨ ବର୍ଷ ଧରି ନିରନ୍ତର ଶାସନ କ୍ଷମତା ରହିବା ସହ ନବୀନଙ୍କ ଲୋକପ୍ରିୟତା ବଢିବଢି ଚାଲିଛି । ନବୀନଙ୍କ ୨୫ ବର୍ଷ ଜନସେବାକୁ ପାଥେୟ କରି ବିଜେଡି ତୃଣମୂଳ ସ୍ତରରେ ସଂଗଠନକୁ ଏକ ଜନ ଆନ୍ଦୋଳନରେ ପରିଣତ କରିଛି । ନବୀନଙ୍କ ନିର୍ଦେଶରେ ବିଜେଡ଼ି ସାଂଗଠନିକ ସମ୍ପାଦକ ବରିଷ୍ଠ , କନିଷ୍ଠ, ୩ ଛାମୁଆ ସଂଗଠନ ଯୁବ,ମହିଳା, ଛାତ୍ର ସଂଗଠନକୁ ନେଇ ରାଜ୍ୟରେ ଦଳର ରାଜନୈତିକ କାର୍ଯ୍ୟକ୍ରମକୁ ଜୋରଦାର କରିଛନ୍ତି । ୨୫ ବର୍ଷ ପୂର୍ତ୍ତି ଅବସରରେ ଜନସେବା ପାଇଁ ବର୍ଷିକିଆ ରାଜନୈତିକ କାର୍ଯ୍ୟକ୍ରମ ଦଳ ହାତକୁ ନେଇଛି । ପ୍ରଥମେ ସଂଗଠନରେ ବଡ଼ଧରଣର ପରିବର୍ତ୍ତନ କରିବା ସହ ନେତାଙ୍କୁ ଜିଲ୍ଲାଦାୟିତ୍ବ ନ୍ୟସ୍ତ କରାଯାଇଛି । ପ୍ରତ୍ୟେକ ଦିନ ଟିମ ଓ୍ବାର୍କ ଜରିଆରେ ସଂଗଠନ ଚଳଚଞ୍ଚଳ କରିବା ସହ ଗାଁ ଠାରୁ ରାଜଧାନୀ ଯାଏଁ ବିଭିନ୍ନ କାର୍ଯ୍ୟକ୍ରମ ଜରିଆରେ ଦଳ ଲୋକଙ୍କ ସହ ଯୋଡ଼ିହୋଇ ରହୁଛି l ରାଜନୀତି ସହ ୨୪ ଘଣ୍ଟା କିପରି ଲୋକଙ୍କ ସହ ରହି ସେମାନଙ୍କ ସୁଖ ଓ ଦୁଃଖରେ ସାମିଲ ହୋଇହେବ ସେନେଇ ଦଳୀୟ କର୍ମୀ ଓ ନେତାଙ୍କୁ ପ୍ରତ୍ୟେକ ଦିନ ଗୁରୁମନ୍ତ୍ର ଦେଉଛନ୍ତି ବିଜେଡି ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ । ନିର୍ବାଚନ ଯେତେବେଳେ ହେଉ ଦଳ ସଂପୂଣ୍ଣ; ପ୍ରସ୍ତୁତ ଥିବା କେବଳ କଥାରେ ନୁହେଁ, ବଂର କାମରେ କରି ଦେଖାଉଛି ବିଜେଡି । ଆଗକୁ ଦଳ ପଦଯାତ୍ରାର ଲମ୍ବା ବ୍ଲୁପ୍ରିଣ୍ଟ ପ୍ରସ୍ତୁତ କରିଛି । 
ଲକ୍ଷ୍ୟ ୨୦୨୪ କି ୨୦୨୩ରେ ନିର୍ବାଚନ ହେଲେ ଦଳ ଦେଢକୋଟି ଭୋଟ ହାତେଇବା ସହ ଏକପାଖିଆ ବିଜୟ ହୋଇ ରାଜ୍ୟବାସୀଙ୍କ ସେବା ନିରନ୍ତର ଜାରି ରହିବ । କାରଣ ଦୁଇ ଜାତୀୟ ଦଳ ବିଜେପି ଓ କଂଗ୍ରେସ ଓଡ଼ିଶା ଦଖଲ କରିବା ପାଇଁ ଚେଷ୍ଟା କରୁଥିବା ବେଳେ ଆଂଚଳିକ ଦଳ ଭାବେ ବିଜୁ ଜନତା ଦଳ ଓଡ଼ିଶା ଗଠନ ଚିନ୍ତାରେ ଲାଗିପଡ଼ିଛି । ବିଜେଡ଼ିର ଏପରି ବଡ଼ ପ୍ରସ୍ତୁତି ଦୁଇ ବିରୋଧି ଦଳକୁ ବହୁତ ପଛରେ ପକାଇଛି ।
ବିଜେପି : ୨୦୦୯ ମସିହାରେ ବିଜେଡ଼ି ସହ ବିଜେପିର ମେଣ୍ଟ ଭାଙ୍ଗିବା ପରେ ରାଜ୍ୟରେ ବିଜେପି ସଂଗଠନ ଆଉ ଆଗେଇ ପାରୁନାହିଁ। ଯାହା ପ୍ରତ୍ୟେକ ନିର୍ବାଚନ ଫଳାଫଳରୁ ସ୍ପଷ୍ଟ ସଙ୍କେତ ଦେଉଛି । ୨୦୧୭ ପଂଚାୟତ ନିର୍ବାଚନରେ ୮ଟି ଜିଲ୍ଲା ପରିଷଦ ଆସନ ଦଖଲ କରିଥିବା ରାଜ୍ୟ ବିଜେପି ୨୦୨୨ରେ ଖାତା ଖୋଲିପାରିଲାନି । ଅର୍ଥାତ ଦିନକୁ ଦିନ ବିଜେପି ପ୍ରତି ରାଜ୍ୟବାସୀଙ୍କ ଭରଷା ତୁଟୁଛି । ପଂଚାୟତ , ପୌରରେ ରାଜ୍ୟବାସୀ ବିଜେପିକୁ ପ୍ରତ୍ୟାଖାନ କରିବା ପରେ ବ୍ରଜରାଜନଗର ଉପ ନିର୍ବାଚନ ବିଜେପିକୁ ବଡ଼ ଝଟକା ମିଳିଥିଲା। ବିଧାନସଭାର ନିର୍ବାଚନ ଫଳାଫଳକୁ ନେଇ ରାଜ୍ୟରେ ବିଜେପି ମୁଖ୍ୟ ବିରୋଧି ଦଳର ମାନ୍ୟତା ପାଇଥିବା ବେଳେ ବ୍ରଜରାଜନଗର ଉପ ନିର୍ବାଚନରେ ଦଳ ତୃତୀୟ ସ୍ଥାନକୁ ଖସିଆସିଛି । ଏହାରି ଭିତରେ ଆଗୁଆ ନିର୍ବାଚନ ପାଇଁ ମଧ୍ୟ ରାଜ୍ୟ ବିଜେପି ନିଜର ପ୍ରସ୍ତୁତି ଆରମ୍ଭ କରିଦେଇଛି । ଏଥର ମଧ୍ୟ ରାଜ୍ୟ ବିଜେପି କେନ୍ଦ୍ରୀୟ ନେତାଙ୍କ ଭରଷାରେ ଓଡ଼ିଶାରେ ସଂଗଠନ ଶକ୍ତିଶାଳୀ କରିବାକୁ ଅଣ୍ଟା ଭିଡ଼ିଛି । କେନ୍ଦ୍ରମନ୍ତ୍ରୀଙ୍କ ଘନଘନ ଓଡ଼ିଶା ଗସ୍ତ ସହ ରାଷ୍ଟ୍ରୀୟ ସଭାପତିଙ୍କ କାର୍ଯ୍ୟକ୍ରମ ଜରିଆରେ ତୃଣମୂଳ ସ୍ତରରୁ ସଂଗଠନକୁ ମଜବୁତ କରିବା ପାଇଁ ଦଳ ଲକ୍ଷ୍ୟ ରଖିଛି । କେନ୍ଦ୍ରୀୟ ନେତାଙ୍କୁ ଓଡ଼ିଶା ଆଣି ଦଳ ତୃଣମୂଳସ୍ତରରେ ନିରାଶ ହୋଇଯାଇଥିବା କର୍ମୀଙ୍କ ମନବଳ ବୃଦ୍ଧି କରିବାକୁ ପ୍ରୟାସ କରିଛି । ରାଜ୍ୟର ମୋ ବୁଥ ସବୁଠୁ ମଜବୁତ ଓ ମିଶନ ୧୨୦ ସଂପୂର୍ଣ୍ଣ ଫେଲ ମାରିବା ପରେ ପୁଣିଥରେ ବିଜେପି ସମାନ ଷ୍ଟ୍ରାଟେଜି ଆପଣାଉଛି । ହେଲେ ଦଳୀୟ ମଙ୍ଗୁଆଳମାନେ କିନ୍ତୁ କେନ୍ଦ୍ରର ଟ୍ୟାକ୍ସକୁ ପୂରଣ କରିପାରୁନାହାନ୍ତି । ତେଣୁ ବିଜେଡ଼ି ସହ ସମକକ୍ଷ ନୁହେଁ, ବଂର ଅଧିକ ସାଂସଦ କିପରି ଓଡ଼ିଶାରୁ ନିର୍ବାଚିତ ହେବେ ତାହା ଉପରେ ଦଳ ଫୋକସ କରିଛି । ଏହାଛଡ଼ା ଓଡିଶାରେ ମେଣ୍ଟ ହେବାର ଆଶା ମଉଳିଥିବାରୁ ଦଳ ଏବେ ନିଜ ବଳରେ ନିର୍ବାଚନୀ ବୈତରଣୀ ପାର ହେବାକୁ ଚାହୁଁଛି ।
କଂଗ୍ରେସ : ଭାରତ ଯୋଡ଼ ଯାତ୍ରା ଅଭିଯାନ ଦେଶରେ କଂଗ୍ରେସକୁ ସଫଳତା ଦେଉଥିିିିବା ବେଳେ ଓଡ଼ିଶାରେ କିନ୍ତୁ ଭିନ୍ନ ଦିଗରେ ଯାଉଛି କଂଗ୍ରେସ । ସାଧାରଣ ନିର୍ବାଚନ ପାଇଁ ଦଳ ୯ରୁ ୯୦ ମିଶନ ନେଇ କାମ କରୁଛି । ୨୨ ବର୍ଷ କ୍ଷମତା ବାହାରେ ରହିଥିଲେ ମଧ୍ୟ ଦଳ ଭିତରେ ଥିବା ଗୋଷ୍ଠୀବିବାଦ ଥମିବାର ନାଁ ନେଉନାହିଁ । ନୂଆ ପିସିସି ସଭାପତି କଂଗ୍ରେସକୁ ଏକଜୁଟ କରିବା ପାଇଁ ଚାହୁଁଥିବା ବେଳେ ଦଳର ନିର୍ବାଚିତ ୯ ଜଣ ବିଧାୟକଙ୍କୁ ଏକ କରିପାରୁନାହାନ୍ତି । ଯାହା କଟକ ବାରବାଟୀ ବିଧାୟକ ମହମ୍ମଦ ମୋକିମଙ୍କ ପ୍ରସଙ୍ଗରୁ ସ୍ପଷ୍ଟ ଜଣାପଡ଼ିଛି । ତାହାରି ଭିତରେ ରାହୁଲ ବିନା କଂଗ୍ରେସ ଓଡ଼ିଶାରେ ଭାରତ ଯୋଡ଼ ଯାତ୍ରା କରିବାକୁ ଯୋଜନା ପ୍ରସ୍ତୁତ କରିଛି । ୨୨ଶହ କିଲୋମିଟର ଚାଲିଚାଲି ଲୋକଙ୍କ ମନ ଜିଣିବାକୁ ଦଳ ପ୍ରୟାସ କରିଛି । କେବଳ ସେତିକି ନୁହେଁ, ଦଳ ଆଗୁଆ ନିର୍ବାଚନୀ ପ୍ରସ୍ତୁତିରେ ଲାଗିପଡ଼ିଥିଲେ ମଧ୍ୟ ବିଜେଡ଼ି ଓ ବିଜେପି ଠାରୁ ଢେର ପଛରେ ରହିଛି । ଦାୟିତ୍ବ ନେବାର ୪ ମାସ ପରେ ମଧ୍ୟ ପିସିସି ସଭାପତି ତାଙ୍କର ନୂଆ ଟିମ ଗଠନ କରିପାରିନାହାନ୍ତି । ଏହାସହ ଛାତ୍ର କଂଗ୍ରେସକୁ ଛାଡ଼ିଦେଲ ଯୁବ ଓ ମହିଳା ସଂଗଠନ ଯେପରି ନିଷ୍କ୍ରିୟ ହୋଇପଡିଛି । ଦେଢବର୍ଷରୁ କମ ସମୟ ସାଧାରଣ ନିର୍ବାଚନ ଥିବାରୁ କଂଗ୍ରେସ ମଙ୍ଗୁଆଳମାନଙ୍କ ମନ କିନ୍ତୁ ଏଯାଏ ଏକ ହୋଇପାରୁନାହିଁ । ତାହାରି ଭିତରେ ଦଳ ଉଭୟ ବିଜେଡ଼ି ଓ ବିଜେପି ବିରୋଧରେ ଜନମତ ସୃଷ୍ଟି କରିବାକୁ ଲକ୍ଷ୍ୟ ରଖିଛି ।
