() ରାକେଶ ମହାପାତ୍ର । ଉଚ୍ଚଶିକ୍ଷତି । ଏବେ ଏବେ ଇଂଜିନିୟରିଙ୍ଗ ପାସ କରିଛି । ୫ଲକ୍ଷରୁ ଅଧିକ ଟଙ୍କା ବି ଖର୍ଚ୍ଚ ହୋଇଛି ତାହା ପାଠପଢାରେ । ପଢାଶେଷ ହେବା ପରେ କିନ୍ତ୍ୁ ସେହି ଅନୁସାରେ ଚାକିରୀ ପାଇଲନି ରାକେଶ । ଯାହାକୁ ନେଇ ପରିବାର ଲୋକ ଅଶାନ୍ତି ନହେଲେ ବି କଥା କଥାକେ କହୁଛନ୍ତି ଆରେ ୫ଲକ୍ଷରୁ ଅଧିକ ଟଙ୍କା ଦେଇ ତତେ ପାଠ ପଢାଇଲୁ କଣ ଏହି ଚାକରୀ ପାଇଁ । ଏତକ ଦରମା ପାଇଁ । ବିଚାରା ରାକେଶ କିନ୍ତୁ କେମିତିି ଏ ପ୍ରଶ୍ନ ଉତ୍ତର ରଖିବ ଓ ପରିବାର ଲୋକଙ୍କୁ ବୁଝାଇବ ତାହା ଜାଣିପାରୁନାହିଁ ।
ବଦଳିଯାଇଛି ଯୁଗ । ଆରମ୍ଭ ହୋଇଯାଇଛି ପ୍ରତିଯୋଗିତା । ଏସବୁ କ୍ଷେତ୍ରରେ ପ୍ରତିଯୋଗିତା । ଯେତେ ଯାହା କଲେ ବି ଚାକୀରୀ ଖଣ୍ଡେ ପାଇବା ଯେ କେତେ ମୁସକିଲ ତାହା ଯିଏ ଅଙ୍ଗେ ଲିଭାଇଛି ସେ ଜାଣିଛି । ଭଲ ଶିକ୍ଷାନୁଷ୍ଠାନରେ ଭଲ ନମ୍ବର ରଖି ପାସ କରି ବି କ୍ୟାମ୍ପସ ମିଳେ ନାହିଁ କେତେକଙ୍କ ଭାଗ୍ୟରେ । ଆଉ କେତେବେଳେ ତ କ୍ୟାମ୍ପସ ଆସେ ନାହିଁ । ପାଠପଢା ଶେଷ ପରେ ଦୁଇରୁ ତିନି ବର୍ଷ ଲାଗେ ଖଣ୍ଡେ ଚାକିରୀ ପାଇବା ପାଇଁ । ଏଥିରେ ପୁଣି ବହୁତ ଅସନ୍ତୋଷ ଥାଏ । ପ୍ରଥମେ ଯେଉଁଠି କାମ କରିବାକୁ ଇଚ୍ଛା ନଥାଏ ସେଇଠି ଚାକିରୀ ମିଳେ । ଦରମା କଥା ନକହିଲେ ଭଲ । ଆଜିକାଲି ପ୍ରତିଯୋଗିତା ଏମିତି ରକେଟ ପରି ହୋଇଛିି ଯେ କେତେବେଳେ ନିଆଁ ଲାଗୁଛି ଓ କେତେବେଳେ ରକେଟ କୁଆଡ଼େ ଯାଉଛି ତାହା ବି ଅନୁମାନ କରି ହେଉନାହିଁ । ନହେଲେ ଉଚ୍ଚଶିକ୍ଷିତ ଓ ମାଳମାଳ ଡ଼ିଗ୍ରୀଧାରୀମାନେ କଣ ପିଅନ ଚାକିରୀ ପାଇଁ ଆବେଦନ କରିଥାନ୍ତେ । ତାହା ହିଁ ବାସ୍ତବତା । ହେଲେ ଏକଥା କିନ୍ତୁ ପରିବାର ଲୋକ ବୁଝିବାକୁ ନାରାଜ । କାହିଁକି ଏତେ ପଇସା ଦେଇ ପାଠ ପଢିଲୁ ଏତେ କମ ଦରମା ପାଇଲୁ ବୋଲି ପଚାରିଥାନ୍ତି । ରାକେଶକୁ ବି ସେଦିନ ତା ବଡ଼ ଭାଇ ସେକଥା ପଚାରିଲା । ବିଚରା ରାକେଶ କଣ କହିବ ତାହା ଭାବିଭାବି ବହୁ ସମୟର ନିରବତା ପରେ କହିଲା ଭଲ ଚାକିରୀ ହେବ , ଭଲ ଦରମା ବି ପାଇବି । ହେଲେ ଭାଇ ଯେତେବେଳେ ପଚାରିଲେ କେବେ ସେତେବେଳେ ରାକେଶ ପୁରା ଚୁପ ରହିଲା । …
