() ମାଲକାନଗିରିରୁ ଆରମ୍ଭ । ଯାଜପୁରରେ ଶେଷ । ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାର ସ୍ମାର୍ଟକାର୍ଡ ବାଣ୍ଟି ସାରା ରାଜ୍ୟରେ ସଞ୍ଜୀବନୀ ବାଣ୍ଟିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆଜି ସଂଧ୍ୟାରେ ପାରାମ୍ପରିକ ପରିବେଶରେ ଯାଜପୁରରେ ବଣ୍ଟାଗଲା ସ୍କାର୍ଟକାର୍ଡ । ଯେହେତୁ ଭର୍ଚୁଆଲରେ ରହିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ସମାବେଶର ଦାୟିତ୍ବ ବହନ କରିଥିଲେ ଯାଜପୁର ବିଧାୟକ ତଥା ବିଜେଡି ସଂଗଠନ ସଂପାଦକ ପ୍ରଣବ ପ୍ରକାଶ ଦାସ । ଅନ୍ୟମାନଙ୍କ ମଧ୍ୟରେ ରାଜ୍ୟର ସର୍ବପୁରାତନ ପୌରାଞ୍ଚଳରେ ଉପସ୍ଥିତି ଥିଲେ ସ୍ବାସ୍ଥ୍ୟ ମନ୍ତ୍ରୀ ନବ ଦାସ, ବିଜ୍ଞାନ ଓ କାରିଗରୀ ମନ୍ତ୍ରୀ ଅଶୋକ ପଣ୍ଡା ଏବଂ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ । ବିଭିନ୍ନ ସ୍ଥାନରେ ମଞ୍ଚ କରାଯାଇଥିଲା । ପ୍ରତି ମଞ୍ଚରେ ଉଦଯାପନୀ ଦିବସର ସମାରୋହ । ସାରା ରାଜ୍ୟର ଲୋକକଳା ମାଧ୍ୟରେ ଏହି ମହାନ ଜୀବନରକ୍ଷା ପର୍ବର ସମାପନ କରାଯାଇଛି । ପ୍ରଥମ ସ୍ମାର୍ଟକାର୍ଡ ପାଇଲେ ଯାଜପୁର ଜିଲ୍ଲାର ସୁଜାତା ପଣ୍ଡା । ଏଥିସହ ଯାଜପୁର ପାଇଲା ୨ ହଜାର କୋଟିରୁ ଅଧିକ ଟଙ୍କାର ପ୍ରକଳ୍ପ । ଦେଶର ସ୍ବାସ୍ଥ୍ୟ ସେବାର ଯାଜପୁର ଯୋଡ଼ି ହେଲା । ଯାହାକୁ ଏକ ମାଇଲଖୁଣ୍ଟର ଆଖ୍ୟା ଦେଇଛନ୍ତି ମୁଖ୍ୟମନ୍ତ୍ରୀ । ଆତିଶବାଜିରେ ଝଲସିଲା ବିରଜାକ୍ଷେତ୍ର ।
ଗତ ୪ ମାସରୁ ଯାଜପୁର ଜିଲ୍ଲା ଅପେକ୍ଷା କରିଥିଲା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଏହି ରକ୍ଷା କବଚ ପାଇଁ । ଆଶା ଆକାଂକ୍ଷା ଓ ଅପେକ୍ଷାର ଦମଦାର ଅବସାନ ଘଟିଲା । ଭର୍ଚୁଆଲରେ ହେଲେ ବି ନବୀନଙ୍କୁ ଦେଖି ଖୁସିରେ ବିଭୋର ହୋଇପଡ଼ିଲେ ଯାଜପୁରବାସୀ । ସମାରୋହକୁ ଆହୁରି ଲୋକପ୍ରିୟ କରିବାରେ କୌଣସି ପ୍ରୟାସକୁ ହାତଛଡ଼ା କରିନଥିଲେ ସ୍ଥାନୀୟ ବିଧାୟକ ପ୍ରଣବ । ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାର ସ୍ମାର୍ଟକାର୍ଡ ବାଣ୍ଟା ଆରମ୍ଭ ଦିନଠାରୁ ହି ପ୍ରଣବ ସକ୍ରିୟ ଭୂମିକା ଗ୍ରହଣ କରିଛନ୍ତି । ମୁଖ୍ୟମନ୍ତ୍ରୀଙ୍କ ଗସ୍ତର କିଛି ଦିନ ପୂର୍ବରୁ ହି ଉପାନ୍ତ ହେଉ କି ସହରାଞ୍ଚଳ, ସବୁଠାରେ ସଭାସମିତି ଓ ମଞ୍ଚ ପ୍ରସ୍ତୁତ କରି ଏହି ଯୁଗାନ୍ତକାରୀ କାର୍ଯ୍ୟକୁ ସଫଳ ରୂପାୟନ କରିବାରେ ପ୍ରଣବ ସାରଥୀ ସାଜିଛନ୍ତି । ଆଉ ଯେବେ ନିଜ ମାଟିରେ କାର୍ଡ ବଣ୍ଟା ଗଲା, ସେ ପ୍ରଣବଙ୍କ ପାଇଁ କୌଣସି ଉତ୍ସବରୁ କମ ନଥିଲା ।
ସେ କଳାହାଣ୍ଡିରେ ଅପର୍ ଇନ୍ଦ୍ରାବତୀ ଜଳସେଚନ ଉଦଘାଟନ ହେଉ କି ପିପିଲି ଉପନିର୍ବାଚନ ବା ମୟୂରଭଞ୍ଜ ଓ ସୁନ୍ଦରଗଡ଼ରେ ବିଜେଡିର ଗାଡ଼ ମଜବୁତ କରିବା, ସବୁଠାରୁ ଆଗରେ ପ୍ରଣବ ଠିଆ ହୋଇଛନ୍ତି । ତା ଭିତରେ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାର ସ୍ମାର୍ଟକାର୍ଡ ବଣ୍ଟନ କାର୍ଯ୍ୟର ଦାୟିତ୍ବ ବହନ କରି ହାର୍ଡଟ୍ୟାକ୍ସ ମାଷ୍ଟରର ପରିଚୟ ଦେଇଛନ୍ତି ଯାଜପୁର ମାଟିର ଏହି ଲଢୁଆ ପୁଅ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସବୁ କାର୍ଯ୍ୟକ୍ରମ ଯେ ସଫଳତା ସହ ଆୟୋଜିତ ହେବ, ସେଥିପାଇଁ ଦୈନିକ ୩୦୦ କିଲୋମିଟରରୁ ଅଧିକ ଯାତ୍ରା କରୁଥିଲା ପ୍ରଣବ । ଆଉ ଏବେ ସମୟ ଆସିଛି, ଏହି ପରିଶ୍ରମର ଫାଇନାଲ ପରୀକ୍ଷାର । କାରଣ ଆଗକୁ ପଞ୍ଚାୟତ ନିର୍ବାଚନରେ ନବୀନଙ୍କ ନେତୃତ୍ବ ଓ ପ୍ରଣବଙ୍କ ପ୍ରୟାସ ଯେ ବିଜେଡି ପାଇଁ ଭଲ ଫଳ ଆଣିବ, ତାହା ଏବେଠାରୁ ରାଜେନୖତିକ ମହଲରେ ଆଲୋଚନା ହେଲାଣି ।
