ବର୍ଷିୟାନ୍ ନେତା ତଥା ପୂର୍ବତନ ମନ୍ତ୍ରୀ ଶ୍ରୀସୁରେନ୍ଦ୍ରନାଥ ନାୟକଙ୍କ ୮୬ତମ ଜନ୍ମ ଦିବସ ଉପଲକ୍ଷେ।
() ମନୁଷ୍ୟ ନିଜସ୍ୱବୁଦ୍ଧି, କର୍ମ, ସାହସ, ଜ୍ଞାନ, ଅଧ୍ୟବସାୟ, ଦୂରଦୃଷ୍ଟି ଓ ସୁସମ୍ପର୍କ ବଳରେ ସୁନାମ ଅର୍ଜନ କରିବା ସହିତ ସମାଜକୁ ଗୌରବାନ୍ୱିତ କରନ୍ତି । ସେହିପରି ଜଣେ ମଣିଷ ହେଲେ ପୁରୀଜିଲ୍ଲା ଅସ୍ତରଙ୍ଗ-କାକଟପୁର ଅଞ୍ଚଳର ଯୋଗ ଜନ୍ମା ତଥା ପୂର୍ବତନ ମନ୍ତ୍ରୀ ଶ୍ରୀଯୁକ୍ତ ସୁରେନ୍ଦ୍ରନାଥ ନାୟକ । ସେ ପ୍ରିୟ ମହାନୁଭବ କାକଟପୁର ଅଞ୍ଚଳର ଜଣେ ଜଣାଶୁଣା ନିର୍ଭୀକ ଓ ସାହସୀବ୍ୟକ୍ତିତ୍ୱ । ସେ ସ୍ୱଭାବତଃ ସ୍ପଷ୍ଟବାଦୀ । ସତ୍ୟ କହିବାକୁ ସେ କୌଣସି ପରିସ୍ଥିତିରେ କୁଣ୍ଠାବୋଧ କରନ୍ତି ନାହିଁ ।
୧୯୮୪ ମସିହାରଘଟଣା । ଓଡ଼ିଶାର ବରପୁତ୍ର ତଥା ପ୍ରବାଦପୁରୁଷ ସ୍ୱର୍ଗତ ବିଜୁ ପଟ୍ଟନାୟକଙ୍କୁ ତାଙ୍କର ସହଯୋଗୀ ତଥା ରାଜନୈତିକ ନେତୃବୃନ୍ଦ ତାଙ୍କ ସମ୍ମୁଖରେ ଯୁକ୍ତିକରିବା ପାଇଁ ସାହସ କରନ୍ତି ନାହିଁ । ପୂର୍ବତନ ମନ୍ତ୍ରୀ ଶ୍ରୀଯୁକ୍ତ ସୁରେନ୍ଦ୍ରନାଥ ନାୟକ ଅନେକ ସମୟରେ ବିଭିନ୍ନ ପ୍ରସଙ୍ଗକୁ ନେଇ ବିଜୁବାବୁଙ୍କ ସହିତ ବଳିଷ୍ଠ ଯୁକ୍ତିକରନ୍ତି । ଏକଦା କୌଣସି ଏକ ଘଟଣାକୁ ନେଇ ବିଜୁବାବୁଙ୍କ ସହିତ ବୈଠକରେ ଯୁକ୍ତି କରିଥିଲେ ସୁରବାବୁ । ବିଜୁବାବୁ ଅତ୍ୟନ୍ତ ବିରକ୍ତ ହୋଇ କହିଥିଲେ -ତୁମେ ଅଧିକ ବକ୍ବକ୍ କରନି ।ତୁମକୁ ଦଳରୁ ବହିଷ୍କାର କରାଯିବ । ଏକଥା ସୁରବାବୁଙ୍କୁ ବହୁତ ବାଧିଥିଲା । ସେ ତୁରନ୍ତ ବୈଠକ ଛାଡ଼ି ଚାଲି ଯାଇଥିଲେ । ବିଜୁ ବାବୁ ତାଙ୍କୁ ପର ମୁହୂର୍ତ୍ତରେ ଖୋଜି ପାଖରେ ପାଇ ନଥିଲେ ।ଅପରାହ୍ଣରେ ସୁରବାବୁଙ୍କ ଘନିଷ୍ଠ ବନ୍ଧୁ ତଥା ପୂର୍ବତନ ମନ୍ତ୍ରୀଶ୍ରୀଯୁକ୍ତ ଅଶୋକ ଦାସ ଏ ଖବର ପାଇ ତାଙ୍କୁ ନେଇ ନବୀନ ନିବାସ ଯାଇଥିଲେ । ସେଠାରେ ସେ ଶୁଣିବାକୁ ପାଇଲେ ଯେ ବିଜୁବାବୁ ସେଦିନ ମଧ୍ୟାହ୍ନ ଭୋଜନ ଖାଇନାହାନ୍ତି ।ଏହା ଶୁଣିବା ମାତ୍ରେ ସୁର ବାବୁ ତୁରନ୍ତ ବିଜୁବାବୁଙ୍କୁ ଦେଖା କରିବାକୁ ଗଲେ ।ବିଜୁବାବୁ କହିଲେ “ମୁଁତୁମକୁ କ’ଣ ପଦେ କହିଦେଲି ବୋଲି ତୁମେ ବୈଠକ ଛାଡ଼ି ଚାଲିଗଲ” ।ସୁର ବାବୁ ଉତ୍ତରରେ କହିଲେ “ଆପଣ ବହିଷ୍କାର କଥା କହିବାରୁ ମୋତେ ଅପମାନ ବୋଧ ହେଲା ।ତେଣୁ କ୍ଷମା କରନ୍ତୁ ।” ତାପରେ ବିଜୁ ବାବୁ କହିଥିଲେ ହଉ ଯାହା ହେଲା ଛାଡ଼ । ଆସ ଆମେ ଏକାଠି ଖାଇବା ।ଏଥିରୁ ଜାଣିହୁଏ ସୁରବାବୁଙ୍କ ନିର୍ଭୀକତା ଓ ବିଜୁବାବୁଙ୍କ ସହ ସୁସମ୍ପର୍କ ଓ ଆନ୍ତରିକ ସ୍ନେହଶ୍ରଦ୍ଧା ।
ଆଜି ସେହି ମହାନୁଭବଙ୍କ ୮୬ତମ ଜନ୍ମଦିବସରେ ଆମ୍ଭେ ତାଙ୍କୁ ଶୁଭେଚ୍ଛା ଜ୍ଞାପନ କରିବା ସହିତ ତାଙ୍କର ସୁସ୍ଥ ଓ ନିରାମୟଜୀବନ ନିମନ୍ତେ ମହାପ୍ରଭୁ ଶ୍ରୀଜଗନ୍ନାଥଙ୍କ ନିକଟରେ ପ୍ରାର୍ଥନା କରୁଛୁ ।
ବାସୁଦେବ ବେହେରା, କୁସୁମ୍ବର, ଅସ୍ତରଙ୍ଗ, ପୁରୀ
