( ) କୋଭିଡ ସ୍ଥିତି ନେଇ ଜନସ୍ୱାସ୍ଥ୍ୟ ନିର୍ଦେଶକ ଡାକ୍ତର ନିରଞ୍ଜନ ମିଶ୍ରଙ୍କ ପ୍ରତିକ୍ରିୟା । ରାଜ୍ୟରେ ସଂକ୍ରମଣ ବଢୁଛି, ଆମ ନଜରରେ ତାହା ଅଛି । ଯେମିତି ପୂରା ଦେଶରେ କୋଭିଡ ସଂକ୍ରମଣ ବଢୁଛି, ସେହି ଅନୁପାତରେ ରାଜ୍ୟରେ ବଢୁଛି । ଅନ୍ୟ ରାଜ୍ୟ ଭଳି ଆମ ରାଜ୍ୟରେ ମଧ୍ୟ ସହରାଞ୍ଚଳ ଯଥା କଟକ, ଭୁବନେଶ୍ୱର ରେ ସଂକ୍ରମଣ ଅଧିକ ରହୁଛି । କିନ୍ତୁ ସ୍ଥିତି ସେତେ ଆଲର୍ମିଂ ନାହିଁ । ଏଯାଏଁ ଆମ ରାଜ୍ୟର ଟେଷ୍ଟ ପଜିଟିଭିଟି ହାର 1 ପ୍ରତିଶତ ତଳେ ରହିଛି । କିନ୍ତୁ ଆଶ୍ୱାସନାର ବିଷୟ, 600ରୁ ଅଧିକ ଆକ୍ଟିଭ କେସ ଥିଲେ ମଧ୍ୟ ମାତ୍ର 12 ଜଣ ହସ୍ପିଟାଲରେ ଆଡମିଶନ ହୋଇଛନ୍ତି । ଏହା ଅର୍ଥ ଅଧିକାଂଶ ଲୋକ ଲକ୍ଷଣହୀନ ବା ସ୍ୱଳ୍ପ ଲକ୍ଷଣଯୁକ୍ତ । ତେଣୁ ବର୍ତ୍ତମାନ କୋଭିଡ ସଂଖ୍ୟା ବଢିଲେ ବି ପ୍ରଥମ ଓ ଦ୍ୱିତୀୟ ଲହର ଭଳି ଭୟାବହତା ଆଡ଼କୁ ନ ଯାଇପାରେ । ଏହାସତ୍ତ୍ୱେ କୋଭିଡ ସ୍ଥିତି ଉପରେ ରାଜ୍ୟ ସରକାରଙ୍କ ନଜର ରହିଛି । ଆବଶ୍ୟକୀୟ ପ୍ରସ୍ତୁତି କରାଯାଇଛି ।
ରଥଯାତ୍ରା ଲାଗି ମଧ୍ୟ ସରକାର ସତର୍କ ଅଛନ୍ତି । ସମସ୍ତଙ୍କୁ ନିବେଦନ କରାଯାଉଛି, ଲକ୍ଷଣଯୁକ୍ତ ଲୋକମାନେ ରଥଯାତ୍ରା ପାଇଁ ପୁରୀ ନ ଆସନ୍ତୁ । ସେମାନେ ନିଜର କୋଭିଡ ପରୀକ୍ଷା ଆଗୁଆ କରାଇ ନିଅନ୍ତୁ । ମାସ୍କ ବ୍ୟବହାର କରନ୍ତୁ । ଏଣେତେଣେ ଛେପ ପକାନ୍ତୁ ନାହିଁ । ନହେଲେ ଏତେ ଗହଳି ଭିତରେ ଆମେ ପୁଣି ରୋଗ ବାଣ୍ଟି ଚାଲିବା । ଏହାସହ ପୁରୀରୁ ଫେରିଲା ପରେ ଯଦି କାହା ନିକଟରେ କୋଭିଡ ଲକ୍ଷଣ ଦେଖାଯାଉଛି, ନିଜର ଟେଷ୍ଟ କରାନ୍ତୁ, ଆଇସୋଲେସନରେ ରୁହନ୍ତୁ । ନିଜ ପରିବାରକୁ ସୁରକ୍ଷିତ ରଖିବା ସହ ସମସ୍ତଙ୍କୁ ସୁରକ୍ଷିତ ରଖନ୍ତୁ ।
ଡାକ୍ତର ନିରଞ୍ଜନ ମିଶ୍ର, ଜନସ୍ୱାସ୍ଥ୍ୟ ନିର୍ଦେଶକ
