() ହୃଦୟ ଯାହା ସହ ଆପେ ଆପେ ମିଶିଯାଏ ଓ ମନର ସବୁ କଥା ଯାହାକୁ କହିହୁଏ ସେ ହିଁ ବନ୍ଧୁ l ଏଥିପାଇଁ ନା ଦରକାର କିଛି ସ୍ଵାର୍ଥ ନା ସ୍ଵପ୍ନ l କେବଳ ନିଛକ ଭଲ ପାଇବା l ବନ୍ଧୁ ସଂଜ୍ଞା ପାଇଁ ବୟସ, ଲିଙ୍ଗ, ଜାତି, ଅର୍ଥ କି ରକ୍ତ ସମ୍ପର୍କ ଆବଶ୍ୟକ ପଡେନି l ଭଗବାନଙ୍କ ଆଶିର୍ବାଦରୁ ଆପେ ଆପେ ଯାହା ସହ ସମ୍ପର୍କ ଯୋଡି ହୋଇଯାଏ ତା ନାଁ ହୋଇଯାଏ ବନ୍ଧୁ l ପିଲା ଦିନରୁ ଯେବେ ହେତୁ ଆସେ ସେତେବେଳେ ଆମେ ଖେଳିବା ବେଳେ କି ଖାଇବା ବେଳେ କାହା ସହ ହୃଦୟ ସହ ମିଶିଯାଉ ଆଉ ସେ ସମ୍ପର୍କ ମଲା ଯାଏ ଚିର ସ୍ମରଣୀୟ ହୋଇ ରହେ l ସମୟ ଚକ୍ରରେ ଭଗବାନଙ୍କ ଆଶୀର୍ବାଦରୁ ବନ୍ଧୁ ବହୁତ ଯୋଡ଼ି ହୋଇ ଯାଆନ୍ତି ଓ ସମ୍ପର୍କ ବି ଅତୁଟ ରହେ ସୁଖ ଓ ଦୁଃଖରେ l ପୁଣି ସେହି ସମୟ ବନ୍ଧୁକୁ ଦୂରେଇ ଦିଏ ଆମ ଠାରୁ ବିନା ସ୍ଵାର୍ଥରେ l ବାପା ସହ ପୁଅର ବି ବନ୍ଧୁତା ନିବିଡ ହେଲେ ଯାଇ ସଂସାର ସଠିକ୍ ଭାବେ ଚାଲିବ l ସେଥିପାଇଁ ତ ଗୁରୁଜନ ମାନେ କହନ୍ତି ପୁଅ କି ଝିଅ ବଡ ହୋଇଗଲେ ସେମାନଙ୍କ ସହ ସାଙ୍ଗ ପରି ମିଶିବାକୁ ପଡ଼ିବ l ବନ୍ଧୁତ୍ୱ କଥା ଯେତେବେଳେ ଆସେ ଆପେ ଆପେ ସଭିଙ୍କ ମନରେ ଚାଲିଆସେ ପ୍ରଭୁ କୃଷ୍ଣ ଓ ସୁଦାମାଙ୍କ କଥା l ବଳିଦାନର ବଡ ସେତୁ ବନ୍ଧୁତ୍ୱ l ଭଗବାନଙ୍କ ଆଶୀର୍ବାଦରୁ ଭଲ ବନ୍ଧୁଟିଏ ଯଦି ଆପଣଙ୍କର ଅଛି ତ ଦୁନିଆର କିଛି ଆବଶ୍ୟକ ନାହିଁ l ଶ୍ରୀକୃଷ୍ଣ ଓ ସୁଦାମ ପରି ବନ୍ଧୁ ଆଜି ବି ସମାଜର ବିଭିନ୍ନ କୋଣରେ ଓ ସବୁ ବର୍ଗରେ ଅଛନ୍ତି l ଖାଲି ଏତିକି ଫରକ ଆଜିର ଦିନରେ ଆମର ଦୃଷ୍ଟିଭଙ୍ଗୀ ବଦଳି ଯାଇଛି ବନ୍ଧୁ ଶବ୍ଦ ପାଖରେ l ଏବେ ଆମେ ବନ୍ଧୁ ସହିତ ହୃଦୟର ସହ ଯୋଡ଼ି ହେବାକୁ ଚାହୁନାହାନ୍ତି ବରଂ ସମୟ ଓ ସ୍ଵାର୍ଥ ପାଇଁ ବନ୍ଧୁ ହୋଇ ପରସ୍ପର ସହିତ ମିଶିବାରେ ଲାଗିଛନ୍ତି l ତ୍ୟାଗ ଅପେକ୍ଷା ଭୋଗବିଳାସ ଅଧିକ ଶକ୍ତିଶାଳୀ ହେଉଛି ବନ୍ଧୁତ୍ୱରେ l ବନ୍ଧୁ ହେବା ପାଇଁ ବିଶ୍ୱାସ ବି ଆସିପାରୁନି ମନରେ l ହେଲେ ଏତେ କଥା କଣ ମ ! ଅଗଷ୍ଟ ମାସର ପ୍ରଥମ ସପ୍ତାହକୁ ବନ୍ଧୁତ୍ୱ ଦିବସ ପାଳନ କରାଯାଏ l ଯାହା ସହ ମନଖୋଲି ଗପି ହେଉଛି ଏ ବ୍ୟସ୍ତ ଜୀବନ ଭିତରେ ସେ ହିଁ ପ୍ରକୃତ ବନ୍ଧୁ l ସେ କିଏ ବି ହୋଇପାରେ ,ହେଲେ ଶେଷରେ ସମୟ କ୍ରମେ ଜୀବନ ଏମିତି ବନ୍ଧୁତ୍ୱର ଛାୟାରେ କଟିଯାଉ l କିଏ ଥାଉ କି ନଥାଉ ତୁ ଅଛୁ ମୋ ପାଇଁ ମୁଁ ଅଛି ତୋ ପାଇଁ….
ବନ୍ଧୁତ୍ୱ ଦିବସର ଅଭିନନ୍ଦନ…..
