() ଓଡ଼ିଶା ପ୍ରସିଦ୍ଧ ଢେଙ୍କାନାଳର ଗଜଲକ୍ଷ୍ମୀ ପୂଜା। ସେଥିପାଇଁ ଚଳଚଞ୍ଚଳ ହୋଇ ଉଠିଛି ସାରା ସହର। ଏଠାରେ ମା ଲକ୍ଷ୍ମୀଙ୍କ ପୂଜାକୁ ନେଇ ଏକ ପ୍ରକାରର ପ୍ରତିଯୋଗୀତା ଆରମ୍ଭ ହୋଇଛି। ଆକର୍ଷଣୀୟ ତୋରଣ ଓ ଆଲୋକ ମାଳରେ ଝଲସୁଛି ବିଭିନ୍ନ ପୂଜାମଣ୍ଡପ। କେଉଁଠି ଦେଖିବାକୁ ମିଳୁଛି ତ୍ରୟମ୍ବକମ୍ ମନ୍ଦିରର ତୋରଣ ତ ଆଉ କେଉଁଠି ଦେଖିବାକୁ ମିଳୁଛି ଇଜିପ୍ଟ ର ମମି ତୋରଣ l ଆଉ କେଉଁଠି ଆଖି ଝଲସିବା ଭଳି ତୋରଣ ପୂଜାର ମୁଖ୍ୟ ଆକର୍ଷଣ ସାଜିଛି । ଚଳିତ ବର୍ଷ ସମଗ୍ର ଅଞ୍ଚଳରେ ମୋଟ ୪୦ ଟି ମଣ୍ଡପରେ ପୂଜା ପାଉଛନ୍ତି ଧନର ଦେବୀ ମା’ଲକ୍ଷ୍ମୀ। ସେହିଭଳି ସାଜସଜ୍ଜା ଓ ମୂର୍ତ୍ତୀକୁ ନେଇ ଭିନ୍ନ ଏକ ପରିଚୟ ସୃଷ୍ଟି କରିବାକୁ ଚେଷ୍ଟା କରିଛି ବସଷ୍ଟାଣ୍ଡ୍ ସ୍ଥିତ ଅମ୍ଳପଡା ପୂଜା ମଣ୍ଡପ । ୫୫ ବର୍ଷ ଧରି ପୂଜା କରି ଆସୁଥିବା ଏହି ମଣ୍ଡପ ଏଥର କିଛି ନିଆରା କରିବାକୁ ଚେଷ୍ଟା କରିଛି । ୩୦ଫୁଟ ଉଚ୍ଚ ଓ ୪୦ ଫୁଟ ଓସାର ବିଶିଷ୍ଟ ତିରୁପତିର ବାଲାଜୀ ମନ୍ଦିର ଆକୃତିର ତୋରଣ ଦେଖଣାହାରିଙ୍କ ମନ ମୋହୁଛି। ଏଥିସହ ୮ ଫୁଟ ଉଚ୍ଚ ର ମା’ଙ୍କ ମୃଣମୟୀ ମୂର୍ତ୍ତୀ ବେଶ୍ ମନୋରମ ବୋଲି ପୂଜା କମିଟି ସଭାପତି ଶ୍ରୀ ଦେବୀ ପ୍ରସାଦ ମିଶ୍ର ସୂଚନା ଦେଇ କହିଛନ୍ତି। ଏଥିସହ ପୂଜାରେ ଦର୍ଶକଙ୍କ ସୁରକ୍ଷା ତଥା ଭିଡ଼ ନିୟନ୍ତ୍ରଣ ପାଇଁ ପୋଲିସ୍ କର୍ମଚାରୀ ଓ କମିଟି ସଦସ୍ୟ ସଜାଗ ରହିବେ ବୋଲି କହିଛନ୍ତି ଶ୍ରୀ ମିଶ୍ର । କିଛି ଦିନ ପୂର୍ବରୁ ଲକ୍ଷ୍ମୀ ପୂଜାକୁ ନେଇ ଜିଲ୍ଲାପାଳ ମନୋରଞ୍ଜନ ମଲ୍ଲିକଙ୍କ ଅଧ୍ୟକ୍ଷତାରେ ଏକ ସମନ୍ବୟ ବୈଠକ ଅନୁଷ୍ଠିତ ହୋଇଥିଲା। ଯେଉଁଥିରେ ଜିଲ୍ଲା ପ୍ରଶାସନ, ପୋଲିସ୍ ପ୍ରଶାସନ,ବିଦ୍ଯୁତ ବିଭାଗ ଅଧିକାରୀ ଓ ସମସ୍ତ ପୂଜା କମିଟିର କର୍ମକର୍ତ୍ତା ଯୋଗ ଦେଇ ଶାନ୍ତିଶୃଙ୍ଖଳାର ସହ ପୂଜା ଅନୁଷ୍ଠିତ ହେବ ସେ ଦିଗ ଉପରେ ଆଲୋଚନା କରିଥିଲେ। ପ୍ରଶାସନ ନିଷ୍ପତ୍ତିକୁ ସମସ୍ତ ପୂଜା କମିଟି ପାଳନ କରିବା ପାଇଁ ପ୍ରତିଶ୍ରୁତି ମଧ୍ୟ ଦେଇଛନ୍ତି । ଅପରପକ୍ଷରେ କମିଟି ସମ୍ପାଦକ ଶିବାଶିସ ମାନସିଂହ କହିଛନ୍ତି ୧୧ଦିନ ଧରି ହେବାକୁ ଥିବା ପୂଜା ଅବସରରେ ଦର୍ଶକ ମାନଙ୍କ ମନୋରଞ୍ଜନ ଲାଗି ପ୍ରତ୍ୟେକ ଦିନ ଓଡିଶା ତଥା ବାହାର ରାଜ୍ୟର କଳାକାରଙ୍କ ଦ୍ଵାରା ସାଂସ୍କୃତିକ କାର୍ଯ୍ୟକ୍ରମ ମାନ ପରିବେଷଣ ହେବ । ସମସ୍ତ ସାଜସଜ୍ଜା,ପୂଜା ଓ ସଂlସ୍କୃତିକ କାର୍ଯ୍ୟକ୍ରମ ବାବଦକୁ ପ୍ରାୟ ୧୫ ଲକ୍ଷ ଟଙ୍କା ଖର୍ଚ୍ଚ ହୋଇଛି ବୋଲି କହିଛନ୍ତି ଶ୍ରୀ ମାନସିଂହ।
