() ଲୋକଙ୍କ ସେବା ପାଇଁ ପ୍ରଶାସନିକ ସେବାରେ ବିଭିନ୍ନ ପଦପଦବୀରେ ବସୁଥିବା ବାବୁମାନେ ସେବା ଠାରୁ ଦୂରେଇ ଯାଇ ଏବେ ହାକିମଗିରିକୁ ଆପଣାଇଛନ୍ତି l ରାଜ୍ୟ ସରକାର ଲୋକଙ୍କ ସେବା ପାଇଁ ଦିନରାତି ଏକ କରୁଥିବା ବେଳେ ବାବୁ କିନ୍ତୁ କାହାକୁ ଖାତିର କରୁନାହାନ୍ତି l ଯାହାର ଉଦାହରଣ ଦେଖିବାକୁ ମିଳିଛି ଢେଙ୍କାନାଳ ଜିଲ୍ଲା କୃଷି ବିଭାଗର ସହ ଅଧିକାରୀଙ୍କ ଠାରୁ l
ଭାରତୀୟ ଜନ ସଞ୍ଚାର ସଂସ୍ଥାନ ଆଇଆଇଏମସି ଢେଙ୍କାନାଳର ଛାତ୍ରଛାତ୍ରୀ ଖବର ସଂଗ୍ରହ କରିବାକୁ ଯାଇଥିବା ବେଳେ ଢେଙ୍କାନାଳ ସହକାରୀ ଜିଲ୍ଲା କୃଷି ଅଧିକାରୀ ଦୁର୍ବ୍ୟବହାର କରିଥିବା ଅଭିଯୋଗ ହୋଇଛି । ଦୁର୍ବ୍ୟବହାର ଏନେଇ ଛାତ୍ରମାନେ ଟାଉନ ଥାନାରେ ଲିଖିତ ଅଭିଯୋଗ କରିଛନ୍ତି । ସର୍ବଭାରତୀୟ ସ୍ତରରେ ପ୍ରତିଷ୍ଠିତ ସାମ୍ବାଦିକ ଶିକ୍ଷାନୁଷ୍ଠାନର ଛାତ୍ରଛାତ୍ରୀମାନଙ୍କୁ ଦୁର୍ବ୍ୟବହାର ଘଟଣା ଥାନାରେ ପହଞ୍ଚିବା ପୁରା ଓଡ଼ିଶାରେ ଚର୍ଚ୍ଚାର ବିଷୟ l ସମାଜର ଚତୁର୍ଥସ୍ତବକୁ ସରକାରୀ ଅଧିକାରୀଙ୍କ ଅସମ୍ମାନ ଜନ ଆକ୍ରୋଶର କାରଣ ସାଜିଛି l ଏନେଇ ପୁଲିସ ପ୍ରଶାସନ ସହକାରୀ ଜିଲ୍ଲା କୃଷି ଅଧିକାରୀ ମାର୍କଣ୍ଡ ପ୍ରଧାନଙ୍କୁ ଥାନାକୁ ଆଣି ପଚରାଉଚୁରା କରୁଛି ।
ଆଇଆଇଏମସିର କେତେଜଣ ଛାତ୍ରଛାତ୍ରୀ ଖବର ସଂଗ୍ରହ କରିବା ପାଇଁ ସୋମବାର ଜିଲ୍ଲା କୃଷି ଅଧିକାରୀଙ୍କ କାର୍ଯ୍ୟାଳୟକୁ ଯାଇଥିଲେ । ସହକାରୀ କୃଷି ଅଧିକାରୀ ଶ୍ରୀ ପ୍ରଧାନ ପ୍ରାୟ ଘଣ୍ଟାଏ କାଳ ଅପେକ୍ଷା କରାଇଥିଲେ । ପରେ ଖବର ସଂଗ୍ରହ କରିବାକୁ ଯାଇଥିବା ଛାତ୍ରଛାତ୍ରୀଙ୍କୁ ଦୁର୍ବ୍ୟବହାର କରିବା ସହ ମନଇଛା ଗାଳି ଦେଇଥିଲେ l ସାମ୍ବାଦିକ ଛାତ୍ରଛାତ୍ରୀ କେବଳ କୃଷି ବିଭାଗରେ ଖାଲି ପଡିଥିବା ପଦବୀ ସମ୍ପର୍କରେ ଜାଣିବାକୁ ପ୍ରଶ୍ନ କରିବାରୁ ବାବୁ ଏମିତି ରାଗିଯାଇଥିଲେ । ରାଗରେ ଓଡିଶାର ସାମ୍ବାଦିକତାକୁ ନେଇ ମଧ୍ୟ ଅଶ୍ଳୀଳ ଭାଷା କହିଥିଲେ । ଏହାସହ ପିଲାଙ୍କୁ ଚିହ୍ନି ରଖ କେବେ ଅଫିସକୁ ଛାଡିବ ନାହିଁ ବୋଲି କହିଥିଲେ l ଅଧିକାରୀ ମାନଙ୍କୁ ନାଲି ଆଖି ଦେଖାଇ ତାଗିତ କରିଥିଲେ। ଛାତ୍ରଛାତ୍ରୀମାନେ ଏନେଇ ଅଭିଯୋଗ କରିବାରୁ ପୁଲିସ ସହକାରୀ କୃଷି ଅଧିକାରୀ ଶ୍ରୀ ପ୍ରଧାନଙ୍କୁ ଥାନାକୁ ଡକାଇ ପଚରାଉଚୁରା ଚଳାଇଛି । ଢେଙ୍କାନାଳର ଏହି ଘଟଣା କୃଷି ଓ କୃଷକ ସଶକ୍ତିକରଣ ବିଭାଗର ବରିଷ୍ଠ ଅଧିକାରୀମାନଙ୍କ ପାଖରେ ପହଞ୍ଚିଛି l ଏବେ ଦେଖିବାର କଥା ଜିଲ୍ଲା ସ୍ତରରେ ଥିବା ଏପରି ହାକିମବାବୁଙ୍କ ବିରୋଧରେ ବିଭାଗ କି ପ୍ରକାର କାର୍ଯ୍ୟାନୁଷ୍ଠାନ ନେଉଛି l
