ପୁରୀ: ଜୁନ ୨୩ ତାରିଖ ଜଗତର ନାଥ ଜଗନ୍ନାଥଙ୍କର ବିଶ୍ୱ ପ୍ରସିଦ୍ଧ ରଥଯାତ୍ରା । ସେଥିପାଇଁ ରଥ ଖଳାରେ ଜୋରଦାର ଚାଲିଛି ରଥ ନିର୍ମାଣ କାମ । ଏଥର ୧୨ ଦିନ ବିଳମ୍ବରେ ରଥ ନିର୍ମାଣ କାମ ଆରମ୍ଭ ହୋଇଛି । ହେଲେ ମହାପ୍ରଭୁଙ୍କ ଆଶୀର୍ବାଦରୁ ଦ୍ରୁତ ଗତିରେ ରଥ ନିର୍ମାଣ କାର୍ଯ୍ୟ ଆଗେଇ ଚାଲିଛି। ଦିନରାତି ଏକ କରି ମହାରଣା ଓ ଭୋଇ ସେବାୟତମାନେ ରଥ ନିର୍ମାଣରେ ଲାଗିଛନ୍ତି । ରଥ ନିର୍ମାଣରେ ବୁଧବାର ଥିଲା ଷଷ୍ଠ ଦିନ । ଷଷ୍ଠ ଦିନ ସୁଦ୍ଧା ରଥର ୪୨ଚକ ଓ ତୁମ୍ବ ନିର୍ମାଣ ଶେଷ ହୋଇଛି। ୨୫ଟି ତୁମ୍ବ ବିଧି କାର୍ଯ୍ୟ ସରିଛି। ସେହିପରି ତିନି ରଥର ୬ଟି ଛଅଟି ଚକର ତଳି ବିନ୍ଧ କାମ ଶେଷ ହୋଇଛି। ସେଥିରେ କଳସା କରାଯାଇଛି । ଗୁଜ ,ଜଳମନ୍ତ୍ର ଓ କୁଦୁକା କାମ ଚାଲିଛି। ଆସନ୍ତା ୧୫ ତାରିଖ ଦିନ ମହାପ୍ରଭୁଙ୍କ ଚନ୍ଦନ ଯାତ୍ରାର ଭଉଁରୀ ପର୍ବ ଅବସରରେ ତିନି ରଥର ଦୁଇ ଦୁଇଟି ଚକରେ ଆଖ ସଂଯୋଗ କରାଯିବ। ଏ ନେଇ ବିଧି ଥିବାରୁ ମହାରଣା ଓ ଭୋଇ ସେବାୟତମାନେ କାମରେ ଲାଗିଯାଇଛନ୍ତି । ସେହିପରି ଶ୍ରୀ ମନ୍ଦିରର ଆଜ୍ଞା ମାଳ ବିଜେ କରାଯାଇ ଚକ ଅଖ ଯୋଡ଼ା ନୀତି କରାଯିବ।ଅନ୍ୟପକ୍ଷରେ କୋଭିଡ ୧୯କୁ ଦୃଷ୍ଟିରେ ରଖି ଶ୍ରୀ ମନ୍ଦିର ପ୍ରଶାସନ ନିଷ୍ପତ୍ତି ଅନୁସାରେ ବୁଧବାର ନିୟୋଜିତ ସେବାୟତମାନଙ୍କ ମଧ୍ୟରୁ ୫୫ ଜଣଙ୍କ ସ୍ୱାବ ନମୁନା ପରୀକ୍ଷା ପାଇଁ ପଠା ଯାଇଛି । ଏହାସହ ସେମାନଙ୍କୁ ଆଇସଲେସନ ରଖିବା ସହ ସେମାନଙ୍କ ଖାଦ୍ୟ ବ୍ୟବସ୍ଥା କାରାଯାଇଛି । ସବୁଠାରୁ ବଡ଼ କଥା ହେଉଛି ବିଶ୍ୱ ପ୍ରସିଦ୍ଧ ରଥଯାତ୍ରା ପାଇଁ ପ୍ରଶାସନିକ ସ୍ତରରେ ସବୁ ପ୍ରସ୍ତୁତି ଜୋରରେ ଚାଲିଛି ।ସେବାୟତମାନେ ମଧ୍ୟ ଏହାକୁ ପୂର୍ଣ୍ଣ ସହଯୋଗ କରୁଛନ୍ତି। ଏଥିପାଇଁ ଆଶା କରାଯାଉଛି ଡେରିରେ ଆରମ୍ଭ ହୋଇଥିବା କାମ ମଧ୍ୟ ନିର୍ଦ୍ଧାରିତ ସମୟରେ ସରିବ । ସାଧାରଣ ଭାବେ ରଥ ନିର୍ମାଣ ପାଇଁ ୫୮ ଦିନ ଆବଶ୍ୟକ । ପବିତ୍ର ଅକ୍ଷୟ ତୃତୀୟା ଠାରୁ ନେତ୍ର ଉତ୍ସବ ପର୍ଯ୍ୟନ୍ତ ରଥ କାମ ହୋଇଥାଏ। ହେଲେ ଏଥର ୧୨ ଦିନ କାମ ବିଳମ୍ବ ହୋଇଛି ।ଏଣୁ ଶ୍ରୀମନ୍ଦିର ମୁଖ୍ୟ ପ୍ରସାଶକ ସେବାୟତ ମାନଙ୍କ ସହ ସମନ୍ୱୟ କିପରି ରଥ କାମକୁ ଯୁଦ୍ଧ କାଳୀନ ଭିତ୍ତିରେ ଶେଷ କାରାଯିବ ଏବଂ ହାଇକୋର୍ଟର ନିର୍ଦ୍ଦେଶକୁ ପାଳନ ହେବ ତାକୁ ଗୁରୁତ୍ୱ ଦେଇଛନ୍ତି ।ମୁଖ୍ୟତଃ କୋଭିଡ 19କୁ ଦୃଷ୍ଟିରେ ରଖି ସେବାୟତଙ୍କ ସୁରକ୍ଷାକୁ ପ୍ରାଥମିକତା ଦେଇଛି ମନ୍ଦିର ପ୍ରଶାସନ ।
