ଭୁବନେଶ୍ୱର : କଥାରେ ଅଛି ରାଜନୀତି ପାଣି ଭାରୀଗୋଳିଅା । କେତେବେଳେ କଣ ହୁଏ ତାହା ଜାଣିବା ମୁସକିଲ । ସ୍ୱାର୍ଥ ପାଇଁ ଶୃଙ୍ଖଳା ଓ ନୀତି ଅାଦର୍ଶ ସବୁ ଫିକା । ଯାହା ଏବେ ଓଡ଼ିଶା ରାଜନୀତିରେ ଦେଖିବାକୁ ମିଳୁଛି । ବିଭିନ୍ନ ପ୍ରସଙ୍ଗରେ ଦଳ ଗୋଟେ କଥା କହୁଛି ଓ ଦଳର ନେତାମାନେ ଅନ୍ୟକଥା କହୁଛନ୍ତି । ବିରୋଧୀ ଓ ଶାସକ ଦଳର ପ୍ରମୁଖ ନେତାମାନେ ଏହି ନୀତିକୁ ଅାପଣାଇଛନ୍ତି । ଯାହା ଏବେ ଦଳର ମୁଖିଆଙ୍କୁ ଟେନସନ ଦେଉଛି । ଲାଗୁଛି ଯେମିତି ଦଳ ରାସ୍ତାରେ ଯିବାକୁ ଚାହୁନାହାନ୍ତି ନେତାଏଁ। ଗଣମାଧ୍ୟମ ଅାଗରେ ଦଳ ଗୋଟେ ବୟାନ ରଖୁଥିବା ବେଳେ ଏହା ପୂର୍ବରୁ କିଛି ନେତା ଅନ୍ୟ ଗୋଟେ ବୟାନ ରଖୁଛନ୍ତି । ଫଳରେ ବହୁ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଦଳର ପ୍ରକୃତ ମତ କଣ ତାହା ଜଣାପଡୁନାହିଁ । ଯଦି ରାଜ୍ୟର ଦୁଇଟି ବଡ଼ ପ୍ରସଙ୍ଗ କଥା ବଚାର କରାଯାଏ ସେଥିରୁ ଏହା ସ୍ପଷ୍ଟ ହୋଇଛି । ମାସ୍କଦୁନୀର୍ତି ହେଉ ଅବା ରଥଯାତ୍ରା ପ୍ରସଙ୍ଗ ହେଉ ରାଜ୍ୟର ମୁଖ୍ୟ ବିରୋଧୀ ବିଜେପି ଓ କଂଗ୍ରେସ ଦଳ ଗୋଟେ କଥା କହୁଥିବା ବେଳେ ଦଳର କିଛି ନେତା ଅାଉଗୋଟେ କଥା କହୁଛନ୍ତି । ସେହିପରି ଶାସକ ଦଳର ନେତାମାନେ ବି ଦଳର ମତ ନ ନେଇ ଗଣମାଧ୍ୟମରେ ନିଜର ପ୍ରତିକ୍ରିୟା ରଖୁଛନ୍ତି । ରଥଯାତ୍ରା ନେଇ ସୁପ୍ରିମକୋର୍ଟ ଯେଉଁ ନିଷ୍ପତିି ଦେଇଛନ୍ତି ତାହାକୁ ରାଜ୍ୟ ବିଜେପି ସଭାପତି ସ୍ୱାଗତ କରିଥିବା ବେଳେ ବିରୋଧି ଦଳ ନେତା ଓ ଦଳର ବରିଷ୍ଠ ନେତା ବିଜୟ ମହାପାତ୍ରଙ୍କ ମତ କିନ୍ତୁ ଭିନ୍ନ । ସବୁଠାରୁ ବିଡ଼ମ୍ବନାର ବିଷୟ ହେଉଛି ଏହି ଦୁଇ ନେତା ଅଭିଜ୍ଞ ଓ ଦଳ କିପରି ଚାଲେ ଓ ବିଭିନ୍ନ ପ୍ରସଙ୍ଗରେ କେମିତି ମତ ଦେଇହୁଏ ତାହା ସେମାନଙ୍କୁ ଜଣା । ସେହିପରି ରଥ ପ୍ରସଙ୍ଗରେ ବିଜେଡ଼ି କୌଣସି ନେତା ମତ ଦେବେ ନାହିଁ ବୋଲି ଦଳ କହିଥିବା ବେଳେ ଦଳର ବରିଷ୍ଠ ନେତା ତଥା ଉପସଭାପତି ଦେବୀ ମିଶ୍ର କିନ୍ତୁ ଗଣମାଧ୍ୟମ ଅାଗରେ ନିଜର ମତ ରଖିଛନ୍ତି । ସେପଟେ କଂଗ୍ରେସ କଥା ନ କହିବା ଭଲ । କଂଗ୍ରେସରେ ଗୋଟିଏ ପ୍ରସଙ୍ଗରେ ବହୁନେତା ଭିନ୍ନଭିନ୍ନ ମତ ଦେଉଛନ୍ତି । ପିସିସି ସଭାପତି ଗୋଟେ କଥା କହୁଥିବା ବେଳେ ଦଳର ବିଧାୟକମାନେ ଭିନ୍ନ କଥା କହୁଛନ୍ତି । ଏପରି ସ୍ଥିତିରେ କେଉଁଟା ଦଳ ମତ ଓ କେଉଁଟା ନେତାଙ୍କ ମତ ତାହା ଜଣାପଡୁନାହିଁ । ଯାହାକି ସାଧାରଣ ଜନତାଙ୍କ ଦ୍ବନ୍ଦରେ ପକଉଛି।
