ଭୁବନେଶ୍ୱର : ମାର୍ଚ୍ଚ ୧୫ ରାଜ୍ୟରେ ପ୍ରଥମ କରୋନା ରୋଗୀ ଚିହ୍ନଟ ହେଲା । ଏହାପରେ କରୋନା ସଂକ୍ରମଣକୁ ରାଜ୍ୟରେ ରୋକିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆରମ୍ଭ କଲେ ରଣନୀତି। ଅଧାରୁ ବିଧାନସଭାର ବଜେଟ ଅଧିବେଶନକୁ ବନ୍ଦ କରି କରୋନା ପାଇଁ ହାତ ଧୋଇବା ଓ ମାସ୍କ ପିନ୍ଧିବା ବାଧ୍ୟତାମୂଳକ କରିଥିଲେ। ଏମିତି କି ଦେଶରେ ଲକ୍ ଡାଉନ ହେବା ପୂର୍ବରୁ ରାଜ୍ୟରେ ଲକ୍ ଡାଉନ ଘୋଷଣା କରିଥିଲେ। ଏମିତି ଅନେକ ପଦକ୍ଷେପ ହାତକୁ ନେଇଥିଲେ ରାଜ୍ୟ ସରକାର। ସ୍ଵତନ୍ତ୍ର କୋଭିଡ ହସ୍ପିଟାଲ କରି ଦେଶ ପାଇଁ ଉଦାହରଣ ସାଜିଲେ। ଏହାପରେ ଗୋଟିଏ ପରେ ଗୋଟିଏ ବଡ଼ ପଦକ୍ଷେପ ଗ୍ରହଣ କଲେ ନବୀନ। ଫଳରେ କରୋନା ମୁକାବିଲାରେ ଓଡିଶା ଅନ୍ତର୍ଜାତୀୟ ସ୍ତରରେ ଚର୍ଚ୍ଚାକୁ ଆସିଲା। ଏବେ ଅଗଷ୍ଟ ମାସରେ ରାଜ୍ୟ ତଥା ଦେଶରେ କରୋନା ପିକରେ ପହଂଚିଛି । ଦୈନିକ ସଂକ୍ରମଣ ଓ ମୃତ୍ୟୁ ହାର ମଧ୍ୟ ବଢୁଛି। କରୋନାକୁ ନିୟନ୍ତ୍ରଣ କରିବା ପାଇଁ ମୁଖ୍ୟମନ୍ତ୍ରୀଙ୍କ ଠାରୁ ଆରମ୍ଭ କରି ପୁରା ପ୍ରଶାସନ କଳ ଦିନ ରାତି ଏକ କରି କାମ କରୁଛନ୍ତି। ଲକ୍ଷ ଲୋକଙ୍କ ଜୀବନ ବଞ୍ଚାଇବା । କାରଣ ମୁଖ୍ୟମନ୍ତ୍ରୀ ଆହ୍ୱାନ କରିଥିଲେ ଆମ ପାଇଁ ଅର୍ଥନୀତି ନୁହେଁ ଲୋକଙ୍କ ଜୀବନ ବଡ଼। ଆଉ ସେଇ ଅନୁଶାରେ ରାଜ୍ୟ ସରକାର କାମ କରୁଛନ୍ତି ।ଏପରି ଏକ ମହାମାରୀ ପ୍ରଥମ ଥର ପାଇଁ ସାମ୍ନା କରୁଛନ୍ତି ସରକାର। ଏ ମହାମାରୀରେ ରାଜ୍ୟ ସରକାରଙ୍କୁ ପୁରା ସହଯୋଗ କରିବା ପାଇଁ ମୁଖ୍ୟ ବିରୋଧୀ ଦଳ ବିଜେପି ଓ କଂଗ୍ରେସ ଗଣମାଧ୍ୟମରେ ବାରମ୍ବାର ବୟାନ ଦେଉଥିଲେ। ହେଲେ କରୋନା ଯେତେବେଳେ ତାର କାୟା ବିସ୍ତାର କରୁଛି ସେତେବେଳେ ପ୍ରତେକ ଦିନ ସରକାରଙ୍କୁ ସମାଲୋଚନା କରିବା ପାଇଁ ପଛାଉ ନାହାନ୍ତି ବିରୋଧୀ। ବିରୋଧୀ ପ୍ରଶ୍ନ ଉଠାଇବା ବା ସମାଲୋଚନା କରିବା ତାଙ୍କର ପୂର୍ଣ୍ଣ ଅଧିକାର ରହିଛି । ହେଲେ ରାଜନୀତି ପାଇଁ ଯେଉଁ ଭଳି ଭାବେ ଉଭୟ ଦଳ ରାଜ୍ୟ ସରକାରଙ୍କୁ କାଠ ଗଡାକୁ ଟାଣୁଛନ୍ତି ତାକୁ ନେଇ ଉଠିଛି ପ୍ରଶ୍ନ । ବିଶେଷ କରି ମୁଖ୍ୟ ବିରୋଧୀ ବିଜେପି କରୋନା ମୁକାବିଲାରେ ରାଜ୍ୟ ସରକାର ଫେଲ ବୋଲି ପ୍ରମାଣିତ କରିବା ପାଇଁ ପ୍ରତେକ ଦିନ ନୂଆ ନୂଆ ଅଭିଯୋଗ ଆଣୁଛି। ଏପରି କି ରାଜ୍ୟ ପାରୁନି କେନ୍ଦ୍ରର ସହଯୋଗ ନେଉ ବୋଲି ଦାବି କଲାଣି ବିଜେପି। ସାରା ଦେଶରେ ଓଡ଼ିଶା କରୋନା ମୁକାବିଲା ଏକ ନମ୍ବର ବୋଲି କେନ୍ଦ୍ରୀୟ ନେତୃତ୍ୱ ମଧ୍ୟ ସ୍ୱୀକାର କରିଛନ୍ତି। ହେଲେ ରାଜ୍ୟ ବିଜେପିକୁ ଏହା ହଜମ ହେଉ ନାହିଁ। କାଳେ କରୋନା ମୁକାବିଲାର ସମସ୍ତ ରାଜ୍ୟ ସରକାର ନେଇ ଯିବେ ସେଥିପାଇଁ ବିରୋଧୀ ଏବେ ସରକାରଙ୍କ ଗୋଡ ଟାଣିବାରେ ଲାଗିଛନ୍ତି ବୋଲି ସାଧାରଣରେ ଚର୍ଚ୍ଚା ହେଉଛି ।
