ଭୁବନେଶ୍ୱର :ଦେଶ ପାଇଁ ପୁଣି ଥରେ ଉଦାହରଣ ସାଜିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ l ପ୍ରଥମ ଥର ପାଇଁ ଜନ ବିରୋଧୀ କାମ ପାଇଁ ନିଜ ଦଳର ଜନ ପ୍ରତିନିଧିଙ୍କୁ ଦଳରୁ ବିଦା କରିଛନ୍ତି l ନିଜର ଶାସନ ମୂଳମନ୍ତ୍ର ଲୋକ ସେବା ହେଇଥିବାରୁ ନବୀନଙ୍କ ଏପରି ନିଷ୍ପତି ପୁଣି ଦେଶକୁ ଚମକାଇଦେଇଛି l ସ୍ୱଚ୍ଛ ଓ ନିର୍ମଳ ଭାବମୂର୍ତ୍ତି ପାଇଁ 5ଥର ମୁଖମନ୍ତ୍ରୀ ହୋଇ ଦେଶରେ ନବୀନ ଏକ ସ୍ୱତନ୍ତ୍ର ପରିଚୟ ପାଇଥିବା ବେଳେ ଦୁର୍ନୀତି ବିରୋଧରେ ତାଙ୍କର ପଦକ୍ଷେପ ସବୁବେଳେ ଚର୍ଚ୍ଚାରେ ରହିଥାଏ l ହେଲେ ପ୍ରଥମ ଥର ଦେଖାଗଲା ଯେ ଦୁର୍ନୀତି ଅଭିଯୋଗ ନୁହେଁ, ବରଂ ଜନ ବିରୋଧୀ କାର୍ଯ୍ୟ ପାଇଁ ନିଜ ଦଳର 3ଥର ବିଧାୟକ ହୋଇଥିବା ଓ ପୂର୍ବତନ ମନ୍ତ୍ରୀ ପ୍ରଦୀପ ପ୍ରାଣିଗ୍ରାହୀଙ୍କୁ ନବୀନବିଜେଡିରୁ ବହିସ୍କୃତ କରିଛନ୍ତି l ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀ ଙ୍କୁ ଦଳ ଜନ ବିରୋଧୀ କାର୍ଯ୍ୟ ଅଭିଯୋଗରେ ବହିସ୍କୃତ କରାଯାଇଛି ବୋଲି ପ୍ରେସ ନୋଟରେ ଅବଗତ କରାଇଛି ।
ତେବେ ନଜର ପକାନ୍ତୁ କାହିଁକି ଗିରଫ ହେଲେ ପ୍ରଦୀପ..
ଗିରଫ ଆଇଏଫଏସ ଅଭୟକାନ୍ତ ପାଠକ ଓ ତାଙ୍କ ପୁଅ ଆକାଶ ପାଠକଙ୍କ ଦୁର୍ନୀତିରେ ସହଯୋଗ କରିଥିବା ଅଭିଯୋଗରେ ପ୍ରଦୀପଙ୍କୁ ବହିଷ୍କାର କରିଛନ୍ତି ଦଳର ସଭାପତି ନବୀନ ପଟ୍ଟନାୟକ । ପୂର୍ବତନ ମନ୍ତ୍ରୀ ତଥା ବିଧାୟକ ପ୍ରଦୀପ ପାଣିଗ୍ରାହୀଙ୍କ ସମର୍ଥନ ତାଙ୍କର ଭାବି ଜାମାତା ହେଲେ ଗିରଫ ଆଇଏଫଏସ୍ ଅଭୟକାନ୍ତ ପାଠକଙ୍କ ପୁଅ ଆକାଶ ପାଠକ । ଆୟ ବହିର୍ଭୁତ ସଂପତ୍ତି ଠୁଳ ଅଭିଯୋଗରେ ଦୁହେଁ ଏବେ ଭୁବନେଶ୍ୱରର ଝାରପଡ଼ା ଜେଲରେ ଥିବା ବେଳେ କଳାକାରନାମା ସମ୍ପର୍କିତ ଦସ୍ତାବିଜ ଏବେ ଭାଇରାଲ ହେଉଛି । ଏଥିରେ ଗୋପାଳପୁର ଟାଟା ପ୍ରକଳ୍ପ ପାଇଁ ବିସ୍ଥାପିତ ହୋଇଥିବା ଲୋକଙ୍କ ସର୍ବସ୍ୱାନ୍ତ ହେବାର କରୁଣ କାହାଣୀ । ଆକାଶ ପାଠକ ନିଜକୁ ଟାଟା ପାସେଞ୍ଜର ଡିଭିଜନର ଏମଡି ବୋଲି ମିଛ ପ୍ରଚାର କରୁଥିଲେ । ଆଉ ଟାଟା କଂପାନୀରେ ଚାକିର କରାଇ ଦେବାକୁ କହି, ମିଛ ଆପଏଣ୍ଟମେଣ୍ଟ ଲେଟର ଦେଇ ଲୁଟିଥିଲେ ଗୋପାଳପୁର ଟାଟା ପ୍ରକଳ୍ପ ଅଞ୍ଚଳର ନୀରିହ ଓ ବାସଚ୍ୟୁତ ଲୋକଙ୍କୁ । ଏହି ଲୋକମାନେ କ୍ଷତିପୂରଣ ଆକାରରେ ପାଇଥିବା ଟଙ୍କା ଉତ୍କୋଚ ଆକାରରେ ଦେଇଦେଇଥିଲେ ଆକାଶଙ୍କୁ । ଆଶା ଥିଲା, ଚାକିରି ଖଣ୍ଡେ ମିଳିଲେ ଜୀବନ ଜୀବୀକା ଚଳିବ । ଟଙ୍କା ଗଲା କିନ୍ତୁ ଚାକିରି ମିଳିନାଲି।ଚାକିରି ନପାଇବାରୁ ଏହି ଲୋକମାନେ ଆଇନର ଆଶ୍ରୟ ନେବାକୁ ଉଦ୍ୟମ କରିଛନ୍ତି । ହେଲେ, ବିଡମ୍ବନାର ବିଷୟ ହେଲା ଗୋପାଳପୁରର ପ୍ରଭାବଶାଳୀ ବିଧାୟକ ଡକ୍ଟର ପ୍ରଦୀପ ପାଣିଗ୍ରାହୀଙ୍କର ଭାବି ଜାମାତା ହୋଇଥିବାରୁ ଆକାଶଙ୍କ ବିରୋଧରେ ହେଉନଥିଲା ମାମଲା । ଆକାଶଙ୍କ ଟଙ୍କା ଲୁଟି ଘଟଣାରେ ପରୋକ୍ଷରେ ସେ ବି ସହାୟତା କରିଥିବା ଆଲୋଚନା ହେଉଛି । ଆକାଶ ଯେ, ଟାଟା କଂପାନୀରେ କୌଣସି ଚାକିରି କରନ୍ତି ନାହିଁ ଏ ନେଇ ଖୋଦ୍ ଟାଟା କଂପାନୀ ପକ୍ଷରୁ କ୍ରାଇମବ୍ରାଞ୍ଚରେ ଅଭିଯୋଗ କରାଯାଇଥିଲା । ଆକାଶ ଟାଟା ଗ୍ରୁପର ଫେକ୍ ଲେଟର ହେଡ୍ ଓ ମିଛ ଫଏଲ୍ ନମ୍ବର, ତାରିଫ ବ୍ୟବହାର କରି ୬୮ ଜଣଙ୍କୁ ଅଫର ଲେଟର ଦେଇଛନ୍ତି । ୨୦୨୦ ଏପ୍ରିଲ 1 ତାରିଖରୁ 15 ତାରିଖ ମଧ୍ୟରେ ବିଭିନ୍ନ ଲୋକଙ୍କୁ ଦିଆଯାଇଛି ଅଫର ଲେଟର । ଗୁରୁତ୍ୱପୂର୍ଣ୍ଣ କଥା ହେଲା ଏ ମଧ୍ୟରୁ ଜଣେ ବ୍ୟକ୍ତିଙ୍କୁ ଅଫର ଲେଟର ଦିଆଯାଇଛି ଯାହାଙ୍କ ଘର ହେଉଛି ଗଞ୍ଜାମ ବ୍ରହ୍ମପୁର ବାଦପୁରର ସୁନ୍ଧିଗାଁରେ । ଏହି ଅଞ୍ଚଳରେ ରହିଛି ବିଧାୟକ ପ୍ରଦୀପ ପାଣିଗ୍ରାହୀଙ୍କର ଘର । ଡିସେମ୍ବର ୧୫ ତାରିଖରେ ବିଧାୟକ ପ୍ରଦୀପ ପାଣିଗ୍ରାହୀଙ୍କ ଝିଅଙ୍କ ସହ ଆକାଶଙ୍କର ବାହାଘର ଭୋଜି ହୋଇଥାନ୍ତା । ସେଥିପାଇଁ ବିଧାୟକ ଜଣଙ୍କ ଆକାଶଙ୍କୁ ସବୁ ସମୟରେ ସୁରକ୍ଷା ଦେଉଥିବା ଅଭିଯୋଗ ହୋଇଛି ।
ତେବେ ଦଳରୁ ବିଦା ହେବା ପରେ କଣ କହିଲେ ପ୍ରଦୀପ..
ମୁଁ କୌଣସି ଜନ ବିରୋଧୀ କାର୍ଯ୍ୟ କରିନାହିଁ ବୋଲି କହିଛନ୍ତି । ଦଳ ତରଫରୁ ଯେଉଁ କାର୍ଯ୍ୟ ଦିଆଯାଇଛି ତାକୁ କରିଛି ବୋଲି କହିଛନ୍ତି ପ୍ରଦୀପ । ଦଳୀୟ ପ୍ରାଥୀଙ୍କୁ ଜିତାଇବାରେ ତାଙ୍କର ଭୂମିକା ବି ସେ ବର୍ଣ୍ଣନା କରିଥିଲେ ପ୍ରେସ ମିଟ ରେ l ଏହା ସହ ବିଜେଡି ଶାସନର କିଛି କଥା ବି ଉଲ୍ଲେଖ କରିଥିଲେ l
ତେବେ ଦିନ 10ଟାରୁ ପୁରା ଦିନସାରା ପ୍ରଦୀପ ପ୍ରାଣିଗ୍ରାହୀ ଚର୍ଚାରେ ରହିଥିଲେ l ପୂର୍ବରୁ ବିଜେଡିରୁ ପ୍ରଫୁଲ ଘଡ଼ାଇ, ଦାମ ରାଉତ, ବୈଜୟନ୍ତ ପଣ୍ଡା ବହିଷ୍କୃତ ହୋଇଛନ୍ତି l ତେବେ ଏଥର କିନ୍ତୁ ପ୍ରଦୀପ ଦଳ ବିରୋଧି କି ଦୁର୍ନୀତି ନୁହେଁ, ଜନ ବିରୋଧୀ କାର୍ଯ୍ୟ ପାଇଁ ବିଜେଡିରୁ ବିଦା ହୋଇଛନ୍ତି l ଆଉ ନବୀନଙ୍କ ଏହି ନିଷ୍ପତି ଏବେ ପୁରା ଦେଶକୁ ଚମକାଇ ଦେଇଛି l
