() ଭାରତକୁ ନିଶା ମୁକ୍ତ କରିବାକୁ ସଚେତନତାର ବାର୍ତ୍ତା ନେଇ ସାଇକେଲରେ ବୁଲୁଛନ୍ତି ଅମନଦୀପ୍ । ଇଛାଶକ୍ତି ଆଗରେ ହାର୍ ମାନିଛି ବୟସ । ଏ ହେଉଛନ୍ତି ୬୨ ବର୍ଷୀୟ ଅମନ୍ ଦୀପ୍ ସିଂ ଘର ବେଙ୍ଗାଲୁରୁର ଚିକ୍କାତିରୁପତି ଠାରେ । ଗତ ୨୦୦୮ ମସିହା ଜାନୁଆରୀ ପହିଲାରୁ ସାଇକେଲ ଧରି ବାହାରିଛନ୍ତି ଏକ ଜନ ସଚେତନ ବାର୍ତ୍ତା ନେଇ । ନିଶା ମୁକ୍ତ ଭାରତ ଗଠନ ବାର୍ତ୍ତା ନେଇ ବୁଲୁଛନ୍ତି ପ୍ରତ୍ୟେକ ରାଜ୍ୟ। ଏହି ପରିପ୍ରେକ୍ଷୀରେ ସେ ଭ୍ରମଣ କରି ସାରିଲେଣି ୨୬ ରୁ ଅଧିକ ରାଜ୍ୟ। ତା ସହିତ ଅତିକ୍ରମ କଲେଣି ୨ଲକ୍ଷ ୮୦ ହଜାର ରୁ ଅଧିକ କିଲୋମିଟର ବାଟ। ଦୀର୍ଘ ୧୪ ବର୍ଷରୁ ଉର୍ଦ୍ଧ୍ବ ଦିନ ମଧ୍ୟରେ ସେ ସାଇକେଲ୍ ର ୫୦ରୁ ଉର୍ଦ୍ଧ୍ବ ଟାୟାର୍ ଓ ପାଖାପାଖି ୭୦ ଟି ଟ୍ଯୁବ୍ ବଦଳାଇ ସାରିଲେଣି। ଏଥିସହିତ ପାୟ ୬ଲକ୍ଷରୁ ଉର୍ଦ୍ଧ୍ବ ଟଙ୍କା ଖର୍ଚ୍ଚ କରି ସାରିଲେଣି ଏହି ଅଭିଯାନ ପାଇଁ। ତାଙ୍କ ସହ ଆଲୋଚନା ମାଧ୍ୟମରେ ଶ୍ରୀ ସିଂ କହିଛନ୍ତି, ୨୦୦୭ ମସିହାରେ ତାଙ୍କର ଜଣେ ସମ୍ପର୍କିୟଙ୍କର ମଦ ଓ ଅତ୍ଯାଧିକ ନିଶା କାରଣରୁ ମୃତ୍ୟୁ ଘଟିଥିଲା। ସେହି ଘଟଣା ତାଙ୍କୁ ବିଚଳିତ କରିଥିଲା । ତେଣୁ ସେ ନିଶା ନିବାରଣ ସମ୍ପର୍କରେ ଭାରତ ବର୍ଷର ଜନ ସାଧାରଣଙ୍କୁ ଅବଗତ କରିବା ପାଇଁ ସଂକଳ୍ପ ନେଇଥିଲେ। ତେଣୁ ଦୀର୍ଘ ୧୪ ବର୍ଷ ହେବ ବୁଲୁଛନ୍ତି ସବୁ ରାଜ୍ୟ। ଏହି କ୍ରମରେ ସେ ଆଜି ପହଞ୍ଚିଥିଲେ ଯାଜପୁର ଜିଲ୍ଲା ପାଣିକୋଇଲି ଛକରେ। ସେଠାରେ ଓଭରବ୍ରିଜ ତଳେ ଛାଇରେ କ୍ଳାନ୍ତି ମେଣ୍ଟାଉଥିବା ସମୟରେ ତାଙ୍କ ସହିତ ଆଲୋଚନା କରିଥିଲେ ଆମ ପ୍ରତିନିଧି। ପ୍ରତିଦିନ ଭୋର ୫ଟା ରୁ ସନ୍ଧ୍ୟା ୫ଟା ପର୍ଯ୍ୟନ୍ତ ସାଇକେଲ ଚଳାନ୍ତି ଓ ସନ୍ଧ୍ୟା ସମୟରେ କୌଣସି ମନ୍ଦିର କିମ୍ବା ଗୁରୁଦ୍ବାରା ନିକଟରେ ନିଜେ ରଖିଥିବା ରୋଷେଇ ସାମଗ୍ରୀ କାଢି ଖାଦ୍ୟ ପ୍ରସ୍ତୁତ କରି ଖାଇ ଶୋଇ ପଡନ୍ତି ।ପୁଣି ପରଦିନ ସକାଳୁ ନିତ୍ଯକର୍ମ ସାରି ବାହାରି ପଡୁଥିବା କହିଛନ୍ତି ଅମନଦୀପ୍ ।
