ବାଲେଶ୍ବର : ରାଜ୍ୟରେ ଅକାଳରେ ଦୁଇ ଜଣ ବିଧାୟକଙ୍କର ମୃତ୍ୟୁ ହୋଇଛି। ଫଳରେ ବାଲେଶ୍ବର ସଦର ଓ ତିର୍ତ୍ତଲ ବିଧାନସଭା ଆସନ ଏବେ ଫାଙ୍କା ପଡିଛି। ନିୟମ ଅନୁସାରେ ସେଠାରେ ୬ ମାସ ମଧ୍ୟରେ ଉପ ନିର୍ବାଚନ ହେବ। ସେଥିପାଇଁ ରାଜ୍ୟର ତିନି ପ୍ରମୁଖ ଦଳ ପାଗ ଭିଡ଼ିଲେଣି। ହେଲେ ଏହି ପାଗ ଭିଡାରେ କଂଗ୍ରେସ ଆଗରେ ଥିବାର ଅନୁମାନ କରାଯାଉଛି। କାରଣ ବାଲେଶ୍ବର ସଦର ନିର୍ବାଚନ ମଣ୍ଡଳୀ ପାଇଁ ନବଜ୍ୟୋତି ପଟ୍ଟନାୟକଙ୍କ ନାମ ଏବେ ସାମ୍ନାକୁ ଆସିଛି। ଏହା ଖୋଦ ଉପନିର୍ବାଚନ ଦାୟିତ୍ୱରେ ଥିବା ତାରା ବାହିନୀ ପତି କହିଛନ୍ତି।
୨୦୧୯ ସାଧାରଣ ନିର୍ବାଚନରେ ନବ ଜ୍ୟୋତି ପଟ୍ଟନାୟକ ସାଂସଦ ପ୍ରାର୍ଥୀ ଭାବେ ବାଲେଶ୍ବର ଲୋକସଭାରୁ ଲଢ଼ିଥିଲେ। ତେଣୁ ସମସ୍ତଙ୍କର ପ୍ରଥମ ପସନ୍ଦ ନବ ଜ୍ୟୋତି ପଟ୍ଟନାୟକ ବୋଲି ତାରା କହିଛନ୍ତି। ଆଉ ମଧ୍ୟ ସେ କହିଛନ୍ତି ସେଠାକାର ସ୍ଥାନୀୟ ସରପଞ୍ଚ ଓ ଜିଲ୍ଲାର କିଛି ନେତା ଆସି ନବଜ୍ୟୋତିଙ୍କୁ ପ୍ରାର୍ଥୀ କରିବାକୁ ତାଙ୍କୁ ମତ ଦେଇଛନ୍ତି।ସେ ବିଧାୟକ ପ୍ରାର୍ଥୀ ହେଲେ ବିଜେଡି ଓ ବିଜେପିକୁ କଡା ଟକର ଦେଇ ପାରିବ କଂଗ୍ରେସ। ଏହି ବିଷୟରେ ସେ ପିସିସି ସଭାପତିଙ୍କ ସହ ଆଲୋଚନା କରିବେ ବୋଲି ମଧ୍ୟ କହିଛନ୍ତି।
