କରଂଜିଆର ଗେରୁଆ ଗଡ଼କୁ କବଜା କଲା ବିଜେଡି
* ମୟୁରଭଞ୍ଜର ଲୋକେ ପୁଣି ନବୀନଙ୍କ ଉପରେ କଲେ ଭରସା
* ନିର୍ବାଚନକୁ ୨ ବର୍ଷ ନପୁରୁଣୁ ବିଜେଡିରେ ମିଶିଲେ ମୟୁରଭଞ୍ଜର ଶତାଧିକ ବିଜେପି କର୍ମୀ
* ସଂଗଠନ ସଂପାଦକ ପ୍ରଣବ ପ୍ରକାଶଙ୍କ ଉପସ୍ଥିତିରେ ବିଜେଡିରେ ମିଶିଲେ
ଭୁବନେଶ୍ୱର : ବିଜେପିର ଗଡ଼ କୁହାଯାଉଥିବା ମୟୁରଭଞ୍ଜରେ ଦଳର ସଂଗଠନ ଭାଂଗିବାରେ ଲାଗିଛି। ଯେଉଁ ଜିଲ୍ଲାରୁ ବିଜେପିର ଜଣେ ସାଂସଦ ଓ ୬ ଜଣ ବିଧାୟକ ଅଛନ୍ତି ସେହି ଜିଲ୍ଲାରୁ ଶତାଧିକ ବିଜେପି ନେତା ଓ କର୍ମୀ ଆଜି ଦଳ ଛାଡିଛନ୍ତି। କରଂଜିଆରେ ବିଜେପି ଓ କଂଗ୍ରେସର ଶହେରୁ ଅଧିକ ନେତା ଓ କର୍ମୀ ଆଜି ବିଜେଡିରେ ସାମିଲ ହୋଇଛନ୍ତି। ମୁଖ୍ଯମନ୍ତ୍ରୀ ନବୀନ ପଟ୍ଟନାୟକଙ୍କ ନୀତି ଆଦର୍ଶ ଓ ବିଭିନ୍ନ ଉନ୍ନୟନମୂଳକ ଯୋଜନାରେ ଅନୁପ୍ରାଣିତ ହୋଇ ସେମାନେ ବିଜେଡିରେ ମିଶିଥିବା କହିଛନ୍ତି।
କରଂଜିଆ ଏନଏସିର ପୂର୍ବତନ ଅଧ୍ଯକ୍ଷ ତଥା ମଣ୍ଡଳ ସଭାପତି ଗିରିଧର ପ୍ରୁଷ୍ଟିଙ୍କ ନେତ୍ରୁତ୍ବରେ ଶତାଧିକ ବିଜେପି କର୍ମୀ ବିଜେଡିରେ ପାର୍ଟି ଅଫିସରେ ସାମିଲ ହୋଇଥିଲେ। ୨୦୧୯ ନିର୍ବାଚନରେ ବିଜେଡି ମୋରଡା,କରଂଜିଆ ଓ ବାଂଗିରିପୋଷି ବିଧାନସଭା ଆସନ ଜିତିଥିବା ବେଳେ ବିଜେପି ୬ଟି ଆସନ ଜିତିଥିଲା। ଏବେ ବିଜେପି ଗଡ଼ରେ ଧସେଇ ପସିବା ପଛରେ ଦଳର ସଂଗଠନିକ ସଂପାଦକ ପ୍ରଣବ ପ୍ରକାଶ ଦାସଙ୍କର ଗୁରୁତ୍ବପୂର୍ଣ୍ଣ ଭୂମିକା ରହିଛି। ସଂଗଠନକୁ ଆହୁରି ସୁଦ୍ରୁଢ କରିବା ସହିତ ଲୋକଙ୍କ ପାଖରେ ସରକାରୀ ଯୋଜନାକୁ ପହଞ୍ଚାଇବାକୁ ସେ ଦଳୀୟକର୍ମୀଙ୍କୁ ଆହ୍ବାନ ଦେଇଛନ୍ତି। ଯାହା ମୟୁରଭଂଜର ବିଜେପି କର୍ମୀ ଦଳ ଛାଡ଼ିବା ଘଟଣାରୁ ଜଣାପଡୁଛି।
ଏହି ମିଶ୍ରଣ ପର୍ବରେ ବିଜେଡିର ମୟୁରଭଞ୍ଜ ପ୍ରଭାରୀ ତଥା ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସ, ଆଳି ବିଧାୟକ ପ୍ରତାପ ଦେବ, କରଞ୍ଜିଆ ବିଧାୟିକା ବାସନ୍ତି ହେମ୍ବ୍ରମ, ମୋରଡା ବିଧାୟକ ରାଜକିଶୋର ଦାସ, ଚାନ୍ଦବାଲି ବିଧାୟକ ବ୍ୟମେକେଶ ରାୟ, ପୂର୍ବତନ ବିଧାୟକ ବିଜୟ କୁମାର ନାୟକ ପ୍ରମୁଖ ଉପସ୍ଥିତ ଥିଲେ।
