ଗଂଜାମ : ଏ କରୋନା ମହାମାରୀ ସମୟକୁ ବଦଳାଇ ଦେଇଛି। ବିଶ୍ୱାସକୁ ଅବିଶ୍ୱାସରେ ପରିଣତ କରିଛି। ସମ୍ପର୍କ ମଝିରେ ପାଚେରୀ ହୋଇଛି। ସନ୍ଦେହର ପୁଟୁଳି ବାନ୍ଧିଛି। ଯାହା ଫଳରେ ଆଜି ଜଣେ ଅନ୍ୟ ଜଣଙ୍କ ପାଇଁ ହୋଇ ଯାଉଛି ଅଛୁଆଁ। ନିଜ ଆତ୍ମୀୟ ଲୋକ ମଧ୍ୟ ପଡିଥିବା ଶବକୁ ଛୁଉଁନାହାଁନ୍ତି। ହେଲେ ସମ୍ପୂର୍ଣ୍ଣ ମଣିଷ ପଣିଆ ମରି ଯାଇଛି କହିବାଟା ବି ଭୁଲ ହେବ। ଏମିତିରେ ଏ ସମାଜ ପାଇଁ ଉଦାହରଣ ସାଜିଛନ୍ତି ଗଂଜାମର ଚାରି ଜଣ ସାମ୍ବାଦିକ। ଏହି କରୋନା ଭୟକୁ ନ ଡରି ପିପିଇ କିଟ୍ ପିନ୍ଧି ଆଗକୁ ଆସିଲେ ଗଂଜାମ ଜିଲ୍ଲାର ୪ ଜଣ ସାମ୍ବାଦିକ । ଶବକୁ କାନ୍ଧ ଦେବା ସହ ଆମ୍ବୁଲାନ୍ସରେ ଡାକ୍ତରଖାନା ପଠାଇଲେ ।
ଘଟଣାଟି ହେଉଛି ଶେରଗଡର ବଡଦାଣ୍ଡ ଗାଁର। ଅବସରପ୍ରାପ୍ତ ଶିକ୍ଷକ ପୀତାମ୍ୱର ପାଢୀଙ୍କୁ କିଛି ଦିନହେବ ଜ୍ୱର ଓ କାଶ ହେଉଥିଲା। ହେଲେ ଚିକିତ୍ସା ପରେ ମଧ୍ୟ ତାଙ୍କ ଦେହ ଭଲ ହୋଇ ନ ଥିଲା । ତାଙ୍କର ମୃତ୍ୟୁ ହୋଇଥିଲା। ହେଲେ ତାଙ୍କର ମୃତ୍ୟୁ ପରେ ସତେ ଯେମିତି ନିଜର କହୁଥିବା ଲୋକ ସବୁ ପର ହୋଇଗଲେ। କରୋନା ଭୟରେ ସମ୍ପର୍କୀୟ କିମ୍ବା ପୋଡ଼ାଶୀ କେହି ଆସିଲେ ନାହିଁ।ଦୁଇ ପୁଅ ମଧ୍ୟ ତାଙ୍କର ରାଜ୍ୟ ବାହାରେ ରହୁଛନ୍ତି। ଫଳରେ ଶବ ସତ୍କାର ହୋଇ ପାରିଲା ନାହିଁ ।ଏପରି ସମୟରେ ମାନବିକତା ଦେଖାଇଲେ ଗଂଜାମ ଜିଲ୍ଲାର ୪ ଜଣ ସାମ୍ବାଦିକ ବାଲାଜି ପ୍ରଧାନ, ମେଘନାଦ ଦାସ, ଶଙ୍କର ପ୍ରଧାନ ଏବଂ ଅଜିତ୍ ପ୍ରଧାନ ଆଗକୁ ଆସି ପୀତାମ୍ୱର ସାରଙ୍କ ପାର୍ଥିବ ଶରୀରକୁ କାନ୍ଧ ଦେଲେ ।ଆଂବୁଲାନ୍ସ ଯୋଗେ ଡାକ୍ତରଖାନାକୁ ମୃତ ଦେହକୁ ପଠାଇବାରେ ୪ ଜଣ ସାଂବାଦିକ ଯେପରି ସାହସ ଦେଖାଇଲେ ତାହା ଏବେ ସାରା ଅଂଚଳରେ ଚର୍ଚାର ବିଷୟ ହୋଇଛି ।
