ନୂଆଦିଲ୍ଲୀ: ଏବେ ସାରା ଦେଶ କରୋନାକୁ ନେଇ ଚିନ୍ତିତ ।ଦିନକୁ ଦିନ ଭାରତରେ ଆକ୍ରାନ୍ତ ସଂଖ୍ୟା ବଢିବାରେ ଲାଗିଛି। ଏହି ମହାମାରୀ ସହ ଲଢ଼ିବା ପାଇଁ ସାରା ଦେଶକୁ ଲକ୍ ଡାଉନ କରାଯାଇଛି । ବାହାରକୁ ବାହାରିବା ପାଇଁ ମାସ୍କ ନିହାତି ଆବଶ୍ୟକ ବୋଲି ସରକାର ମଧ୍ୟ ଘୋଷଣା କରିଛନ୍ତି। ଏହି ସମୟରେ ନିଜ ଘରେ ମାସ୍କ ତିଆରି କରୁଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ପତ୍ନୀ ମୃଦୁଳା ଠାକୁର ପ୍ରଧାନ ଏବଂ ଝିଅ ନୈମିଶା ପ୍ରଧାନ। ଯାହାକି ଖୋଦ କେନ୍ଦ୍ରମନ୍ତ୍ରୀ ଟୁଇଟ କରି ଜଣାଇଛନ୍ତି । ଏହା ନିଜର ଚାହିଦା ମେଣ୍ଟାଇବା ସହ ଅନ୍ୟମାନଙ୍କ ଚାହିଦା ମେଣ୍ଟାଇବାରେ ସହାୟକ ହେବ ବୋଲି କେନ୍ଦ୍ରମନ୍ତ୍ରୀ ଆଶା କରିଛନ୍ତି।
ଏହି ଟ୍ୱିଟ୍ରେ କେନ୍ଦ୍ରମନ୍ତ୍ରୀ ଲେଖିଛନ୍ତି ,ଦେଶ ଏକ ଜଟିଳ ସମୟ ଦେଇ ଗତି କରୁଛି। ଏଥିପାଇଁ ଆମ ସମସ୍ତଙ୍କ କିଛି କିଛି କର୍ତ୍ତବ୍ୟ ରହିଛି। ମୋ ପତ୍ନୀ ଏବଂ ଝିଅ ପାଇଁ ମୁଁ ଗର୍ବିତ। ସେ ଦୁହେଁ ଆମ ଘରର ସମସ୍ତଙ୍କ ପାଇଁ ଏବଂ ଅନ୍ୟମାନଙ୍କ ପାଇଁ ନିଜେ ମାସ୍କ ତିଆରି କରୁଛନ୍ତି। ନିଜ କୌଶଳ ବିକାଶ ପାଇଁ ଏବଂ ନୂଆ କଥା ଶିଖିବା ପାଇଁ ଏବେଠାରୁ ପ୍ରକୃଷ୍ଟ ସମୟ ଆଉ କିଛି ନୁହେଁ। ଏବେ ଏ ମହତ କାର୍ଯ୍ୟ ପାଇଁ ସୋସିଆଲ ମିଡିଆରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ତାଙ୍କ ପରିବାରକୁ ଅନେକ ଲୋକ ପ୍ରଶଂସା କରୁଛନ୍ତି ।
