ଭୁବନେଶ୍ୱର : କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ପୁଣି ନିର୍ବାଚନ ଲଢ଼ିବାକୁ ଇଚ୍ଛା ପ୍ରକାଶ କରିଛନ୍ତି l ତାହା ପୁଣି ପଶ୍ଚିମ ଓଡିଶାରୁ l ବିଜେପି ଫୋକସରେ ଥିବା ପଶ୍ଚିମ ଓଡ଼ିଶାରେ 2024 ସାଧାରଣ ନିର୍ବାଚନରେ ନିର୍ବାଚନ ଲଢ଼ିବା ପାଇଁ ଏବେ ଠାରୁ କେନ୍ଦ୍ରମନ୍ତ୍ରୀ ମନବଳେଇଲେଣି l ବୀର ସୁରେନ୍ଦ୍ର ସାଏ ଜୟନ୍ତୀ ମାରୋହରେ ଯୋଗଦେଇ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏମିତି ଏକ କଥା କହିଛନ୍ତି, ଯାହା ଆଜି ନ ହେଲେ ବି ଆଗାମୀ ଦିନରେ ରାଜନୈତିକ ମହଲରେ ଚର୍ଚ୍ଚା ହେବ। ତାଙ୍କ କଥାର ଇସାରା ସିଧା ନିର୍ବାଚନ ଆଡ଼େ ଥିଲା। ହସି ହସି ବାବୁ ଧର୍ମେନ୍ଦ୍ର ନିର୍ବାଚନ ଲଢ଼ିବା ନେଇ ଆତ୍ମଘୋଷଣା କରିଛନ୍ତି। ତେବେ ସେ କ’ଣ ଘୋଷଣା କରିଛନ୍ତି ତାହା ଉପରେ କର୍ଣ୍ଣପାତ କରିବା ନିହାତି ଜରୁରୀ।ଧର୍ମେନ୍ଦ୍ର ମଞ୍ଚ ଉପରୁ କହୁ କହୁ କହିଦେଲେ ଯେ, ରାଜା ସାହେବ ମାନେ ସମ୍ବଲପୁର ସାଂସଦ ନୀତେଶ ଗଙ୍ଗଦେବ
ଚାହିଁଲେ ସେ ତାଙ୍କ ଆସନରୁ ସାଂସଦ ପ୍ରାର୍ଥୀ (MP Candidate) ହୋଇ ନିର୍ବାଚନ ଲଢ଼ିବେ। ହସ ହସରେ ଧର୍ମେନ୍ଦ୍ରଙ୍କ ଏ ଦୁଇପଦ ଏଠାରେ ଅନେକ ପ୍ରଶ୍ନ ଛାଡ଼ି ଯାଇଛି। ଯେମିତି କି ପୂର୍ବରୁ ଆଦୌ ସାଧାରଣ ନିର୍ବାଚନୀ ମଇଦାନକୁ ଓହ୍ଲାଉ ନ ଥିବା ଧର୍ମେନ୍ଦ୍ର ଏବେ ଲଢ଼ିବାକୁ ପ୍ରସ୍ତୁତ ହେଉଛନ୍ତି କି? ଏକ ଦଶନ୍ଧିରୁ ଊର୍ଦ୍ଧ୍ୱ ସମୟ ହେବ ଧର୍ମେନ୍ଦ୍ର ଓଡ଼ିଶା କୋଟାରୁ ପାର୍ଲିଆମେଣ୍ଟ (Parliament) ଯାଇନାହାନ୍ତି। ବିହାର ଓ ମଧ୍ୟପ୍ରଦେଶ ବାଟ ଦେଇ ରାଜ୍ୟସଭା ସଦସ୍ୟ ହୋଇଛନ୍ତି। 2004ରୁ 2009 ଯାଏ ସେ ଦେବଗଡ଼ର ସାଂସଦ ଥିଲେ l ତେଣୁ ପୁଣି ଥରେ ସେ ଆସନରୁ ନିର୍ବାଚନ ଲଢ଼ିବା ପାଇଁ କେନ୍ଦ୍ରମନ୍ତ୍ରୀ ମନବଳେଇଲେଣି l ଯାହା ଏବେ ପଶ୍ଚିମ ଓଡିଶା ରାଜନୀତିକୁ ସରଗରମ କରିଛି l
