ଭୁବନେଶ୍ୱର : ଉପନିର୍ବାଚନ ପାଇଁ ଡିଜିଟାଲ ପ୍ରଚାର କରିବେ ବିଜେଡି ସଭାପତି ନବୀନ ପଟ୍ଟନାୟକ । ଆଜି ତିର୍ତ୍ତୋଲରେ ବିଜେଡି ପ୍ରାର୍ଥି ବିଜୟ ଶଙ୍କର ଦାସଙ୍କ ପାଇଁ ମୁଖ୍ୟମନ୍ତ୍ରୀ ତଥା ବିଜେଡି ସଭାପତି ନବୀନ ପଟ୍ଟନାୟକ ଭୋଟ ଭିକ୍ଷା କରିବେ l ଆଜି 4:30ରେ ନବୀନ ଭରଚୂଆ ପ୍ରଚାର କରିବେ l ତେବେ ନବୀନ ନିଜ ଅଭିଭାଷଣ କଣ କହିବେ ତାହାକୁ ନେଇ ଆରମ୍ଭ ହୋଇଛି ଚର୍ଚ୍ଚା l କୋଭିଡ କଟକଣା ଭିତରେ ନିର୍ବାଚନ ହେଉଥିବାରୁ ମୁଖ୍ୟମନ୍ତ୍ରୀ ଏପରି ଡିଜିଟାଲ ପ୍ରଚାରକୁ ଆପଣାଇଛନ୍ତି l ସେହିପରି ୨୯ରେ ବାଲେଶ୍ୱର ପାଇଁ ଡିଜିଟାଲ କ୍ୟାମ୍ପେନ କରିବେ ନବୀନ । ସେପଟେ ଉପନିର୍ବାଚନ ତାରିଖ ଯେତିକି ପାଖେଇ ଆସୁଛି ନିର୍ବାଚନୀ ଉଷ୍ମତା ସେତିକି ବଢ଼ିବାରେ ଲାଗିଛି। ରାଲି ରୋଡ ଶୋ ମାଇକ ପ୍ରଚାରରେ କମ୍ପୁଛି ବାଲେଶ୍ବର ସଦର ଓ ତିର୍ତୋଲ ବିଧାନସଭା କ୍ଷେତ୍ର l ମଇଦାନରେ ତିନି ଦଳର ପ୍ରାର୍ଥୀ ଗଡ ଜିତିବା ପାଇଁ ଆପ୍ରାଣ ଉଦ୍ୟମ ଚଳାଇଛନ୍ତି। ବାଲେଶ୍ୱରରେ ଘରଘର ବୁଲି ବିଜେପି ପ୍ରାର୍ଥୀ ମାନସ ଦତ୍ତ ଭୋଟ ଭିକ୍ଷା କରୁଥିବା ବେଳେ
ବିଜେଡି ପ୍ରାର୍ଥୀ ସ୍ବରୂପ ଦାସଙ୍କ ବି ଜୋରଦାର ପ୍ରଚାର କରୁଛନ୍ତି l ବିଜେଡି ପ୍ରତି ବାଲେଶ୍ୱର ବଢିଚାଲିଛି ସମର୍ଥନ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ କାର୍ଯ୍ୟଧାରାରେ ଉପକୃତ ହୋଇ ଲୋକମାନେ ସ୍ବତପ୍ରବୃତ ଭାବରେ ବିଜେଡିକୁ ସମର୍ଥନ କରୁଥିବା ସ୍ବରୂପ କହିଛନ୍ତି l
ସେହିପରି ପ୍ରଚାରରେ ପଛରେ ପଡିନି କଂଗ୍ରେସ l କଂଗ୍ରେସ ପ୍ରାର୍ଥିନୀ ଶ୍ରୀମତୀ ମମତା କୁଣ୍ଡୁଙ୍କ ପାଇଁ ପ୍ରଚାର ମଇଦାନକୁ ଓଲ୍ହେଇଛନ୍ତି ଅଖିଳ ଭାରତୀୟ କଂଗ୍ରେସ କମିଟିର ମୁଖପାତ୍ର ଡଃ. ରାଗିଣୀ ନାୟକ। ଡଃ. ନାୟକ ଭୁବନେଶ୍ବରରୁ ବାଲେଶ୍ବର ଆସିବା ପରେ ମମତାଙ୍କ ସହ ବାରବାଟୀ ଠାରେ ଏକ ମହିଳା ସମାବେଶରେ ଯୋଗ ଦେଇ ବିଜେପି ଓ ବିଜେଡି କିପରି ଭାବରେ ମହିଳା ମାନଙ୍କୁ ପ୍ରତାରିତ କରୁଛନ୍ତି ତାର ଏକ ଲମ୍ବା ଚିଠା ସାମ୍ନାକୁ ଆଣିଛନ୍ତି।
ଅନ୍ୟପଟେ ତିର୍ତୋଲରେ ବି ନିର୍ବାଚନ ପ୍ରଚାର ଜୋର ଧରିଛି l ବିଜେଡି ପ୍ରାଥୀ ବିଜୟ ଶଙ୍କର ଦାସ, ବିଜେପି ପ୍ରାଥୀ ରାଜକିଶୋର ବେହେରା ଓ କଂଗ୍ରେସ ପ୍ରାର୍ଥୀ ଇଂ ହିମାଂଶୁ ଭୂଷଣ ମଲ୍ଲିକ ଘରଘର ବୁଲି ନିର୍ବାଚନୀ ପ୍ରଚାର କରୁଛନ୍ତି l ତେବେ ମୁଖ୍ୟମନ୍ତ୍ରୀ ପ୍ରଚାର ଆଜି ଥୁବାରୁ ତିର୍ତୋଲ ରାଜନୀତି ପୁରା ସରଗରମ ହୋଇଛି l ନଭେମ୍ବର 3ତାରିଖରେ ଭୋଟର କାହାକୁ ଭୋଟ ଦେଉଛନ୍ତି ତାହା ନଭେମ୍ବର 10ତାରିଖ ଫଳାଫଳରୁ ସ୍ପଷ୍ଟ ହେବ l
