ଭୁବନେଶ୍ୱର : ରାଜ୍ୟ ସରକାରଙ୍କ କୃଷି ତଥା ଉଚ୍ଚଶିକ୍ଷା ମନ୍ତ୍ରୀ ଏବଂ ରାଜ୍ୟସଭା ସାଂସଦଙ୍କୁ ଟାର୍ଗେଟ କଲେ ପୂର୍ବତନ କଂଗ୍ରେସ ବିଧାୟକ ଦେବାଶିଷ ପଟ୍ଟନାୟକ। କୃଷି ମନ୍ତ୍ରୀ ଏପଟେ କହୁଛନ୍ତି ଚାଷୀଙ୍କୁ ଅନ୍-ଲାଇନରେ ପାଠ ପଢେଇଛୁ, ସେପଟେ ଉଚ୍ଚଶିକ୍ଷା ଦାୟିତ୍ଵରେ ଥିବା ସମ୍ପୃକ୍ତ ମନ୍ତ୍ରୀ କେନ୍ଦ୍ରକୁ ଚିଠି ଲେଖି ଜଣାଇଛନ୍ତି ଯେ ନେଟୱର୍କ ନ ଥିବାରୁ ପିଲାଏ ଅନ୍-ଲାଇନରେ ପାଠ ପଢି ପାରିବେ ନାହିଁ। ଜଣେ ମନ୍ତ୍ରୀ କେଉଁ ଆଧାରରେ ଏପରି କହୁଛନ୍ତି ବୋଲି ପ୍ରଶ୍ନ କଲେ ଦେବାଶିଷ। ଗୋଟିଏ ହ୍ବାଟସ ଆପ୍ ଗ୍ରୁପରେ ସର୍ବାଧିକ ୨୫୦ ଜଣ ସଦସ୍ଯ ରହୁଥିବା ବେଳେ ୯ ଲକ୍ଷ ୨୦ ହଜାର ଚାଷୀଙ୍କୁ କିଭଳି ହ୍ବାଟସ ଆପ୍ ଗ୍ରୁପରେ ସାମିଲ କଲେ ? କୃଷି ବିଭାଗର ଟୁଇଟର ଆକାଉଣ୍ଟରେ କୁହାଯାଇଛି ୨୭,୨୦୦ ଚାଷୀ ବ୍ଯବହାର କରୁଛନ୍ତି। କିନ୍ତୁ ଏହି ଆକାଉଣ୍ଟର ଫଲୋଅର ୨୨,୬୦୦। ଦୁଇ ତିନି ବର୍ଷ ତଳେ ରାଜ୍ୟ ସରକାର ୬୦ ହଜାର ସ୍ମାର୍ଟଫୋନ୍ ଦେଇଥିଲେ, ସେ ଫୋନ୍ ଅଛି କି ନାହିଁ, ଆପଣ ଜାଣିଥିବେ। ଆଜିବି ଅନେକ ମନ୍ତ୍ରୀ ବିଧାୟକଙ୍କ ଟୁଇଟର, ଫେସବୁକ ଆକାଉଣ୍ଟ୍ ନାହିଁ। ଚାଷୀଙ୍କ ପାଖରେ ବେଉସା କରିବାକୁ ପଇସା ନାହିଁ, ସ୍ମାର୍ଟ ଫୋନରେ ନେଟ୍ ପ୍ଯାକ୍ ପକେଇବେ କେମିତି, ପଇସା ଆଣିବେ କେଉଁଠୁ ? କୃଷି ବିଭାଗର ଟୋଲ ଫ୍ରି ହେଲପ୍ ଲାଇନରେ ସରକାର କହୁଛନ୍ତି ୮,୪୫,୬୫୦ ଚାଷୀ ପଞ୍ଜୀକରଣ କରିଛନ୍ତି। ରାଜ୍ୟ ସରକାରଙ୍କ ତଥ୍ୟ ଅନୁଯାୟୀ ରାଜ୍ୟରେ ଚାଷୀ ପରିବାର ୪୫ ଲକ୍ଷ (ଆମ ଆକଳନ ଅନୁଯାୟୀ ରାଜ୍ୟରେ ଚାଷୀ ପରିବାର ୬୦ ଲକ୍ଷ। ଏଭଳି ଚିତ୍ରର ସତ୍ୟତା ସ୍ପଷ୍ଟ ଅନୁମେୟ।
ନାଁ ନ ନେଇ ରାଜ୍ୟସଭା ସାଂସଦଙ୍କୁ ଟାର୍ଗେଟ କଲା କଂଗ୍ରେସ।
ଟୁଇଟ୍ କରି ଚାକରୀ ଯୋଗାଡ କରିବା ପାଇଁ କରିଥିବା ଉଲ୍ଲେଖକୁ ସମାଲୋଚନା କଲେ ଦେବାଶିଷ। ସରକାର ପ୍ରବାସୀ ଶ୍ରମିକମାନଙ୍କ ମ୍ୟାପିଙ୍ଗ କରି ଚାକିରୀ ଦେବାକୁ କହିଥିଲେ। ଏବେ ଶ୍ରମିକ ମାନେ ରାଜ୍ୟରେ କର୍ମସଂସ୍ଥାନ ନ ପାଇ ଭୋକ ବିକଳରେ ପୁଣି ଅନ୍ୟ ରାଜ୍ୟକୁ ଫେରୁଛନ୍ତି। ସାଂସଦ କଣ ଚାହୁଁଛନ୍ତି ଓଡ଼ିଆ ଲୋକେ ରାଜ୍ୟ ଛାଡି ବାହାରକୁ ପଳାନ୍ତୁ? ସାଂସଦଙ୍କ ଏଭଳି ଉକ୍ତିର ଅର୍ଥ କଣ, ରାଜ୍ୟ ସରକାର କହିବେ କି। ରାଜ୍ୟ ସରକାରଙ୍କ ମ୍ୟାପିଙ୍ଗ କୋଉ ଯାଏ ଗଲା ତାର ଉତ୍ତର ମାଗିଲା କଂଗ୍ରେସ। ସାଂସଦଙ୍କ ଚାକିରୀ ଦେବା କଥା ଦଳର କଥା କି ନୁହେଁ ଦଳ ସ୍ପଷ୍ଟ କରୁ ବୋଲି ଦାବି କଲେ ଦେବାଶିଷ ପଟ୍ଟନାୟକ।
