() ନକଲି ସାର୍ଟିଫିକେଟ ଦେଇ ଅସଲି ଡାକ୍ତର ବନିଥିବା ଜଣେ ବ୍ୟକ୍ତିକୁ ଆଜି ଗିରଫ କରିଛି ସେମିଳିଗୁଡା ପୋଲିସ୍। ପୋଲିସ୍ ସୂତ୍ରରୁ ମିଳିଥିବା ସୂଚନା ମୁତାବକ ସ୍ଥାନୀୟ ସେମିଳିଗୁଡା ସମବାୟ କଲୋନୀରେ ରହୁଥିବା ଅମ୍ବିକା ଶାସନିଙ୍କ ଅଭିଯୋଗ ଆଧାରରେ ଦୁର୍ଗାଦତ୍ତ ଶାସନି ଓରଫ୍ ଯାନୀ (୪୫)କୁ ଗିରଫ କରିଛି ପୋଲିସ୍। ଗତ ଜୁଲାଇ ମାସ ୨୦ ତାରିଖରେ ଡାକ୍ତରଙ୍କ ଭାଇ ଅମ୍ବିକା ଏହି ଅଭିଯୋଗ ନେଇ ସେମିଳିଗୁଡା ଥାନାର ଦ୍ବାରସ୍ଥ ହୋଇଥିଲେ। ତାଙ୍କ ଅଭିଯୋଗ ମୁତାବକ ଦୂର୍ଗାଦତ୍ତ ଜାତିରେ ବ୍ରାହ୍ମଣ ହୋଇଥିବା ସତ୍ତ୍ବେ ଆଦିବାସୀ ସମ୍ପ୍ରଦାୟର ଜାତିଗତ ପ୍ରମାଣ ପତ୍ର ମାଧ୍ୟମରେ ବ୍ରହ୍ମପୁର ଏମ୍.କେ.ସି.ଜି ମେଡିକାଲ କଲେଜରେ ସହକାରୀ ନିଶ୍ଚେତକ ପ୍ରଫେସର ଭାବେ କାର୍ଯ୍ୟ କରି ଆସୁଛନ୍ତି । ଯାହାକୁ ନେଇ ଥାନା କେସ୍ ନଂ ୯୯/୨୦୨୩ ରେ ଏକ ମାମଲା ରୁଜୁ କରି ତଦନ୍ତ ଜାରି ରଖିଥିଲା ସେମିଳିଗୁଡା ପୋଲିସ୍। ମଙ୍ଗଳବାର ସଂମ୍ପୃକ୍ତ ଡାକ୍ତରଙ୍କ ବିରୋଦ୍ଧରେ ପ୍ରମାଣ ପାଇବା ପରେ ବୁଧବାର ତାଙ୍କୁ ଗିରଫ କରିଛି ପୋଲିସ୍। ସେମିଳିଗୁଡା ଥାନା ଅଧିକାରୀ ସଚ୍ଚିନ୍ଦ୍ର ପ୍ରଧାନ ନିଜେ ତଦନ୍ତ କରି ସମସ୍ତ ତଥ୍ୟର ସତ୍ୟାସତ୍ୟ ଜାଣିବା ପରେ ଭାରତୀୟ ଆଇନ ଧାରା ୪୬୮,୪୭୧,୪୨୦ ଓ ୫୦୬ ଆଧାରାରେ ଗିରଫ କରି କୋର୍ଟ ଚାଲାଣ କରିଛନ୍ତି। ଯାହା ସୂଚନା ଦେଇଛନ୍ତି ଥାନା ଅଧିକାରୀ ।ଏଠାରେ ଉଲ୍ଲେଖ ଥାଉକି ୨୦୧୭ ମସିହାରେ ଦୂର୍ଗାଦତ୍ତ ଏମ୍.କେ.ସି.ଜି ମେଡିକାଲ କଲେଜରେ ନିଶ୍ଚେତକ ଡାକ୍ତର ଭାବରେ ନିଯୁକ୍ତି ପାଇଥିବା ବେଳେ ୨୦୨୦ ରେ ପଦୋନ୍ନତି ପାଇ ସହକାରୀ ପ୍ରଫେସର ଭାବେ ଅବସ୍ଥାପିତ ହୋଇଥିଲେ । ଏଠି ପ୍ରଶ୍ନ ଉଠୁଛି ଯଦି ସେ ବ୍ରାହ୍ମଣ ପରିବାରର ତେବେ ତାଙ୍କୁ ଆଦିବାସୀ ଜାତିଗତ ପ୍ରମାଣ ପତ୍ର ଦେଲା କିଏ । ଏହାସହ ଡାକ୍ତରୀ ପାଠ ପଢିବା ସମୟରେ କାହିଁକି ତାଙ୍କ ସାର୍ଟିଫିକେଟ୍ ସଠିକ୍ ଭାବରେ ଯାଞ୍ଚ ହୋଇ ନଥିଲା । ଯାହା ଏବେ ତଦନ୍ତ ସାପେକ୍ଷ । ସୂଚନା ଥାଉକି ଦୂର୍ଗାଦତ୍ତଙ୍କ ପତ୍ନୀ ମଧ୍ୟ ଜଣେ ଡାକ୍ତର । କୌତୁହଳର ବିଷୟ ଗତ ଜୁଲାଇ ମାସରୁ ଅଭିଯୋଗ ହୋଇଥିଲେ ବି ସେତେବେଳର ଥାନା ଅଧିକାରୀ କାହିଁକି ଏହାର ତଦନ୍ତ କରି ନଥିଲେ। ତା ଛଡା ଦୀର୍ଘ ବର୍ଷ ପରେ ନିଜ ଭାଇ କାହିଁକି ଭାଇ ବିରୁଦ୍ଧରେ ଏତଲା ଦେଇଥିଲେ। ଏତଦ୍ ବ୍ୟତୀତ ଜାତିଗତ ପ୍ରମାଣ ପତ୍ର ପ୍ରଦାନ ପୂର୍ବରୁ ସଠିକ୍ ଭାବରେ ଯାଞ୍ଚ ହୋଇଥିଲା କି ଯାହା ବର୍ତ୍ତମାନ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ସଂପୃକ୍ତ ଡାକ୍ତରଙ୍କୁ କୋରାପୁଟ ଜିଲ୍ଲା ଦୌରା ଜର୍ଜଙ୍କ ନିକଟରେ ହାଜର କରାଯାଇଥିଲା। ସେଠାରେ ଡାକ୍ତରଙ୍କ ଜାମିନ ନାମଞ୍ଜୁର ହେବାରୁ ବିଚାର ବିଭାଗଗୀୟ ହାଜତକୁ ପଠାଇ ଦିଆଯାଇଛି।
