ଖବରର ଭୋକ ତାଙ୍କୁ ଶୁଆଇ ଦିଏନି। ଦିନ ହେଉ କି ରାତି ଖବର ଯେଉଁଠି ସେ ସେଇଠି। ସତ କହିବା ଓ ସତ ଲେଖିବାର ସାମର୍ଥ୍ୟ ରଖୁଥିବା ଆଗ ଧାଡ଼ିର ଯୁବ ସାମ୍ବାଦିକ ଦୁଷ୍ମନ୍ତ ବେହେରା। ଓଡ଼ିଶା ଗଣମାଧ୍ୟମ ଜଗତର ଜଣେ ପରିଚିତ ନାଁ। ସାମାଜିକ,ସାଂସ୍କୃତିକ, କ୍ରୀଡାଠାରୁ ଆରମ୍ଭ କରି ରାଜନୀତିର ଗହନ କଥାକୁ ଲୋକ ଲୋଚନକୁ ଆଣିବାରେ ସେ ମାହିର। ଖବର ପରିବେଶ ହେଉ ଅବା ଉପସ୍ଥାପନ, ସବୁଠି ଆଗରେ ସେ । ସୁଦୂର ମୟୁରଭଂଜ ଯଶିପୁରରୁ 5 ଜିଲ୍ଲା 7 ନଈ ପାର ହୋଇ ରାଜ୍ୟର ଏକ ପରିଚିତ ଚେହେରା ହୋଇ ପାରିଛନ୍ତି ଦୁଷ୍ମନ୍ତ। ପ୍ରାକୃତିକ ବିପର୍ଯ୍ୟୟର ଅନୁମାନ ହେଉ କି ରାଜନୀତିର ଗଣିତ କଷିବାରେ ସେ ବେଶ ପାରଙ୍ଗମ। ରାଜ୍ୟ ଭିତରେ ହେଉ କି ବାହାରେ ସବୁଠି ନିଜର ଦକ୍ଷତା ସେ ଦେଖେଇ ସାରିଛନ୍ତି। ଏଭଳି ଜଣେ ଯୁବ ପ୍ରତିଭା ବାନ ସାମ୍ବାଦିକଙ୍କୁ ଆଜି ଓୟୁଜେର 53 ତମ ପ୍ରତିଷ୍ଠା ଦିବସରେ ଓୟୁଜେ ମିଡିଆ ଆୱାର୍ଡରେ ସମ୍ବର୍ଦ୍ଧିତ କରାଯାଇଛି। ସାମ୍ବାଦିକ ବୃତ୍ତିକୁ ପେଶା ନୁହେଁ ବରଂ ନିଶା ଭାବରେ ଗ୍ରହଣ କରିଛନ୍ତି ସେ l ସବୁବେଳେ ଖବର ସଂଗ୍ରହ ଉପରେ ତାଙ୍କର ନଜର ଥାଏ l news 18 ଓଡିଆର ଏହି ପ୍ରତିଭାବାନ ଯୁବ ସାମ୍ବାଦିକ ଆଗକୁ ସମାଜର ବଡ ଦର୍ପଣ ହୋଇ କାମ କରିବେ ବୋଲି ଓୟୁଜେ ଆଶା କରିଛି l
