ଦେବଗଡ଼:କରୋନା ମହାମାରୀ ପ୍ରଭାବରେ ମଣିଷର ନିତିଦିନିଆ ଜୀବନ ଯାପନର ଶୈଳୀରେ ଦେଖା ଦେଇଛି ପରିବର୍ତ୍ତନ। ପ୍ରତେକ ମୁହୂର୍ତ୍ତରେ କଟକଣା ମଧ୍ୟରେ ରହିବାକୁ ପଡୁଛି। କାରଣ କୋଭିଡ ୧୯ ର କଟକଣା ସଭିଙ୍କ ପାଦରେ ସିକୁଳି ଭାବେ ବନ୍ଧା ହୋଇଛି। ଯାହାର ଫଳ ସ୍ୱରୂପ ଆଜି ପାର୍ବଣ ଋତୁ ଫିକା ପଡିଯାଇଛି। ନାଁ ମଣ୍ଡପରେ ଅଛନ୍ତି ଅଗ୍ର ପୂଜ୍ୟ ଗଣେଶ, ନାଁ ଦେଖିବାକୁ ମିଳିଛି ପେଣ୍ଡାଲ,ନାଁ ସାମ୍ନାରେ ଲୋକଙ୍କ ଗହଳି କି ପଣ୍ଡିତ ଙ୍କ ଶ୍ଲୋକ । କରୋନାର ଭୟାବହତାକୁ ଦେଖି ଏଥର କୌଣସି ସାର୍ବଜନୀନ ସ୍ଥାନରେ ଗଣେଶ ପୂଜା କରିହେବ ନାହିଁ ବୋଲି ପ୍ରଶାସନ ଘୋଷଣା କରିଛି।
ଗାଁ ଠାରୁ ସହର ସବୁଆଡେ ଆଜି ଉତ୍ସବ ମୁଖର ଥାନ୍ତା। ଅଗ୍ରପୂଜ୍ୟ ଗଣେଶଙ୍କ ଆବାହନରେ ଲୋକେ ହୋଇଥାନ୍ତେ ବିଭୋର। ରଙ୍ଗ ବେରଙ୍ଗର ଆଲୋକ , ସୁଉଚ୍ଚ ତୋରଣ ସହ କୋଳାହଳରେ ଫାଟି ପଡୁଥାନ୍ତା ପରିବେଶ। ସ୍କୁଲରେ ନୂଆ ଜାମା ପିନ୍ଧି ପିଲାମାନେ ଠାକୁରଙ୍କୁ ପ୍ରାର୍ଥନା କରିଥାନ୍ତେ। ହେଲେ ଏ ବର୍ଷ ଏସବୁ କିଛି ହେଲା ନାହିଁ। ସବୁଠି ଖାଁ ଖାଁ ଦେଖାଯାଉଛି। ଲୋକଙ୍କୁ ଏକାଠି ହେବାକୁ ମନା ହୋଇଛି। ଲୋକମଧ୍ୟ ସରକାରଙ୍କ ସମସ୍ତ ଗାଇଡ଼ ଲାଇନକୁ ମାନି ଘରେ ପୂଜା କରୁଛନ୍ତି।ମାତ୍ର ପ୍ରଥମ ଥର ପାଇଁ ସ୍ଥାଇ ମଣ୍ଡପରେ ପୂଜା ନହୋଇ ଘର ବାରଣ୍ଡାରେ କିମ୍ବା ଘର ଭିତରେ ପୂଜା ପାଉଛନ୍ତି ଭଗବାନ ଶ୍ରୀଗଣେଶ । ସେହିପରି ଦେବଗଡ଼ ର ଗଣ ପର୍ଵ ସାର୍ବଜନୀନ ଗଣେଶ ପୂଜା ରେ ମଧ୍ୟବ୍ୟତିକ୍ରମ ଦେଖାଦେଇଛି ।୧୯୪୯ ମସିହାରୁ ନିରବଚ୍ଛିନ୍ନ ଭାବେ ସ୍ଥାନୀୟ ବଜାର ଠାରେ ପାଳିତ ହେଉଥିବା ସାର୍ବଜନୀନ ଗଣେଶ ପୂଜାପାଳନ କଟକଣା ଯୋଗୁଁ ପାଳିତ ହୋଇପାରି ନାହିଁ ।କେବଳ ବିଧିରକ୍ଷା ପାଇଁ କମିଟି ପକ୍ଷରୁ ଅନ୍ୟ ଏକ ସ୍ଥାନରେ ଆବଦ୍ଧ ମଧ୍ୟରେ ପୂଜା ପାଇଛନ୍ତି ଅଗ୍ରପୂଜ୍ୟ ।ଏହି ସାର୍ବଜନୀନ ପୂଜା ପାଇଁ ଦେବଗଡ଼ ସହର ଦଶ ଦିନ ଧରି ଉତ୍ସବ ମୁଖର ହୋଇ ଉଠୁଥିଲା ବେଳେ ଆଜି ଖାଁ ଖାଁ ଦେଖାଯାଉଛି ।ଚଳିତ ବର୍ଷ ଦେବଗଡ଼ ଗଣେଶ ପୂଜା ପାଇଁ ଏକ କୋଟି ରୁ ଉର୍ଦ୍ଧ୍ବ ଟଙ୍କା ବ୍ୟବସାୟ ଉପରେ ମାଡ଼ ପଡିଛି ।ଏହି ସାର୍ବଜନୀନ ପୂଜା ରେ ବ୍ୟବସାୟ ପାଇଁ ଓଡ଼ିଶା ସମେତ ଓଡ଼ିଶା ବାହାର ର ବହୁ ବ୍ୟବସାଇ ତାଙ୍କର ପସରା ମେଲାଇ ଥାନ୍ତି ।ପ୍ରଥମ ଥର ପାଇଁ ୭୧ ବର୍ଷ ରେ ପଦାର୍ପଣକରିଥିବା ଏହି ଗଣପର୍ଵ ରେ ଏପରି ପରିସ୍ଥିତି ଦେଖିବାକୁ ମିଳିଛି ।
