ଭୁବନେଶ୍ୱର : ଦିନେ ଚକ ମକ ଆଲୁଅରେ ହଜାର ହଜାର ଦର୍ଶକଙ୍କର ମନରଞ୍ଜନ କରୁଥିଲେ। ଲୋକଙ୍କ କର ତାଳିରେ ଫାଟି ପଡୁଥିଲା ଯାତ୍ରା ପେଣ୍ଡାଲ। ହେଲେ ଏବେ କରୋନା ମହାମାରୀ ଏ ସବୁରେ ତାଲା ପକାଇଦେଲା। ଖାଲି ଯାତ୍ରା ଜଗତରେ ତାଲା ପକାଇଛି ତାହା ନୁହେଁ। ହଜାର ହଜାର କଳାକାରଙ୍କ ପେଟରେ ମଧ୍ୟ ତାଲା ପକାଇଛି। ଆଜି କଳାକାରଙ୍କର ଦୁଃଖ ଜଣେଇବା ପାଇଁ ରାଜ୍ୟ ଯାତ୍ରା ସଭାପତି ଦୈତାରି ପଣ୍ଡାଙ୍କ ସମେତ ବାପି ପଣ୍ଡା ସଂସ୍କୃତି ମନ୍ତ୍ରୀଙ୍କୁ ଭେଟି ତାଙ୍କ ସମସ୍ୟା ବିଷୟରେ ଅବଗତ କରାଇଛନ୍ତି। ଏହାସହ ମୁଖ୍ୟମନ୍ତ୍ରୀଙ୍କୁ ଭେଟିବାକୁ ସମୟ ମାଗିଛନ୍ତି।
ଦୀର୍ଘ ଦୁଇ ମାସରୁ ଅଧିକ ହେଲାଣି ଦେଶରେ ଲକ୍ ଡାଉନ ।ସେଥିପାଇଁ ସବୁଠି ପେଣ୍ଡାଲ ବନ୍ଦ। ଏହାସହ ହଜାର ହଜାର କଳାକାରଙ୍କର ରୋଜଗାର ମଧ୍ୟ ବନ୍ଦ। ଏଥିରେ ଅଧିକ ପ୍ରଭାବିତ ହୋଇଛନ୍ତି ଛୋଟ ଛୋଟ କଳାକାର। ଯେମିତିକି ପଛରେ ନାଚୁଥିବା ନୃତ୍ୟଶିଳ୍ପୀ, କମେଡିଆନ୍ ଏପରି ଅନେକ। ଯାହାର କି ଏବେ ଘରେ ଦୁଇ ଓଳି ଚୁଲି ମଧ୍ୟ ଜଳିବା କଷ୍ଟକର।ସେଥିପାଇଁ ଆଜି ରାଜ୍ୟ ଯାତ୍ରା ସଭାପତି ଦୈତାରି ପଣ୍ଡା, ବାପି ପଣ୍ଡାଙ୍କ ସମେତ ଅନେକ କଳାକାର ରାଜଧାନୀରେ ଏକାଠି ହୋଇଥିଲା। ଏ ବିଷୟରେ ସଂକୃତି ମନ୍ତ୍ରୀଙ୍କ ସହ ଆଲୋଚନା କରିଛନ୍ତି। ମନ୍ତ୍ରୀ ଖୁବ ଶୀଘ୍ର ସମସ୍ୟାର ସମାଧାନ କରିବାକୁ ପ୍ରତିସ୍ମୃତି ଦେଇଛନ୍ତି ।ଏହାସହ କଳାକାର ଭତ୍ତା ଦେବାକୁ ସେମାନେ ମନ୍ତ୍ରୀଙ୍କୁ କହିଛନ୍ତି। ଏହାସହ ମୁଖ୍ୟମନ୍ତ୍ରୀଙ୍କୁ ଭେଟ କରିବାକୁ ସମୟ ମାଗିଛି କଳାକାର ସଂଘ।
