() ଆଜି ସମଗ୍ର ଦେଶ ରାମମୟ ହୋଇଯାଇଛି। ରାମଲଲାଙ୍କ ପ୍ରାଣପ୍ରତିଷ୍ଠା ସମାରୋହକୁ ନେଇ ଦେଶବାସୀ ଭାବୁକ ହୋଇପଡ଼ିଛନ୍ତି। ସବୁଠି ଉତ୍ସାହ। ରାମଙ୍କ ଭକ୍ତିରେ ବୁଡ଼ିଗଲେଣି ରାମଭକ୍ତ। ପ୍ରାୟ ୫୦୦ ବର୍ଷ ଧରି ଯେଉଁ ମୁହୂର୍ତ୍ତକୁ ଦେଶବାସୀ ଉତ୍କଣ୍ଠାର ସହ ଅପେକ୍ଷା କରିଥିଲେ, ସେହି ଐତିହାସିକ କ୍ଷଣର ଆଜି ଅନ୍ତ ହେବାକୁ ଯାଉଛି । ଆଜି ହେବାକୁ ଥିବା ପ୍ରାଣ ପ୍ରତିଷ୍ଠା ପାଇଁ ଉତ୍ତରପ୍ରଦେଶ ସମେତ ସାରାଦେଶ ଉତ୍ସବମୁଖର। ସନାତନ ସଂସ୍କୃତିର ଆତ୍ମା, ରଘୁନନ୍ଦନ ରାଘବ ରାମଲାଲା ନିଜ ଜନ୍ମଭୂମି ଅଯୋଧ୍ୟାପୁରୀର ଦିବ୍ୟ ସ୍ଥାନରେ ବିରାଜମାନ କରିବେ। ଅପରାହ୍ନ ୧୨ଟା ୧୫ରୁ ୮୪ସେକେଣ୍ଡ ଧରି ଚାଲିବାକୁ ଥିବା ପ୍ରାଣ ପ୍ରତିଷ୍ଠା ଉତ୍ସବର ସାକ୍ଷୀ ହେବା ପାଇଁ ମୋକ୍ଷ ଦାୟିନୀ କେବଳ ଅଯୋଧ୍ୟାରେ ନୁହେଁ, ବରଂ ସାରା ବିଶ୍ବର କୋଣ ଅନୁକୋଣରୁ ରାମଭକ୍ତମାନେ ଆସି ପହଞ୍ଚିଲେଣି।
ସତେ ଯେମିତି ପ୍ରତ୍ୟେକ ରାସ୍ତା ରାମଙ୍କ ଜନ୍ମଭୂମିକୁ ଲମ୍ବିଛି। ସବୁରି ଆଖିରେ ଆନନ୍ଦ ଓ ସନ୍ତୋଷର ଅଶ୍ରୁ। ସମସ୍ତଙ୍କ ମୁହଁରେ ‘ଜୟ ଶ୍ରୀରାମ’ ଧ୍ଵନି I ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟ ମୁତାବକ ମୁଖ୍ୟପୂଜା ଅଭିଜିତ ମୁହୂର୍ତ୍ତରେ କରାଯିବ। ରାମଲଲାଙ୍କ ପ୍ରାଣ ପ୍ରତିଷ୍ଠା ସମୟ କାଶୀ ବିଦ୍ଵାନ ଗଣେଶ୍ଵର ଶାସ୍ତ୍ରୀ ଦ୍ରାବିଡ଼ ଧାର୍ଯ୍ୟ କରିଛନ୍ତି। ଏହି କାର୍ଯ୍ୟକ୍ରମ ପୌଷ ମାସ ଦ୍ବାଦଶୀ ତିଥିର ଅଭିଜିତ ମୁହୂର୍ତ୍ତ, ଇନ୍ଦ୍ର ଯୋଗ, ମୃଗଶିରା ନକ୍ଷତ୍ର, ମେଷ ଲଗ୍ନ ରେ ହେବ। ପ୍ରଧାନମନ୍ତ୍ରୀ ମୋଦି ମୁଖ୍ୟ ଯଜମାନ ସାଜିବେ। ଭଗବାନଙ୍କ ଆଖିରେ କଜ୍ଜଳ ଲଗାଇ ଆଇନା ଦେଖାଇବେ । ଏହାପରେ ଭଗବାନଙ୍କୁ ସୁନାବସ୍ତ୍ର ପିନ୍ଧାଯିବ ଏବଂ ଛପନ ଭୋଗ ଲଗାଯିବ। ୧ ମିନିଟ୍ ୨୪ ସେକେଣ୍ଡର ବିଶେଷ ପୂଜା କରାଯିବ। ତେବେ ଶୁଭ ମୁହୂର୍ତ୍ତ ୧୨ଟା ୨୯ ମିନିଟ୍ ୮ ସେକେଣ୍ଡରୁ ୧୨ଟା ୩୦ ମିନିଟ୍ ୩୨ ସେକେଣ୍ଡ ପର୍ଯ୍ୟନ୍ତ ରହିବ। ଅର୍ଥାତ ଶୁଭ ମୁହୂର୍ତ୍ତ ମାତ୍ର ୮୪ ସେକେଣ୍ଡର ହେବ । ପୂଜାବିଧିର ଯଜମାନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ହାତରେ ଶ୍ରୀରାମଲଲାଙ୍କର ବିଗ୍ରହର ପ୍ରାଣ ପ୍ରତିଷ୍ଠା ହେବ।
