() ବୁଧବାର । ମଧ୍ୟରାତ୍ରୀ । ଘଡ଼ଘଡ଼ି ବର୍ଷା ସହ କିଟକିଟ ଅନ୍ଧାର । ଦାସବାବୁ ସ୍ତ୍ରୀ ପ୍ରସବ ଜନିତ ଯନ୍ତ୍ରଣା ଆରମ୍ଭ ହୋଇଗଲା । ଆଉ କାଳ ବିଳମ୍ବ ନକରି ଦାସବାବୁ ପାଖରେ ଥିବା ଏକ ଘରୋଇ ହସ୍ପିଟାଲରେ ସ୍ତ୍ରୀଙ୍କୁ ଚିକିତ୍ସା ପାଇଁ ଭର୍ତ୍ତି କଲେ । ମନେମନେ ଭଗବାନକୁ ଡ଼ାକୁଥାନ୍ତି ସ୍ତ୍ରୀ ପ୍ରସବ ଯନ୍ତ୍ରଣା କମ ହେବା ସହ ଘରକୁ ଭଲରେ ଭଲରେ ନୂଆ ଅତିଥି ଆସୁ । ଭୋରଭୋର ସମୟରେ ଜଣେ ନର୍ସ ଆସି କହିଲେ ଆପଣଙ୍କୁ ଅଭିନନ୍ଦନ । ଆପଣଙ୍କର ଝିଅ ଟିଏ ହୋଇଛି । ଏକଥା ଶୁଣି ଟିକେ ଶାନ୍ତିରେ ନିଶ୍ୱାସ ନେଲେ ଦାସବାବୁ । ହେଲେ ମନରେ ସେତେଟା ଆନନ୍ଦ ନଥିଲା ତାଙ୍କର । କାରଣ ଦାସବାବୁ ସ୍ତ୍ରୀ ଗର୍ଭବତୀ ହେବା ଠାରୁ ପରିବାର ଲୋକଙ୍କ ଠାରୁ ଆରମ୍ଭ କରି ସାଙ୍ଗସାଥୀ ଓ ପଡ଼ୋଶୀ କହୁଥାନ୍ତି ଆପଣଙ୍କର ପୁଅଟିଏ ହେବ । ଆପଣ ଯେମିତି ବାପାଙ୍କ ଏକମାତ୍ର ପୁଅ ସେପରି ଆପଣଙ୍କ ମଧ୍ଯ ପ୍ରଥମେ ପୁଅ ହେବ । ଆମ ସମାଜରେ କାହିଁ କେଉଁ କାଳରୁ ପୁଅ ଓ ଝିଅର ନେଇ ଏପରି କିଛିଟା ଭାବନା ଲୋକଙ୍କ ମନରେ ଅଛି । ଠିକ ଏମିତି ବେଳେ ହସ୍ପିଟାଲ ବାରଣ୍ଡାରେ ବସିଥିବା ଜଣେ ବୁଢିମାଉସୀ ଦାସବାବୁଙ୍କୁ ଦେଖି କରି କଣ ଭାବିଲେ କେଜାଣି ସଙ୍ଗେସଙ୍ଗେ କହିଲେ ବାବୁ ଝିଅ ହେଲା ବୋଲି ମନଦୁଃଖ କରୁଛୁ କି , ଆରେ ଆଜି ଗୁରୁବାର ତୋ ଘରକୁ ଲକ୍ଷ୍ମୀ ଆସିଛନ୍ତି । ଯାହା ମିଠା ନେଇକି ଆସ ହସ୍ପିଟାଲ ସାରା ବାଣ୍ଟ । ତମ ଭାଗ୍ୟ ବହୁତ ଭଲ ପ୍ରଥମ ଝିଅ ହୋଇଛି । ଏମିତି ବୁଢି ମାଉସୀଙ୍କ ଠାରୁ କଥା ଶୁଣି ବିନଦାସ ଦାସବାବୁ ହସିଦେଇ କହିଲେ ମାଉସୀ ମନକଣ ପାଇଁ ଦୁଃଖ କରିବି । ଏମିତି ରାତିସାରା ଶୋଇନାହିଁ ତ ଟିକେ ନିଦ ଲାଗୁଥିଲା । ରୁହନ୍ତୁ ଯାଉଛି ମିଠା ଆଣେ । ଅତି ଆନନ୍ଦରେ ମିଠା ଆଣି ହସ୍ପିଟାଲରେ ବାଣ୍ଟିଲେ ଦାସବାବୁ । ସତ କହିଲେ ଝିଅ ଓ ପୁଅକୁ ନେଇ ଦାସବାବୁଙ୍କ ମନରେ ଯେମିତି କିଛି ଭାବନା ନାହିଁ କେବଳ ପରିବାର ଲୋକଙ୍କ କଥା ଭାବି ତାଙ୍କ ମନରେ ଏମିତି ଭାବନା ସୃଷ୍ଟି ହୋଇଥିଲା ।
ଆରେ ଗୁରୁଜନମାନେ କହିଛନ୍ତି ଯଦି ପ୍ରଥମେ ଝିଅ ହୁଏ , ତେବେ ପିତାମାତାଙ୍କ ଆୟୂୁସ ବଢିଯାଏ । ଜନ୍ମ ନେବା କ୍ଷଣି ଝିଅଟି ପିତାମାତାଙ୍କୁ ଏପରି ଆର୍ଶୀବାଦ ଦେଇଥାଏ ।
ଏହାରି ଭିତରେ ଦାସବାବୁଙ୍କ ଝିଅ ବଡ଼ ହୋଇଯାଇଛି । ଦେଖିବାକୁ ଯେମିତି ସୁନ୍ଦର, ଗୁଣରେ ମଧ୍ୟ ସେତିକି ସୁନ୍ଦର । ପିଲାଟି ଦିନରୁ ଆଜି ଯାଏ ସେ କେବେ ବାପା-ମାଆଙ୍କ ପାଇଁ ବୋଝ ହୋଇନାହିଁ, ବଂର ବାପା-ମାଆ ତା ପାଇଁ ଗର୍ବିତ । ପ୍ରଥମ ରୁ, ଡ଼ିଗ୍ରୀ ହାସଲ ଯାଏ ଭଲ ପାଠପଢି ବାପାମାଅଙ୍କ ନାଁ ସୁନାମ କରିଛି ସେ । ଖଣ୍ଡମଣ୍ଡଳରେ ଦାସବାବୁ ତାଙ୍କ ଝିଅ ସୋନାଲି ପାଇଁ ପରିଚିତ । କାରଣ ସୋନାଲି ଏବେ ସେ ଅଚଂଳର ଜଣେ ପ୍ରତିଷ୍ଠିତ ଡ଼ାକ୍ତର । ବାପାମାଆଙ୍କ ଏକମାତ୍ର କନ୍ୟା ସନ୍ତାନ ହେଉଛି ସୋନାଲି । ଭାରି ଅଲିଅଳି । ଏହାରି ଭିତରେ ଦାସବାବୁ ଜଣେ ଅଧ୍ୟାପକ ଦେଖି ସୋନାଲିଙ୍କୁ ବିବାହ କରିଦେଲେ । ମନେମନେ ଭାବିଲେ ଝିଅ ତ ବାହାହୋଇଗଲା , ପରଧନ ହୋଇଗଲା । ଏବେ ସେ ଓ ତାଙ୍କ ସ୍ତ୍ରୀ ଏକୁଟିଆ ହୋଇଗଲେ । ହେଲେ ସୋନାଲି କିନ୍ତୁ ଥିଲା ସୁନା ଝିଅ । ସେ ଅଭାବ କେବେ ବାପାମାଆଙ୍କ ମନରେ ଦେଇନଥିଲା । ଶେଷରେ ୬୫ ବର୍ଷରେ ଦାସବାବୁଙ୍କ କୀଡ଼ିନ ଖରାପ ହୋଇଯାଇଛି । ଚିକିତ୍ସା ପାଇଁ ବଡ଼ ହସ୍ପିଟାଲରେ ଭତ୍ତିକଲେ । ହେଲେ ବାପାଙ୍କ ଜୀବନ ବଂଚାଇବାକୁ ଯାଇ ସୋନାଲି ନିଜ ଗୋଟିଏ କିଡ଼ୀନ ଦାନ କଲେ । ଏକଥା ଦାସବାବୁ ମଧ୍ୟ ଜାଣିନଥିଲେ । ଶେଷରେ ଦାସବାବୁ ନୂଆ ଜୀବନ ବି ପାଇଲେ ଝିଅ ପାଇଁ ।
ଆଜି ଅନେକ ଦାସବାବୁ ନିଜ ଝିଅ ପାଇଁ ନୂଆ ଜୀବନ ପାଇବା ସହ ଝିଅଙ୍କୁ ନେଇ ଗର୍ବ ମନେକରୁଛନ୍ତି । କାରଣ ପୁଅ ଠାରୁ କୌଣସି ଗୁଣରେ ଝିଅଟିଏ କମ ନୁହେଁ । ସମାଜରେ ଅନେକ ପୁଅ ବିବାହ ହେବା ପରେ ବାପାମାଆଙ୍କୁ ବୃଦ୍ଧାଶ୍ରମରେ ଛାଡ଼ିବାକୁ ମଧ୍ୟ ପଛାଉନାହାନ୍ତି । ହେଲେ ଝିଅମାନଙ୍କ କ୍ଷେତ୍ରରେ କିନ୍ତୁ ଏହାକମ ଦେଖାଯାଉଛି । ସବୁ ସହି ଝିଅଟିଏ ଅନ୍ୟକୁ ଆନନ୍ଦରେ ବଂଚିବାକୁ ଦିଏ । ସେ ବାପା ହୋଇପାରେ କି ସ୍ୱାମୀ,ଭାଇ ।
ତେଣୁ ଯୁଗେଯୁଗେ ଝିଅର ସ୍ଥାନ ପରିବାରରେ ସ୍ୱତନ୍ତ୍ର । ଆଜି ଝିଅ ଦିବସରେ ପ୍ରତ୍ୟେକ ବାପାମାଆ ନିଜ ଝିଅଙ୍କୁ ସ୍ୱାଧୀନତା ଦେବା ସହ ସେମାନଙ୍କ ମନକଥା ବୁଝିବା ଦରକାର । ଝିଅ ଜନମ ପର ଘରକୁ ହୋଇଥିଲେ ମଧ୍ୟ ସେ ସବୁବେଳେ ନିଜ ଘର ଚିନ୍ତାରେ ବୁଡ଼ିରହେ ।
