() ଶୀତୁଆ ସନ୍ଧ୍ୟାର ହାଲୁକା ପବନରେ ଦେହ ଥରି ଯାଉଥାଏ। ତାହାରି ଭିତରେ ଚମକ ଭରିଥିଲା ବ୍ୟାସନଗର ସହରରେ ଆୟୋଜିତ ହୋଇଥିବା ରଙ୍ଗାରଙ୍ଗ କାର୍ଯ୍ୟକ୍ରମ ବ୍ୟାସ ଧୂନ୍ ମ୍ୟୁଜିକାଲ୍ ନାଇଟ୍ । ବଲିଉଡ୍ କଣ୍ଠଶିଳ୍ପୀ ମହମ୍ମଦ ଦାନିଶ୍ ଓ ଚେତନା ଭରଦ୍ୱାଜଙ୍କ ଗୀତରେ ଝୁମି ଉଠିଥିଲା ବ୍ୟାସନଗର ସହର। ଅବସର ଥିଲା ବ୍ୟାସ ଧୂନ୍ ମ୍ୟୁଜିକାଲ୍ ନାଇଟ୍ ର ଉଦ୍ଘାଟନୀ ସନ୍ଧ୍ୟା। କାର୍ଯ୍ୟକ୍ରମ ପାଇଁ ସନ୍ଧ୍ୟାରୁ ପୂରି ଉଠିଥିଲା ଏନ୍.ସି ର ଖେଳପଡିଆ। ଗଣେଶ ବନ୍ଦନାରୁ ଆରମ୍ଭ ହୋଇଥିଲା କାର୍ଯ୍ୟକ୍ରମର ସନ୍ଧ୍ୟା। ଲୋକଙ୍କ ଉତ୍କଣ୍ଠାକୁ ଦେଖି ଶୀତୁଆ ସନ୍ଧ୍ୟାକୁ ମତୁଆଲା କରିବାକୁ ମଞ୍ଚକୁ ଆସିଥିଲେ ପ୍ରସିଦ୍ଧ କଣ୍ଠଶିଳ୍ପୀ ମହମ୍ମଦ ଦାନିଶ ଓ ଚେତନା ଭରଦ୍ୱାଜ। ପ୍ରଥମେ ମଞ୍ଚକୁ ଚଢ଼ିଥିଲେ ବଲିଉଡ୍ ଗାୟକ ମହମ୍ମଦ ଦାନିଶ୍ ଲଗନ୍ ଲଗି..’ରୁ ଆରମ୍ଭ କରିଥିଲେ କାର୍ଯ୍ୟକ୍ରମ। ପରକୁପର ‘ମେରେ ରସ୍କେ କମର…’, ‘ତେରେ କୁର୍ବାନ’, ‘ଲେକ ପେହେଲା ପ୍ୟାର୍..’ ପରିବେଷଣ କରି ଦର୍ଶକଙ୍କୁ ଝୁମାଇ ଥିଲେ ଦାନିଶ୍।
ପରେ ମଞ୍ଚକୁ ଚଢ଼ିଥିଲେ ବଲିଉଡ୍ ଗାୟିକା ଚେତନା ଭରଦ୍ୱାଜ । ‘ଇନ୍ତିଂହାନ ହୋଗୟୀ ଇନ୍ତିଯାର କି…’ ଠାରୁ ଆରମ୍ଭ କରି ଗୋଟିକ ପରେ ଗୋଟିଏ ଜମାଣିଆ ଗୀତ ଭେଟି ଦେଇଥିଲେ। ଗୀତର ତାଳେ ତାଳେ ନାଚି ଉଠିଥିଲେ ଦର୍ଶକ। ଶେଷକୁ ଏଥିରେ ଆଉଟିକେ ତଡକା ଦେଇଥିଲା କଲିକତାର ରୁଡିରକର୍ ଡାନ୍ସଗ୍ରୁପ ର ଡାନ୍ସ ।
ରଙ୍ଗାରଙ୍ଗ କାର୍ଯ୍ୟକ୍ରମକୁ ଭରପୁର ଉପଭୋଗ କରିଥିଲେ ବ୍ୟାସନଗର ସହରବାସୀ। କାର୍ଯ୍ୟକ୍ରମରେ ମୁଖ୍ୟଅତିଥିଭାବେ କୋରେଇ ବିଧାୟକ ଶ୍ରୀଯୁକ୍ତ ଅଶୋକ ବଳ ଓ ସମ୍ମାନିତ ଅତିଥି ମୋ କଲେଜ ଅଧକ୍ଷ ଆକାଶ ଦାସ ନାୟକ ଯୋଗ ଦେଇଥିଲେ । ଏହି କାର୍ଯ୍ଯକ୍ରମକୁ ସଫଳ ରୂପାୟନ କରିବାରେ ଗ୍ରାମ୍ୟ ଉନ୍ନୟନ, ଦକ୍ଷତା ବିକାଶ ଓ ବୈଶୟିକ ଶିକ୍ଷା ବିକାଶ ମନ୍ତ୍ରୀ ଇଂ ପ୍ରୀତି ରଞ୍ଜନ ଘଡାଇ ମୂଖ୍ୟ ଭୂମିକା ଗ୍ରହଣ କରିଥିଲେ। ଏହି ଅବସରରେ ଏନ୍.ସି ସ୍କୁଲର ପ୍ରଧାନ ଶିକ୍ଷକ ଲକ୍ଷ୍ମୀଧର ବେହୁରିଙ୍କୁ ସମ୍ମାନିତ କରାଯିବା ସହ ବଲିଉଡ୍ ଗାୟିକା ଚେତନା ଭରଦ୍ୱାଜ ଓ ବଲିଉଡ୍ ଗାୟକ ମହମ୍ମଦ ଦାନିଶ୍ ଙ୍କୁସମ୍ମାନିତ କରାଯାଇଥିଲା।
ଏହି କାର୍ଯ୍ୟକ୍ରମକୁ ଆୟୋଜନ କରିଥିଲେ ଏନ୍.ସି ସ୍କୁଲର ପୁରାତନ ଛାତ୍ର।
