ଭୁବନେଶ୍ୱର : ଆଜିକାଲି ସାମ୍ବାଦିକଙ୍କ ବ୍ୟବହାରକୁ ନେଇ ଅନେକ ସମାଲୋଚନା ଚାଲିଛି। ସେମାନେ ପଚାରୁଥିବା ପ୍ରଶ୍ନକୁ ଯିଏ ନାପସନ୍ଦ କରୁଛନ୍ତି, ସେମାନଙ୍କ ମତରେ ସାମ୍ବାଦିକଙ୍କ ହୃଦୟ ନାହିଁ। ହେଲେ ଆମେ ଆପଣଙ୍କୁ ଏପରି ଜଣେ ସାମ୍ବାଦିକଙ୍କ କଥା କହୁଛୁ, ଯିଏ ଲାଇଭ ସମୟରେ ଭାବବିହୋଳ ହୋଇପଡ଼ିଲେ। ସ୍ୱାଧୀନତା ଦିବସ ସନ୍ଧ୍ୟାରେ ଭାରତୀୟ କ୍ରିକେଟ ଟିମର ପୂର୍ବତନ ଅଧିନାୟକ ଅବସର ଗ୍ରହଣ କଲେ। ସେ ପ୍ରସଙ୍ଗରେ ନନ୍ଦିଘୋଷ ଟିଭିର ସାମ୍ବାଦିକ ପ୍ରିୟ ପ୍ରୀତମ ମହାନ୍ତି ଓ ଉପସ୍ଥାପକ ଅବିନାଶ ଷଡ଼ଙ୍ଗୀଙ୍କ ମଧ୍ୟରେ ଲାଇଭ ଆଲୋଚନା ଚାଲିଥିଲା। ହେଲେ ହଠାତ ପ୍ରିୟ ପ୍ରୀତମ କାନ୍ଦି ପକାଇଲେ। କାରଣ ଧୋନୀଙ୍କ ଅବସର ତାଙ୍କୁ ମର୍ମାହତ କରିଥିଲା। ଧୋନୀ ଖେଳକୁ ଅଳବିଦା କହିବାରୁ ଅଗଣିତ ଫ୍ୟାନସଙ୍କ ଦୁଃଖ ଟିଭିରେ ଦେଖାଉଥିବା ସାମ୍ବାଦିକ ନିଜ କୋହ ରୋକି ପାରିଲେ ନାହିଁ। ଅବଶ୍ୟ ଟିଭି ପରଦାରେ ଯେଉଁ ସାମ୍ବାଦିକ ସବୁ କିଛି ଭୁଲି ଖବର ପରିବେଷଣ କରେ, ସେ ବି ଜଣେ ମଣିଷ। ମେସିନ ନିହେଁ। ସେ ବି ଜଣେ ଫ୍ୟାନ, ତାର ବି ହୃଦୟ ଅଛି। ଦେଶର ମହାନ ଲୋକଙ୍କ ପାଇଁ ତା ଆଖିରୁ ବି ଲୁହ ବାହାରେ। ତେବେ ପ୍ରିୟ ପ୍ରୀତମଙ୍କ ଲୁହ କୌଣସି ଅଯଥା ଲୋକ ପାଇଁ ନଥିଲା। ଦେଶକୁ ଦୁଇଟି ବିଶ୍ୱକପ ଜିତାଇ ଥିବା ମହାନ ଅଧିନାୟକ ଧୋନୀଙ୍କ ଅବସର ଦୁଃଖରେ ଥିଲା।
ଏ କଥା ସେ ସବୁ ଲୋକଙ୍କ ପାଇଁ ଯିଏ ଭାବନ୍ତି ଯେ ସାମ୍ବାଦିକମାନେ ମର୍ଯ୍ୟାଦା ଜାଣି ନାହାନ୍ତି, ହୃଦୟ ପଥର! ଆମେ ସାମ୍ବାଦିକ ବି ମଣିଷ। ଟିଭି ଆଗରେ ଯବାନ ସହିଦ ଖବର ବେଳେ କି ଧୋନୀଙ୍କ ଅବସର ସମୟରେ ଆମ ଆଖି ଲୁହରେ କାନ୍ଦେ ଆଉ ହୃଦୟ କାନ୍ଦେ ଲହୁରେ। ପ୍ରିୟ ପ୍ରୀତମଙ୍କ କାନ୍ଦିବା ସମୟର ଭିଡ଼ିଓ ଭାଇରାଲ ହେବା ପରେ ସବୁ ସାମ୍ବାଦିକମାନଙ୍କ ବି ସମାନ ପ୍ରଶ୍ନ, “ଆମେ କଣ ମଣିଷ ନୁହେଁ?”
