ଭୁବନେଶ୍ୱର: ଏବେ ସାରା ଦେଶରେ କରୋନା ମାଡି ଚାଲିଛି। ଏଥିପାଇଁ ରାଜ୍ୟରେ ପର୍ଯ୍ୟାପ୍ତ ପରିମାଣର କରୋନା ପ୍ରତିରୋଧକ ସାମଗ୍ରୀ କିଣୁଛନ୍ତି ରାଜ୍ୟ ସରକାର। ହେଲେ ଏଥିରେ ଦୁର୍ନୀତିର ଗନ୍ଧ ବାରିଛି ରାଜ୍ୟ କଂଗ୍ରେସ । ଆଜି ଏକ ସାମ୍ବାଦିକ ସମ୍ମିଳନିରେ ଶ୍ରମମନ୍ତ୍ରୀ ସୁଶାନ୍ତ ସିଂଙ୍କ ଇସ୍ତଫା ଦାବି କରିଛି ରାଜ୍ୟ କଂଗ୍ରେସ। ଶ୍ରମିକଙ୍କୁ ଟୁଲ କିଟ୍ ଓ ସେଫ୍ଟି ଶୁଜ୍ ଦେବାରେ ରାଜ୍ୟ ବ୍ୟାପୀ ତିନି ସହ କୋଟି ଟଙ୍କାର ଦୁର୍ନୀତି ଅଭିଯୋଗ ଆଣିଲେ ପ୍ରଦୀପ ମାଝୀ ।
ଏବେ ରାଜ୍ୟର ଶ୍ରମିକମାନେ ଅନେକ ସମସ୍ୟା ଦେଇ ଗତି କରୁଛନ୍ତି।ହେଲେ ଶ୍ରମିକମାନଙ୍କ ସମସ୍ୟା ଦୂର କରିବା ପରିବର୍ତ୍ତେ ରାଜ୍ୟ ସରକାର ତାଙ୍କୁ ଶୋଷଣ କରୁଛନ୍ତି। ଏଥିରେ ସିଧାସଳଖ ଭାବେ ରାଜ୍ୟର ଶ୍ରମ ମନ୍ତ୍ରୀ ସମ୍ପୃକ୍ତ ଅଛନ୍ତି।ବିଶେଷ କରି ଶ୍ରମିକଙ୍କୁ ଟୁଲ କିଟ୍ ଓ ସେଫଟି ଶୁଜ୍ ଶ୍ରମିକଙ୍କୁ ଦେବାରେ ୩୦୦ କୋଟି ଟଙ୍କାର ଦୁର୍ନୀତି ହୋଇଛି। କଂଗ୍ରେସ ନେତା ପ୍ରଦୀପ ମାଝୀ କହିଛନ୍ତି ମାଲକାନଗିରି, କଟକ ଓ ଅନୁଗୁଳ ଏହି ଦୁର୍ନୀତି ଅଧିକ ପରିମାଣର ହୋଇଛି।ମାଲକାନଗିରି ଜିଲ୍ଲାପାଳ ମନିଷ ଅଗ୍ରୱାଲ, କଟକ ଜିଲ୍ଲାପାଳ ଅରବିନ୍ଦ ଅଗ୍ରୱାଲ ଓ ଅନୁଗୁଳ ଜିଲ୍ଲାପାଳ ଅନିଲ କୁମାର ସାମଲଙ୍କ ସହ ମନ୍ତ୍ରୀ ସୁଶାନ୍ତ ସିଂ ଙ୍କୁ ତଦନ୍ତ ଘେରକୁ ଆଣିବା ପାଇଁ ଦାବି କରିଛନ୍ତି।
ଏହାସହ ଭୁବନେଶ୍ୱର ବମିଖାଲସ୍ଥିତ ଭାରତ ଇଣ୍ଡଷ୍ଟ୍ରିଆଲ କର୍ପୋରେସନରୁ ୧୨ ଟଙ୍କାର ଚଷମାକୁ ଷାଠିଏ ଟଙ୍କାରେ ବିକ୍ରିକରାଯାଉଛି।୧୮୫ ଟଙ୍କା ଜୋତାକୁ ୪୧୩ରେ ଓ ୧୦ ଟଙ୍କାର ଗ୍ଲୋଭ୍ସକୁ ୯୦ ଟଙ୍କା ଦେବାକୁପଡୁଛି।ସେହିପରି ୪୫ ଟଙ୍କାର ହେଲମେଟକୁ ୧୧୦ଟଙ୍କା ଆଉ ଅଢେଇ ଟଙ୍କାର ମାସ୍କକୁ ୮୦ ଟଙ୍କାରେ କିଣିଛନ୍ତି ଶ୍ରମିକମାନେ। ବର୍ତ୍ତମାନ ଖାଇବାକୁ ପାଉ ନଥିବା ଶ୍ରମିକ ଏତେ ଅଧିକ ମୂଲ୍ୟ ଦେଇ ସୁରକ୍ଷା ସାମଗ୍ରୀ କିଣିବା ରାଜ୍ୟ ସରକାରଙ୍କ ପାରିବା ପଣିଆକୁ ପଦାରେ ପକେଇଛି। ଏହି ସାମ୍ବାଦିକ ସମ୍ମିଳନୀରେ କଂଗ୍ରେସର ବରିଷ୍ଠ ନେତା ପଞ୍ଚାନନ କାନୁନଗୋ, ନାରୀ ନେତ୍ରୀ ସ୍ମୃତିରେଖା ପହି ଓ ରଶ୍ମି ମହାପାତ୍ର ପ୍ରମୂଖ ଉପସ୍ଥିତ ଥିଲେ।
