ଯାଜପୁର : ଜନ୍ମାଷ୍ଟମୀ ପାଇଁ ଗାଁ ଠୁ ସହର ଆଜି ଉତ୍ସବ ମୁଖର। ବୃନ୍ଦାବନରୁ ବିରଜା କ୍ଷେତ୍ର ଯାଏଁ ପାଳନ କରାଯାଉଛି ଜନ୍ମାଷ୍ଟମୀ। ଭାଦ୍ରବ ମାସ କୃଷ୍ଣପକ୍ଷରେ ଏହି ପର୍ଵ ପାଳନ କରାଯାଏ । ଏହି ଦିନ ପ୍ରଭୁ ଶ୍ରୀ କୃଷ୍ଣଙ୍କ ଜନ୍ମତିଥିକୁ ଧୁମଧାମରେ ପାଳନ କରାଯାଏ ଯାଜପୁର ଜିଲ୍ଲାର କୋଟବସନ୍ତପୁର ଛୋଟ ଗ୍ରାମରେ । ବନ୍ଦୀଶାଳରେ ମହାପ୍ରଭୁ ଜନ୍ମ ନେବା ପରେ ଗୋପପୁରକୁ ଯିବା ପାଇଁ ରାତି ଅଧିରେ ବାହାରି ଥାଆନ୍ତି। ଦେବକୀ କୋଳରୁ ଯଶୋଦା କୋଳକୁ ଯିବା ପାଇଁ ପିତା ବାସୁଦେଵ କୃଷ୍ଣଙ୍କୁ କାନ୍ଧେଇ ବାହାରିଥାନ୍ତି। ଠିକ୍ ଏହି ସମୟରେ ଦ୍ଵାର ପାଖରେ ଜଗି ବସିଛନ୍ତି ଉଗ୍ରସେନ। ବାସୁଦେବ ଯେତେ ନେହୁରା ହେଲେ ବି ଉଗ୍ରସେନ କିନ୍ତୁ ଛାଡିବାକୁ ନାରାଜ। ଠିକ୍ ଏହି ଘଟଣାବଳିକୁ ଜନ୍ମାଷ୍ଟମୀ ଦିନ କୋଟବସନ୍ତପୁରରେ ଗୀତିନାଟ୍ୟ ଆକାରରେ ବର୍ଣ୍ଣନା କରାଯାଏ। ବିଭିନ୍ନ ଚରିତ୍ରରେ ଲୋକ ଏଠାରେ ଅଭିନୟ କରିଥାନ୍ତି। ଏହା ପବିତ୍ର ମୁହୂର୍ତ୍ତକୁ ଦେଖିବା ପାଇଁ ଅନେକ ଭକ୍ତ ମଧ୍ୟ ଏକାଠି ହୋଇଥାନ୍ତି। ଏହାପରେ ପୂଜକ ଗୀତ ଆରମ୍ଭ କରନ୍ତି ଆମ୍ଭେ ଗୋ ଯିବୁ ଗୋପପୁର । ଗୀତର ଦୁଇଟି ପନ୍ତି ଉପସ୍ଥିତ ଥିବା ସମସ୍ତ ଭକ୍ତଙ୍କ ଆଖିରୁ ଲୁହ ଝରାଇଦିଏ। ଏହି ଦୁଇ ପନ୍ତି ହେଉଛି। ଆମ୍ଭେ ଗୋ ଯିବୁ ଗୋପପୁର ।ପରେ ଉଗ୍ରସେନ ଯେତେବେଳେ କହନ୍ତି ଦେଖାଅ ଶଙ୍ଖ ଚକ୍ର ଚିହ୍ନ । ସେତେବେଳେ ଉଗ୍ରସେନଙ୍କୁ ପ୍ରଭୁ ଶ୍ରୀକୃଷ୍ଣଙ୍କୁ ଦେଖାଇ ଥାଆନ୍ତି ବାସୁଦେବ। ବାସ୍ ଠାକୁରଙ୍କ ଦର୍ଶନ ପାଇଁ ଵସିଭୂତ ହୋଇ ଯାଇଛନ୍ତି ଉଗ୍ରସେନ। ଏହାପରେ ସେ ପ୍ରଭୁଙ୍କୁ ବାଟ ଛାଡି ଦେଇଛନ୍ତି। ଏହି ଘଟଣାବଳି ଯେତେବେଳେ କୋଟବସନ୍ତପୁର ମହାପାତ୍ର ପରିବାରର ଠାକୁର ଘର ସାମ୍ନାରେ ପରିବେଷଣ ହୁଏ । ସେ ସମୟରେ ଭାବ ବିହ୍ଵଳ ହୋଇଯାଏ ପୁରା ପରିବେଶ ।
ସାରାଦେଶରେ ଯେତେବେଳେ ଜନ୍ମାଷ୍ଟମୀ ପାଳନ ହୁଏ । ତାର ଠିକ୍ ପରଦିନ ଯାଜପୁରରେ ଏହି ପର୍ବ ପାଳନ କରାଯାଏ। ଏଥର କରୋନା କଟକଣା ମଧ୍ୟରେ ପାଳନ କରାଯାଇଛି ।ହେଲେ ଆଧ୍ୟାତ୍ମିକ ଚିନ୍ତା ଚେତନାକୁ ପ୍ରତିହତ କରିପାରିନାହିଁ ।ଲୋକମାନେ ମନ୍ଦିର ନଯାଇ ନିଜ ଘରେ ରହି ମଧ୍ୟ ବହୁତ ଆନନ୍ଦ ଉଲ୍ଲାସରେ ଜନ୍ମାଷ୍ଟମୀ ପାଳନ କରିଛନ୍ତି ।
