ତୋ ପ୍ରତି ମୋର ଏ ଦୁର୍ବଳତା କାହିକିଁ ? ଆର ଜନ୍ମରେ କଣ ଥିଲା ତୋର ମୋର ସର୍ମ୍ପକ ସେ କଥା ବି ଜାଣେନା? କାହିଁକି ଏତେ ଗହଳି ଭିତରେ ବି ତୋ ଛବି ମତେ ଜଳଜଳ କରି ଦିଶେ ତାର ଉତ୍ତର ବି ଖୋଜି ପାଇନା । ଯେଉଁଠି ଥିଲେ ବି ତୋ କଥା ସବୁବେଳେ ମନେ ପଡ଼େ । ସବୁଠି ତତେ ହିଁ ଖୋଜେ । 
ଲାଗେ ଯେମିତି ସଭିଁଙ୍କ ଭିତରେ ଅଛୁ ତୁ । ତୁ ତ ସେମିତି । ଯେତିକି ସୁନ୍ଦର , ସେତିକି ବିଶାଳ ହୃଦୟ ତୋର । ଏମିତି କି ସଭିଁଙ୍କୁ ଆପଣାର କରିବାର ଯାଦୁ ତୋ ପାଖରେ ଅଛି । ଏହାସହ ପ୍ରକୃତି ଗନ୍ଥାଗାର ତୁ । ତୋ କୋଳରେ ରହିଛି ଆନନ୍ଦ ,ଆନନ୍ଦ ଆଉ ଆନନ୍ଦ । ହଁ ପୂର୍ବଥର ଦୋଳକୁ ତୋ ପାଖକୁ ଯାଇନଥିଲେ । ହେଲେ ଏଥର କଟକଣା ଭିତରେ ବି ତୋ ସହ ଦୋଳରେ ଦେଖା କରିବାକୁ ଭାରି ଇଚ୍ଛା ଥିଲା । ତେଣୁ ଆଉ ରହି ପାରିଲିନି । ଆଉ ଗଲି ମଧ୍ୟ । ଦୋଳ ପୁର୍ଣ୍ଣମାରେ ତୋର ରଙ୍ଗୀନ ରୂପ ଦେଖିବାକୁ । ବହୁତ ଖୋଜିଲି ତତେ । ଟିକେ ଦେଖା କରିବା ପାଇଁ । ହେଲେ ତୁ କାହିଁ ପୁରୁଣା ବର୍ଷ ପରି ମତେ ସେତିକି ଦେଖାଦେଲୁନି । କାରଣ ମୋ ପରି ତ ତତେ ଭଲପାଉଥିବା ପ୍ରମିକ ହଜାର । ତୁ ବା କାହିଁ ମତେ ସେତେ ଗୁରୁତ୍ୱ ଦେବୁ । ହେଲେ ନାଁ ଏକଥା ଲେଖିବା ବି ପାପ ନୁହେଁ, ତ ମହାପାପ । 
ତୋ ପାଇଁ ତ ମୋ ପରିଚୟ । ତୁ ତ ମୋର ସବୁକିଛି । ତୁ ସ୍କୃତି, ତୁ ଅତୀତ , ତୁ ବର୍ତ୍ତମାନ ଆଉ ତୁ ହିଁ ମୋ ଭବିଷ୍ୟତ । ତୋ ପାଖକୁ ଗଲେ ମୁଁ ସବୁକିିଛି ଭୂଲିଯାଏ । ଦୁନିଆ ଯେମିତି ମୋର ତୋ ପାଖରେ ସରିଯାଇଛି । ବାଦଲ ଭରା ଆକାଶରେ କେତେବେଳେ ସକାଳ ସଞ୍ଜରେ ତୋ ସହ କଟାଇଛି, ତ ଆଉ କେତେବେଳେ କାଳବୈଶାଖୀ ଘଡ଼ଘଡ଼ି ବର୍ଷାରେ ତୋ ସହ ଭିଜିଛି । ସବୁ ଆଜି ମନେ ପଡ଼େ । ତୋ ସହ କେତେ ଯେ କଣ ସ୍କୃତି ମୁଁ ସାଉଁଟୁଛି । କେବଳ ଅନୁଭବ ଭିତରେ ସେ ସବୁ ଆଜି ଜୀବିତ । ତୁ ସୁନ୍ଦର ଆଉ ଉଦାରତା, ଶାନ୍ତି, ଭାଇଚାର , ପ୍ରେମର ପ୍ରତୀକ । ଆଜି ତୁ ନୂଆରୂପରେ ସଜେଇ ହୋଇଛୁ । ବଦଳିଛି ତୋ ରୂପ ଲାବଣ୍ୟ । ମୁଁ ଟିକେ ବଦଳିଯାଇଛି । ସବୁଦିନ ତୋ ସହ ଦେଖାହୋଇପାରୁନାହିଁ । ଇ୍ଛା ଥିଲେ ବି ଅନେକ ସମୟରେ ତୋ ପାଖକୁ ଯାଇପାରୁନାହିଁ । ତୋ ସହ ଏବେ ଅନେକ ନୂଆ ସର୍ମ୍ପକ ଗଢିଛନ୍ତି , ମୋ ଠାରୁ ଢେର ତତେ ଭଲ ପାଉଛନ୍ତି । କେତେ କଣ ତୋ ପାଇଁ କରୁଛନ୍ତି । ହେଲେ ମୁଁ ତ ତୋ ଦୁର୍ବଳତା ପାଖରେ ଅଟିଛି ଯାଇଛି । ହେଲେ ତୋ ଦୁର୍ବଳତାର ଶକ୍ତି ପରମାଣୁ ବୋମା ଠାରୁ ବି ଶକ୍ତିଶାଳୀ । ଯାହା ଆଜି ମତେ ଅଜଣା ସହରରେ ବଞ୍ଚାଇ ରଖିଛି । ସେଥିପାଇଁ ମୁଁ କହେ ତୁ ଖୁସିର ମାଟି…..,
