() ପବିତ୍ର ଶୁଭ ସୁନିଆଁ ଅବସରରେ ମା’ ବିରଜା ଦେବୀଙ୍କ ବନଯାଗ ପର୍ବ ଅପରାହ୍ନରେ ପାଳିତ ହୋଇଛି । ଯଥାରୀତି ଅନୁଯାୟୀ ଆଜି ଯଜ୍ଞ ମଣ୍ଡପରେ ବନଯାଗ ବିଧିର କର୍ମ ଆରମ୍ଭ କରାଯାଇ ପୁରୋଧା ମାନଙ୍କ ଦ୍ୱାରା ସେବାୟତ ମାନଙ୍କୁ ମଙ୍ଗଳାର୍ପଣ କରାଯାଇଥିଲା । ବିଧିମଣ୍ଡପରେ ପୂଜା ସାରିବା ପରେ ବନଯାଗ ଯାତ୍ରା ଆରମ୍ଭ ହୋଇଥିଲା । ଆର୍ଶା ପାଳିଆ, ଚରୁ ପାଳିଆ, ସମିଧ୍ୟ ପାଳିଆ, ନାହକ, ବାରିକ ଙ୍କ ସମେତ ସମସ୍ତ ସେବାୟତ ଉପସ୍ଥିତ ରହି ନିଜର ଦାୟିତ୍ୱ ସମ୍ପାଦନ କରିଥିଲେ । ବିଶ୍ୱକର୍ମାଙ୍କୁ ରଥ କାର୍ଯ୍ୟ ଆରମ୍ଭ କରିବାକୁ ଅନୁମତି ଦିଆଯାଇଛି । ମନ୍ଦିରର ପୂଜା କାର୍ଯ୍ୟ ପରେ ମନ୍ଦିରର ମୁଖ୍ୟ ପରିଚାଳକ ତଥା ଉପ-ଜିଲ୍ଲାପାଳ ଶରତ ଚନ୍ଦ୍ର ମହାପାତ୍ରଙ୍କ ତରଫରୁ ସହକାରୀ ଜିଲ୍ଲାପାଳ ସାସ୍ୱତ ପଟନାୟକଙ୍କ ଉପସ୍ଥିତିରେ ସମସ୍ତ ପୁରୋଧା, ପୂଜକ ଶ୍ରୀ ଅଙ୍ଗଲାଗି ସେବାୟତ ଓ ଅନ୍ୟ ସମସ୍ତ ସେବାୟତ ପୂର୍ବ ନିର୍ଦ୍ଧାରିତ ବନଯାଗ ଯାତ୍ରାରେ ବାହାରି ଥିଲେ । ମନ୍ଦିରର ବାରିକ ସେବାୟତ ମାନଙ୍କ ଦ୍ୱାରା ସ୍ଥିର କରାଯାଇଥିବା ଶିରିଆପୁର ଗ୍ରାମର ବିଶ୍ୱନାଥ ମିଶ୍ରଙ୍କ ବାଡ଼ିରେ ଥିବା ଅଫଳନ୍ତି ଓ ଅକ୍ଷୁର୍ଣ୍ଣ (ବିଲ୍ୱ ବୃକ୍ଷ) ବେଲ ଗଛକୁ ପୂଜାର୍ଚ୍ଚନା କରାଯାଇ ସ୍ୱର୍ଣ୍ଣ ଛେଦନ କରାଯାଇଥିଲା । ପୂଜା କରାଯାଇ କଟାଯାଇଥିବା ଡାଳ ଖଣ୍ଡକୁ ଆଣିବା ପରେ ବିଧି ବଦ୍ଧ ଭାବରେ ରଥ କାର୍ଯ୍ୟ ଆଜିଠାରୁ ଆରମ୍ଭ କରାଯିବା ପାଇଁ ଅନୁମତି ଦିଆଯାଇଥାଏ । ମା’ଙ୍କ ସଂଧ୍ୟା ଆଳତୀ ପରେ ଏହି ଯାତ୍ରା ଶିରିଆପୁର ଗ୍ରାମକୁ ଯିବା ସମୟରେ ମଶାଲ, ଢ଼ୋଲ ବାଦ୍ୟରେ ଶୋଭାଯାତ୍ରା କରାଯାଇ ଥିଲା । ଶିରିଆପୁର ଗ୍ରାମର ବିଶ୍ୱନାଥ ମିଶ୍ରଙ୍କ ଘର ନିକଟରେ ସମସ୍ତେ ପହଂଚିବା ପରେ ସମସ୍ତ ବ୍ରାହ୍ମଣ ମାନଙ୍କୁ ତାଙ୍କ ପରିବାର ତରଫରୁ ସ୍ୱତନ୍ତ୍ର ଭାବରେ ଅତିଥି ସତ୍କାର କରାଯାଇଥିଲା । ସେଠାରେ ସମସ୍ତେ ପୂଜା କାର୍ଯ୍ୟ କରିବା ପରେ ଶୋଭାଯାତ୍ରାରେ ସମସ୍ତେ ଫେରି ମନ୍ଦିର ପ୍ରବେଶ କରିଥିଲେ ।
