() ଯାଜପୁରର ଅଧିଷ୍ଠାତ୍ରୀ ଦେବୀ ମା ବିରଜା।ଦେଶର ୫୧ଟି ଶକ୍ତିପୀଠ ମଧ୍ୟରୁ ମା ବିରଜା ପୀଠ ଅନ୍ୟତମ। ଦେଶର ଶକ୍ତିପୀଠ ମଧ୍ୟରେ ବିରଜା ପୀଠରେ କେବଳ ରଥଯାତ୍ରା ହୁଏ।ଅଧିଷ୍ଠାତ୍ରୀ ଦେବୀ ମା ବିରଜାଙ୍କ ପୀଠକୁ ପ୍ରତ୍ୟେକ ଦିନ ରାଜ୍ୟ ଓ ରାଜ୍ୟ ବାହାରୁ ହଜାର ହଜାର ସଂଖ୍ୟକ ଶ୍ରଦ୍ଧାଳୁମାନେ ମାଙ୍କ ଦର୍ଶନ କରିବା ପାଇଁ ଛୁଟି ଆସିଛନ୍ତି। ସବୁବେଳେ ମାଙ୍କ ପୀଠ ଚଳଚଂଚଳ। ହେଲେ ବର୍ଷକରୁ ଅଧିକ ସମୟଧରି ବିରଜା ମନ୍ଦିରର ସିଂହଦ୍ୱାର ଷ୍ଟ୍ରିଟ ଲାଇଟ ଖରାପ ହୋଇ ଯାଇଥିବାରୁ ପ୍ରବେଶ ପଥ ଅନ୍ଧାର ରହୁଛି। ଫଳରେ ମାଙ୍କୁ ଦର୍ଶନ କରିବାକୁ ଆସୁଥିବା ଶ୍ରଦ୍ଧାଳୁମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଯାହାକୁ ନେଇ ବିରଜା ମନ୍ଦିରର ପୂଜକମାନେ ଅସନ୍ତୋଷ ପ୍ରକାଶ କରିଛନ୍ତି। ଏପରି ପ୍ରବେଶ ପଥ ଅନ୍ଧାର ଥିବାରୁ ଚୋରୀର ଭୟ ମଧ୍ୟ ରହୁଛି। ତେଣୁ ତୁରନ୍ତ ଜିଲ୍ଲା ପ୍ରଶାସନ ସିଂହଦ୍ଵାର ଲାଇଟ୍ ମରାମତି କରିବାକୁ ସାଧାରଣରେ ଦାବି ହେଉଛି। ସରକାର ବଦଳିବା ପରେ ମା ବିରଜାଙ୍କ ପରିକ୍ରମା ପ୍ରକଳ୍ପ କାମ ମଧ୍ଯ ଠପ୍ ହୋଇଯାଇଥିବାରୁ ଯାଜପୁରବାସୀ ମାନେ ଚିନ୍ତାପ୍ରକଟ କରିଛନ୍ତି। ନିକଟରେ ଆଇନ ଓ ପୂର୍ତ୍ତ ବିଭାଗ ମନ୍ତ୍ରୀ ପୂର୍ଥିରାଜ ହରିଚନ୍ଦନ ମା ମନ୍ଦିରର ବିକାଶ କାମ ସମୀକ୍ଷା କରିଥିଲେ। ମନ୍ଦିର ବିକାଶ କାମ ଆରମ୍ଭ ହୋଇନଥିବା ବେଳେ ପ୍ରଵେଶ ପଥ ଅନ୍ଧାର ହେବା ସାଧାରଣରେ ଅସନ୍ତୋଷ ଦେଖାଦେଇଛି। କେବେ ଜିଲ୍ଲା ପ୍ରଶାସନର ନିଦ ଭାଙ୍ଗିବ, ପ୍ରଵେଶ ପଥରେ ଲାଇଟ ଜଳିବ ତାକୁ ଚାହିଁ ବସିଛନ୍ତି ଶ୍ରଦ୍ଧାଳୁମାନେ।
