() ଯାଜପୁରର ଗଣପର୍ବ କାଳୀପୂଜା ପାଇଁ ଉତ୍ସବ ମୁଖର ହୋଇଛି ଯାଜପୁର ସହର। ଦୁଇ ବର୍ଷ କରୋନା କଟକଣା ପାଇଁ ପୂଜାକୁ ସଂକୁଚିତ କରାଯାଇଥିବା ବେଳେ ଚଳିତ ବର୍ଷ ବେଶ୍ ଧୁମଧାମରେ ପାଳିତ ହେବାକୁ ଯାଉଛି ଗଣପର୍ବ ମା’ ଶ୍ୟାମାକାଳୀ ଓ ଲକ୍ଷ୍ମୀନାରାୟଣ ପୂଜା । ତେବେ ସହରରେ ନିଶା କାରବାର ଓ ଚୋରି ରୋକିବାକୁ ପୁଲିସ ପକ୍ଷରୁ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି।ସମଗ୍ର ରାଜ୍ୟରେ ଯାଜପୁରର ଶ୍ୟାମାକାଳୀ ପୂଜାର ସ୍ୱତନ୍ତ୍ରତା ରହିଛି । ଏହି ପୂଜାକୁ ଦେଖିବା ପାଇଁ ଦୂରଦୂରାନ୍ତରୁ ବହୁ ଶ୍ରଦ୍ଧାଳୁ ଦର୍ଶକ ଯାଜପୁର ସହରକୁ ଛୁଟି ଆସିଥାନ୍ତି । 
ସହରର କାଳୀପୂଜା ଦେଖିବା ପାଇଁ ଏହାର ପଡୋଶୀ ଭଦ୍ରକ ଓ କେନ୍ଦ୍ରାପଡା ଜିଲ୍ଲାର ଲୋକ ବୁଲିବାକୁ ଆସିଥାନ୍ତି। ବିଭିନ୍ନ ମଣ୍ଡପରେ ଆଜି ଠାରୁ ଲୋକଙ୍କ ଭିଡ ଦେଖିବାକୁ ମିଳିଥିବା ବେଳେ ଚଳିତ ବର୍ଷ ଶ୍ୟାମାକାଳୀ ଓ ଲକ୍ଷ୍ମୀନାରାୟଣ ପୂଜା ଅତ୍ୟନ୍ତ ଆକର୍ଷଣୀୟ ହୋଇପଡିଛି । ସହରର ପୂଜା ମଣ୍ଡପରେ ସୁଦୃଶ୍ୟ ତୋରଣ ମୂର୍ତିମାନ ବେଶ ଆକର୍ଷଣୀୟ ହୋଇଛି ।ପାଖାପାଖି ୫୦ଟି ମଣ୍ଡପରେ ମା’ ଶ୍ୟାମାକାଳୀ ଓ ଲକ୍ଷ୍ମୀନାରାୟଣଙ୍କ ମୃଣ୍ମୟ ମୂର୍ତ୍ତି ପୂଜା ପାଇବେ । ୧୧ଟି ମଣ୍ଡପରେ ଚାନ୍ଦିମେଢ଼ ପ୍ରସ୍ତୁତ କରାଯାଇଥିବା ବେଳେ ଏପରିକି କେତେକ ମଣ୍ଡପରେ ଗୋଲଡେନ ମେଢ଼ ମଧ୍ୟ ପ୍ରସ୍ତୁତ କରାଯାଇଛି । 
ଆସନ୍ତାକାଲି ଠାରୁ ବହୁ ପୂଜା ମଣ୍ଡପ ପକ୍ଷରୁ ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିବାର କାର୍ଯ୍ୟକ୍ରମ ରହିଛି । ତେବେ ୨/୩ ତାରିଖ ପର୍ଯ୍ୟନ୍ତ ଦୈନିକ ସହରରେ ସାଂସ୍କୃତିକ କାର୍ଯ୍ୟକ୍ରମର ଆସର ଜମିବ। ଶାନ୍ତି ଶୃଙ୍ଖଳା ପାଇଁ ପୁଲିସ ପ୍ରଶାସନ ପକ୍ଷରୁ ୧୦ ପ୍ଲାଟୁନ ଫୋର୍ସ ମୁତାୟନ କରାଯିବ । ପୁଲିସ ପ୍ରଶାସନ ପକ୍ଷରୁ ପୂଜା ଓ ଭସାଣିକୁ ଶାନ୍ତି ଶୃଙ୍ଖଳା ସହ ଶେଷ କରିବା ପାଇଁ ଯାଜପୁର ଆରକ୍ଷୀ ଅଧିକ୍ଷକ ରାହୁଲ ପିଆରଙ୍କ ପ୍ରତ୍ୟେକ୍ଷ ତତ୍ତ୍ୱାବଧାନରେ ଜଣେ ଅତିରିକ୍ତ ଆରକ୍ଷୀ ଅଧିକ୍ଷକ, ୪ଜଣ ଡିଏସପି, ୬ଜଣ ଇନ୍ସପେକ୍ଟର, ୧୭ଜଣ ସବ୍ଇନ୍ସପେକ୍ଟର, ୫୮ଜଣ ଏଏସଆଇ, ୧୭ ହାବିଲଦାର, ୧୧୩ କନେଷ୍ଟବଳ ଓ ୧୮୬ ହୋମଗାର୍ଡ଼ ଦାୟିତ୍ୱରେ ରହିଛନ୍ତି । ତେବେ ପୂଜା ସମୟରେ ନିଶା ଗ୍ରସ୍ତ ଲୋକଙ୍କୁ କାବୁ କରିବା ପାଇଁ ଟାଉନ ପୁଲିସ ପକ୍ଷରୁ ମଦୁଆ ଧରା ଗାଡିର ବ୍ୟବସ୍ଥା କରାଯାଇଛି।
ସେହିପରି ପୂଜାର ଭିଡରେ ପକେଟ ମାରୁର ଭୟ ରହିଥିବାରୁ ସମସ୍ତ ଲୋକେ ଏଥିପ୍ରତି ସତର୍କ ରହିବାକୁ ଟାଉନ ଥାନା ପକ୍ଷରୁ ନିବେଦନ କରାଯାଇଛି। ତେବେ ଆଜି ଠାରୁ ପୂର୍ବ ଘୋଷଣା ଅନୁସାରେ ସହରରେ ଟ୍ରାଫିକ କଟକଣାକୁ ଜାରି କରାଯାଇଛି।
