() ରାଜ୍ୟସଭା ସାଂସଦ ଭାବେ ଗଣତନ୍ତ୍ରର ପବିତ୍ର ମନ୍ଦିରରେ ଶପଥ ଗ୍ରହଣ କରିଛନ୍ତି ବିଜୁ ଜନତା ଦଳର ବରିଷ୍ଠ ନେତା ମାନସ ମଙ୍ଗରାଜ । ଉପରାଷ୍ଟ୍ରପତି ତଥା ରାଜ୍ୟସଭା ଅଧ୍ୟକ୍ଷ ଭେଙ୍କେୟା ନାଇଡ଼ୁ ତାଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି । ନିଜର ମାତୃଭାଷା ଓଡ଼ିଆରେ ଶପଥ ନେଇଥିଲେ ମାନସ ମଙ୍ଗରାଜ । ଦିଲ୍ଲୀରେ ନବୀନଙ୍କ ନୂଆ ଲଢୁଆ ସେନାପତି ଭାବରେ ସେ ଓଡ଼ିଶାର ସ୍ବାର୍ଥ ସମ୍ପର୍କିତ ବିଭିନ୍ନ ପ୍ରସଙ୍ଗ ଉଠାଇବେ ବୋଲି କହିଛନ୍ତି । ୨୦୦୨ ମସିହାରୁ ପ୍ରତ୍ୟେକ୍ଷ ରାଜନୀତିକୁ ଆସିଥିବା ମାନସ ନିଜର ସାଂଗଠନିକ ଦକ୍ଷତା ଓ ସାଧୁତା ପ୍ରଦର୍ଶନ କରିବା ସହ ଜଣେ ଅତ୍ୟନ୍ତ ନମ୍ର, ଭଦ୍ର, କର୍ମଠ ଓ ମିଷ୍ଠଭାଷୀ ବ୍ୟକ୍ତିଭାବରେ ରାଜ୍ୟବାସୀଙ୍କ ପାଖରେ ସୃଷ୍ଟି କରିଛନ୍ତି ସ୍ବତନ୍ତ୍ର ପରିଚୟ । ତାଙ୍କର ଦକ୍ଷତା ଦେଖି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କୁ ବିଭିନ୍ନ ସମୟରେ ଅନେକ ଗୁରୁ ଦାୟିତ୍ବ ଦେଇଛନ୍ତି । ଯାହାକୁ ନିଷ୍ଠାର ସହ ତୁଲାଇଛନ୍ତି ମାନସ ।
ସାମ୍ବାଦିକତାରୁ କ୍ୟାରିୟର ଆରମ୍ଭ କରିଥିବା ମାନସ ମଙ୍ଗରାଜ ନିଜର ଅନୁସନ୍ଧାନମୂଳକ ଷ୍ଟୋରୀ ପାଇଁ ଓଡ଼ିଶା ସାମ୍ବାଦିକ ଜଗତରେ ଖୁବ ଅଳ୍ପଦିନରେ ବେଶ ଖ୍ୟାତି ଅର୍ଜନ କରିଥିଲେ । ଧୀରେଧୀରେ ସେ ଗଣମାଧ୍ୟମରେ ଏକ ପରିଚିତ ଚେହେରା ବନିଯାଇଥିଲେ । ଗଣମାଧ୍ୟମର କାର୍ଯ୍ୟକୁ ନିଷ୍ଠାର ସହ ତୁଲାଇଥିବା ମାନସ ମଙ୍ଗରାଜ ବିଜେଡ଼ିରେ ସାମିଲ ହେବା ପରେ ମୁଖ୍ୟମନ୍ତ୍ରୀ ତାଙ୍କ ଦକ୍ଷତାକୁ ଚିହ୍ନିବା ସହ ତାଙ୍କୁ ରାଜ୍ୟ ସରକାରଙ୍କ ମୁଖ୍ୟ ଗଣମାଧ୍ୟମ ପରାମର୍ଶଦାତା କରିଥିଲେ । ଯେଉଁ ଦାୟିତ୍ବକୁ ନିଷ୍ଠାର ସହ ତୁଲାଇଥିଲେ । ଗଣମାଧ୍ୟମ ଓ ସରକାରଙ୍କ ମଧ୍ୟରେ ସମନ୍ବୟ ରକ୍ଷା କରି ସେ ରାଜ୍ୟ ବିକାଶ ଧାରର ଜଣେ ବିନ୍ଧାଣୀ ସାଜିଥିଲେ । ରାଜ୍ୟ ସରକାରଙ୍କ ମୁଖ୍ୟ ଗଣମାଧ୍ୟମ ପରାମର୍ଶଦାତା ଭାବେ ଦାୟିତ୍ବ ତୁଲାଇବା ସହ ସାମ୍ବାଦିକମାନଙ୍କ ଜୀବନ ଦାବିକୁ ସେ ପୁରଣ କରିଥିଲେ । ରାଜ୍ୟରେ ଥିବା ସମସ୍ତ ସାମ୍ବାଦିକ ସଂଘ ସହ ପରାମର୍ଶକରି ସାମ୍ବାଦିକମାନନଙ୍କର ବିଭିନ୍ନ ଦାବିପୂରଣ କରି ପୁରା ସାମ୍ବାଦିକ ଜଗତର ମନ କିଣିନେଇଥିଲେ । 
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଭଳି କଥା କମ, କାମ ଅଧିକରେ ବିଶ୍ବାସ ରଖୁଥିବା ମାନସ , ସବୁବେଳେ ଦଳ ତାଙ୍କୁ ଯେଉଁ ଦାୟିତ୍ବ ଦେଇଛି ତାହାକୁ ସେ ଗ୍ରହଣ କରି ନିଷ୍ପାର ସହ ତୁଲାଇଛନ୍ତି । କରୋନା ସମୟରେ ସାମ୍ବାଦିକମାନଙ୍କୁ ଆଗଧାଡ଼ିର ଯୋଦ୍ଧା ଘୋଷଣା କରିଥିଲେ ମୁଖ୍ୟମନ୍ତ୍ରୀ । କରୋନା ସମୟରେ କିପରି ସତର୍କତାର ସହ ସମ୍ବାଦ ସଂଗ୍ରହ କରିହେବ ସେନେଇ ସେ ବାରମ୍ବାର ଗଣମାଧ୍ୟମ ପ୍ରତିନିଧଙ୍କୁ ସଚେତନ କରିଥିଲେ । ଏପରି ଓଡ଼ିଶା ପ୍ରଥମ ରାଜ୍ୟଭାବେ କରୋନାରେ ମୃତ୍ୟୁ ହୋଇଥିବା, ସାମ୍ବାଦିକମାନଙ୍କୁ ୧୫ ଲକ୍ଷ ଟଙ୍କାର ଆର୍ଥିକ ସହାୟତା ଯୋଗଇଦେଇଥିଲେ । ଯେଉଁଥିରେ ପ୍ରମୁ୍ଖ ଭୂମିକା ଗ୍ରହଣ କରିଥିଲେ ମାନସ ମଙ୍ଗରାଜ । ତୁରନ୍ତ ମୃତ ସାମ୍ବାଦିକଙ୍କ ପରିବାର କିପରି ସପ୍ତାହକ ଭିତରେ ରାଜ୍ୟ ସରକାରଙ୍କ ଦ୍ବାରା ଘୋଷଣା କରାଯାଇଥିବା ସହାୟତାରାଶି ପାଇପାରିବେ ସେଥିଲାଗି ସେ ଦିନରାତି ଏକକରି କାମ କରିଥିଲେ ।
ସେହିପରି ସାମ୍ବାଦିକମାନଙ୍କ ସ୍ବାସ୍ଥ୍ୟ ବୀମା କାର୍ଡ଼ ସାମିଲ କରିବା କାଯ୍ୟକୁ ମଧ୍ୟ ତ୍ବରାନ୍ବିତ କରି କାଯ୍ୟକାରୀ କରିବାରେ ତାଙ୍କର ପ୍ରମୁଖ ଭୂମିକା ରହିଥିଲା । ସବୁବେଳେ ସାମ୍ବାଦିକମାନଙ୍କ ସୁଖ ଓ ଦୁଃଖର ସାଥି ହୋଇ ସେ ଭାଇଭାବେ ଛିଡ଼ା ହୋଇଥିଲେ । ଦିଲ୍ଲୀରେ ମଧ୍ୟ ସେ ସାମ୍ବାଦିକମାନଙ୍କ ପାଇଁ ଲଢେଇ କରିବେ ବୋଲି କହିଛନ୍ତି ।
ରାଜ୍ୟସଭା ସାଂସଦ ଭାବେ ଶପଥ ନେବା ପରେ ସଂଘୀୟ ବ୍ୟବସ୍ଥାରେ ଓଡ଼ିଶା କିପରି ତାର ହକ ସଠିକ ଭାବେ ପାଇପାରିବ ତାହାର ଗୁରୁ ଦାୟିତ୍ବ ମାନସ ମଙ୍ଗରାଜ ନିଭାଇେବ ଦିଲ୍ଲୀ ଦରବାରରେ । ମହାନଦୀ, ପୋଲାଭରମ , ଓଡ଼ିଶାକୁ ସ୍ବତନ୍ତ୍ର ଆର୍ଥିକ ସହାୟତା, କେନ୍ଦ୍ର ପାଖରେ ପଡ଼ିରହିଥିବା ବକେୟା ଅର୍ଥ , କେନ୍ଦ୍ରୀୟ ବଜେଟରୁ କିପରି ଅଧିକ ଅନୁଦାନ ମିଳିବ , ବିଭିନ୍ନ ପ୍ରୋଜେକ୍ଟ କାମ କିପରି ଯୁଦ୍ଧକାଳୀନ ଭିତ୍ତିରେ ସରିବ, ମହିଳା ମାନଙ୍କୁ ୩୩ ପ୍ରତିଶତ ସଂରକ୍ଷଣ ଦେବା, ଚାଷୀଙ୍କ ପାଇଁ ଏମଏସପି ବୃଦ୍ଦି କରିବା ଭଳି ବଡ଼ ବଡ଼ ପ୍ରସଙ୍ଗକୁ ସଂସଦରେ ଉଠାଇ କିପରି ଓଡ଼ିଶା ତାର ହକ ପାଇବ ସେ ଦିଗରେ ପ୍ରଥମ ଦିନରୁ ଅଭିଯାନ ଆରମ୍ଭ କରିବେ ବୋଲି ମାନସ ଶପଥ ନେବା ପରେ ସଂକଳ୍ପ ନେଇଛନ୍ତି । ଶେଷରେ ମୁଖ୍ୟମନ୍ତ୍ରୀ ତାଙ୍କ ଉପରେ ବିଶ୍ବାସ ଓ ଭରଷା କରି ରାଜ୍ୟସଭାକୁ ପଠାଇଥିବାରୁ ସେ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଦେବା ସହ ଓଡ଼ିଶାବାସୀଙ୍କ ପାଇଁ ଦିଲ୍ଲୀରେ ସ୍ବର ଶାଣିତ କରିବେ ବୋଲି କହିଛନ୍ତି ।
