ଭୁବନେଶ୍ୱର : ଗଣମାଧ୍ୟମ । ଯାହାର ଧର୍ମ ହେଉଛି ଗଣ ମାନଙ୍କର ସ୍ୱାର୍ଥକୁ ଗୁରୁତ୍ୱ ଦେବା। ସାଧାରଣ ମଣିଷର ଭାଷାକୁ ସରକାରଙ୍କ ପାଖରେ ପହଞ୍ଚାଇବା ଓ ଲୋକଙ୍କ ସମସ୍ୟା ଦୂର କରିବା ପାଇଁ ସରକାରଙ୍କ ଉପରେ ଚାପ ସୃଷ୍ଟି କରିବା । ହେଲେ ଏ ଧର୍ମକୁ ଏବେ କିଛି ଗଣମାଧ୍ୟମ ଭୁଲିଯାଇଛନ୍ତି। ଟିଭି ସୋରେ ନିଜକୁ ବଡ଼ ସାମ୍ବାଦିକ ଭାବେ ପରିଚିତ କରିବାରେ ଲାଗିଥିବା କିଛି ବ୍ୟକ୍ତି ଗଣମାଧ୍ୟମର ଏହି ସଂଜ୍ଞାକୁ ବଦଳାଇ ଦେଇଛନ୍ତି । ସେମାନଙ୍କ ମତରେ ଗଣମାଧ୍ୟମ ହେଉଛି ଗଣର ନୁହେଁ, ବରଂ କିଛି ନିଦ୍ଦିଷ୍ଟ ବ୍ୟକ୍ତିବିଶେଷ ଓ ରାଜନେତାଙ୍କ ପାଇଁ । ଯାହା ଏହି କିଛି ବର୍ଷ ହେବ ବିଭିନ୍ନ ଘଟଣାବଳୀକୁ ଦେଖିଲେ ସ୍ପଷ୍ଟ ଜଣାପଡ଼ୁଛି । ଏଜେଣ୍ଡା ଭିତ୍ତିକ ଖବର ପ୍ରସାରଣ କରିବା ଓ ଲୋକଙ୍କୁ ଭୂଲ ରାସ୍ତାରେ ନେବାକୁ ବି ଏମାନେ ପଛାଉ ନାହାନ୍ତି । ଲୋକଙ୍କ ସ୍ୱାର୍ଥ ନୁହେଁ, ରାଜନତୋଙ୍କ ସ୍ୱାର୍ଥକୁ ଯେତେବେଳେ ଆଂଚ ଆସୁଛି ଏହି ଗଣମାଧ୍ୟମର ବଡ଼ପଣ୍ଡାମାନେ ଆଗଭର ହେଉଛନ୍ତି ନିଜର ମତାମତ ଦେବା ପାଇଁ । ଯେମିତି ନାଲ କପଡ଼ା ବା ଗାମୁଛା ଦେଖିଲେ ଷଣ୍ଡ ଦୌଡ଼ିଆସେ। ସେମିତି ଜାଣନ୍ତୁ କି ନ ଜାଣାନ୍ତୁ କୌଣସି ବିବାଦ ଉପରେ ନିଜକୁ ବରିଷ୍ଠ ସାମ୍ବାଦିକ ବୋଲାଉଥିବା କିଛି ବ୍ୟକ୍ତି ଟିଭି ବୁମ ଦେଖି ଆଗଭର ହେଉଛନ୍ତି କିଛି ନା କିଛି ଗପିବା ପାଇଁ । ସବୁଠାରୁ ବଡ଼ ବିଡ଼ମ୍ବନାର ବିଷୟ ହେଉଛି ଯେଉଁ ଟିଭିର ଯେଉଁ ଏଜେଣ୍ଡା ସେହି ଅନୁସାରେ ଅନେକ ସମୟରେ ମତାମତ ଦିଅନ୍ତି ଏମାନେ । ଠିକ ରାଜନେତାଙ୍କ ପରି । ଯାହା ଏବେ ଆମ ଗଣତନ୍ତ୍ର ପାଇଁ ବିପଦ ସୃଷ୍ଟି କରିଛି । କାମଳ ସାମ୍ବାଦିକତାର ଏମାନେ ପ୍ରତୀପ କହିଲେ ଚଳେ । ତେବେ ଏମିତି କାହିକିଁ । କାହିକିଁ ଗଣମାଧ୍ୟମ ଆଜି ଏତେ ପକ୍ଷଭୁକ୍ତ । କାହିକିଁ ଲୋକଙ୍କ ସ୍ୱର ଅପେକ୍ଷା ରାଜନୀତିର ସ୍ୱରକୁ ଅଧି୍କ ଗୁରୁତ୍ୱ ଦେଉଛି ଗଣମାଧ୍ୟମ । କଣ ଏଥିପାଇଁ ଲୋକେ ଗଣମାଧ୍ୟମକୁ ଗଣତନ୍ତ୍ରର ଜାଗ୍ରତ ପହରୀ ଭାବିବେ ? ଏପରି ଅନେକ ପ୍ରଶ୍ନ ସାଧାରଣରେ ଉଙ୍କି ମାରୁଛି । ସତରେ ଗଣମାଧ୍ୟମକୁ ଏବେ ସରକାର ବା ରାଜନୈତିକ ଦଳ ଡ଼ରାଉଛନ୍ତି ନା ଗଣମାଧ୍ୟମ ନିଜର ଶକ୍ତି ବଳରେ ରାଜନେତା ଓ ସରକାରଙ୍କୁ ଡ଼ରାଉଛି । ତାହା ଏବେ ଲୋକେ ବୁଝିଲେଣୀ । ଏକ ଭାରରାଲ ଭିିଡ଼ିଓକୁ ନେଇ ଗଣମାଧ୍ୟମର ଭୂମିକାକୁ ନେଇ ଯେଉଁ ପ୍ରଶ୍ନ ଉଠିଛି ତାହା ଏବେ ସାରା ଓଡ଼ିଶାରେ ବିତର୍କର ବିଷୟ । ଗୋଟେ ଛୋଟ ଘଟଣାକୁ ଗଣମାଧ୍ୟ ଗୁଡ଼ିକ ଯେପରି ବିସ୍ପୋରଣ ରୂପ ଦେଲେଣୀ ଏଥିରେ ଗଣମାଧ୍ୟମ ଯେ ଲୋକଙ୍କୁ ଡ଼ରାଉଛି ତାହା କହିଲେ କିଛି ଭୂଲ ହେବ ନାହିଁ । ଯେମିତି ମହାମାରୀ ଚାଲିଯାଇଛି । ଆଉ ଲୋକଙ୍କ କିଛି ସମସ୍ୟା ନାହିଁ । ତେଣୁ ଗଣମାଧ୍ୟମ ଓ ଗଣମାଧ୍ୟମର ପ୍ରତିନିଧିମାନେ ଏବେ କେବଳ ସେହି ଘଟଣା ପଛରେ ପଡ଼ିଛନ୍ତି । କାହାର କଣ ଦାୟିତ୍ୱ ତାହା ସଭିଁଏ ଜାଣିଛନ୍ତି । ହେଲେ ରାଜନୀତିର ପଶାପାଲିରେ ପଡ଼ିଥିବା ଗଣମାଧ୍ୟମ କିନ୍ତୁ ଜାଣିନଥିବା ପରି ରୂପ ଦେଖାଉଛି ଏବେ ଲୋକଙ୍କୁ । କହିବା ଅଧିକାର କାଲି ଥିଲା ଆଜି ବି ଅଛି ଓ ଭବିଷ୍ୟତରେ ରହିବ । ହେଲେ କେଉଁ ସମୟରେ କେମିତି କହିବା ଦରକାର ତାହା ବୋଧେ ଗଣମାଧ୍ୟମ ଓ ଗଣମାଧ୍ୟମର ପ୍ରତିନିଧିମାନେ ଭୂଲି ଗଲେଣୀ । ରାଜନୀତିର ପଶାପାଲିରେ ପଡ଼ି ନିଜର ଧର୍ମକୁ ଭୂଲିଯାଇଛି ଗଣମାଧ୍ୟମ । ଡ଼ିଜିଟାଲ ଯୁଗରେ ପ୍ରତ୍ୟେକ ବ୍ୟକ୍ତି ହାତରେ ମୋବାଇଲ ଅଛି ଓ ସଭିଁଏ ଜଣେ ଜଣେ ସାମ୍ବାଦିକ । ହେଲେ କଥାକୁ ବି ଭୂଲି ଗଲେଣୀ କିଛି ପ୍ରତିଷ୍ଠିତ ଗଣମାଧ୍ୟମ ସଂସ୍ଥା । ସେମାନଙ୍କ ଏବେ ଗୋଟିଏ ଦିଗରେ କାମ କରୁଛନ୍ତି , ଯେ ଆମେ ଯାହା ଦେଖାଇବୁ ତାହା ଲୋକେ ଦେଖିବେ । ହେଲେ ପ୍ରତିଷ୍ଠିତ ଗଣମାଧ୍ୟମ ଜାଣିବା ଦରକାର ଗୋଟେ ଲୋକକୁ କିଛିଦିନ ପାଇଁ ବୋକା ବନେଇହେବ । ହେଲେ ସବୁ ଦିନ ପାଇଁ ନାହିଁ । ତେଣୁ ପ୍ରତ୍ୟେକ ଗଣମାଧ୍ୟମ ନିଜ ନିଜ ଧର୍ମକୁ ପାଳନ କରନ୍ତୁ ଓ ଲୋକଙ୍କ ସୁଖ ଦୁଃଖର ସାଥି ହୁଅନ୍ତୁ । ତେବେ ଯାଇ ଗୋଟେ ସୁସ୍ଥ ଗଣତନ୍ତ୍ର ବଂଚିପାରିବ । ହେଲେ ଏବେ ନିଜର ଆତ୍ମପ୍ରଚାର ଓ ରାଜନୀତି କ୍ୟାପେନରେ ଗଣମାଧ୍ୟମ ନମାତି ଗଣସ୍ୱାର୍ଥକୁ ଗୁରୁତ୍ୱ ଦିଅନ୍ତୁ ତେବେ ହିଁ ଲୋକଙ୍କ ଭରଷା ଜିତିପାରିବ ଗଣମାଧ୍ୟମ । କାରଣ ଏ ଜନତା , ସବ ଜାନେତା ହେଁ ।
