() ବାଲେଶ୍ୱର ଜିଲ୍ଲା ଔପଦା ବ୍ଲକର ଫତେପୁର ହାଇସ୍କୁଲରେ ରାଜ୍ୟ ସରକାରଙ୍କ ‘ମୋ ସ୍କୁଲ’ କାର୍ଯ୍ୟକ୍ରମ ଅନୁଷ୍ଠିତ ହୋଇଛି । ଏଥିରେ ଅବସରପ୍ରାପ୍ତ IAS ତଥା ବରିଷ୍ଠ ପ୍ରଶାସକ ଏବଂ ଓଡ଼ିଶା ଲୋକସେବା ଆୟୋଗର ସଦସ୍ୟ ନିରଞ୍ଜନ ସାହୁ ମୁଖ୍ୟ ଅତିଥି ଭାବେ ଯୋଗଦେଇଥିଲେ । ସରକାରଙ୍କର ଏହି କାର୍ଯ୍ୟକ୍ରମ ପିଲାଙ୍କ ସର୍ବାଙ୍ଗିନ ଉନ୍ନତିରେ ସହାୟକ ହେବା ସହ ପୁରାତନ ଛାତ୍ରଛାତ୍ରୀଙ୍କୁ ବିଦ୍ୟାଳୟ ସହ ଯୋଡ଼ିରଖିବାରେ ସଫଳ ହୋଇପାରିଛି ବୋଲି ସେ କହିଥିଲେ। ନିଜ ସ୍କୁଲ ସହିର ଭାବନାତ୍ମକଭାବେ ସଂଯୁକ୍ତ ହେବା ପାଇଁ ରାଜ୍ୟ ସରକାରଙ୍କର ଏହି କାର୍ଯ୍ୟକ୍ରମ ‘ମୋ ସ୍କୁଲ’ । ସା ବିଦ୍ୟା ଯା ବିମୁକ୍ତୟେର ବାର୍ତ୍ତା ଦେଇଥିଲେ ଶ୍ରୀ ସାହୁ । ଏଥିରେ ଜିଲ୍ଲା ଶିକ୍ଷାଧିକାରୀ ରଂଜନ କୁମାର ଗିରି ମୁଖ୍ୟବକ୍ତା ଭାବେ ଯୋଗଦେଇ ବଞ୍ଚିବାକୁ ହେଲେ ଜ୍ଞାନର ଆବଶ୍ୟକତା ସଂପର୍କରେ ମତ ରଖିଥିଲେ। ସେ କହିଥିଲେ ଯେ, ଏହା ଏଭଳି ଏକ କାର୍ଯ୍ୟକ୍ରମ ଯାହା ନାଗରିକ-ସରକାରୀ ଭାଗିଦାରିତା ମଧ୍ୟରେ ଛାତ୍ରଛାତ୍ରୀଙ୍କର ଉନ୍ନତିର ନକ୍ସା ଆଙ୍କୁଛି ।
ଫତେପୁର ହାଇସ୍କୁଲର ପ୍ରଧାନ ଶିକ୍ଷକ ସୁଦର୍ଶନ ପାଣିଗ୍ରାହୀଙ୍କ ପୌରହିତ୍ୟରେ ଆୟୋଜିତ ଏହି ମୋ ସ୍କୁଲ କାର୍ଯ୍ୟକ୍ରମରେ ଖଇରା ବ୍ଲକର ବିଇଓ ସୁଦର୍ଶନ ରାଉତ ଏବଂ ଔପଦା ବ୍ଲକର ବିଇଓ ବିଜୟ କୁମାର ଗିରି ସମ୍ମାନୀତ ଅତିଥି ଭାବେ ଯୋଗଦେଇଥିଲେ । ମୋ ସ୍କୁଲର ଜିଲ୍ଲା ସଂଯୋଜକ ସଂଦୀପ କୁମାର ଖଟୁଆ ଏହାର ଆଭିମୁଖ୍ୟ ସଂପର୍କରେ ଆଲୋକପାତ କରିଥିଲେ । ଫତେପୁର ପ୍ରଥମରୁ ହିଁ ସରକାରଙ୍କର ଏହି କାର୍ଯ୍ୟକ୍ରମରେ ସାମିଲ ହେବା ସହ ପୁରାତନ ଛାତ୍ରଛାତ୍ରୀଙ୍କର ଏକ ଡାଟାବେସ୍ ପ୍ରସ୍ତୁତ କରିଥିବା ପ୍ରଧାନଶିକ୍ଷକ ସୂଚନା ଦେଇଥିଲେ । ଏଥିରେ ପୁରାତନ ଶିକ୍ଷକ ନରହରି ମହାନ୍ତି, ଜୀତେନ୍ଦ୍ର କୁମାର ବେହେରା, ନିରଞ୍ଜନ ମହାନ୍ତି ପ୍ରମୁଖ ସାମିଲ ହୋଇଥିଲେ ।
ଫତେପୁରର ସରପଞ୍ଚ ଯଶୋଦା ନାଇକ କାର୍ଯ୍ୟକ୍ରମରେ ଯୋଗଦେଇ ସ୍କୁଲର ବିକାଶ ପାଇଁ ସ୍ଥାନୀୟ ପ୍ରଶାସନ ସହଯୋଗର ହାତ ସବୁବେଳେ ବଢ଼ାଇଥିବା କହିଥିବା ବେଳେ, ପୁରାତନ ଛାତ୍ର ଦେବେନ୍ଦ୍ରନାଥ ଆଚାର୍ଯ୍ୟ ଧନ୍ୟବାଦ ଦେଇଥିଲେ । ଏଥିରେ ସ୍କୁଲର ଚତୁର୍ଥ ଶ୍ରେଣୀ କର୍ମଚାରୀ ଭାଗିରଥି ପଣ୍ଡାଙ୍କୁ ବିଦାୟକାଳୀନ ସମ୍ବର୍ଧନା ଜ୍ଞାପନ କରାଯାଇଥିଲା । ଏଥିରେ ଡିଇଓ ଶ୍ରୀ ରଂଜନ କୁମାର ଗିରିଙ୍କୁ ସମ୍ବର୍ଧିତ କରାଯାଇଥିଲା । ଶେଷରେ ସ୍କୁଲ ଛାତ୍ରଛାତ୍ରୀଙ୍କ ପକ୍ଷରୁ ସାଂସ୍କୃତିକ କାର୍ଯ୍ୟକ୍ରମ ପରବେଷଣ କରାଯାଇଥିଲା । …
