* ନବନିର୍ବାଚିତ ସରଂପଚଙ୍କୁ ବବିଙ୍କ ମନ୍ତ୍ର, କହିଲେ ଗାଁର ବିକାଶ ଏମିତି କର ସହରରେ ଚର୍ଚ୍ଚା ହେବ
* ସବୁ ଭୋଟର ଆମର , ପ୍ରତିଟି ଗରିବ ଲୋକଙ୍କୁ ସହାୟତା କର
()ଜଗତସିଂହପୁର ଜିଲ୍ଲା ତିର୍ତ୍ତୋଲର ବହୁ ଚର୍ଚ୍ଚିତ ତୁଳଙ୍ଗ ପଞ୍ଚାୟତକୁ ବିଜୁ ଜନତା ଦଳର ସମର୍ଥିତ ପ୍ରାର୍ଥୀ ନିବେଦିତା ମଲ୍ଲିକ ଚଳିତ ନିର୍ବାଚନରେ ଦଖଲ କରିବା ପରେ ବିଜେଡିର ସାଂଗଠନିକ ସଂପାଦକ ପ୍ରଣବ ପ୍ରକାଶ ଦାସଙ୍କୁ ଆଜି ଭୁବନେଶ୍ବରରେ ସାକ୍ଷାତ କରିଛନ୍ତି । ପ୍ରଣବଙ୍କୁ ସୌଜନ୍ୟମୂଳକ ସାକ୍ଷାତ କରି ଆଶୀର୍ବାଦ ନେବା ସହ ସହଯୋଗ କାମନା କରିଛନ୍ତି ନିବେଦିତା । ଏହି ଅବସରରେ ପ୍ରଣବ କହିଛନ୍ତି ଯେ, ଲୋକଙ୍କର ଆସ୍ଥା ଓ ବିଶ୍ବାସ ବିଜୁ ଜନତା ଦଳ ଉପରେ ଦିନକୁ ଦିନ ବଢିବାରେ ଲାଗିଛି । ତୁଳଙ୍ଗ ପଞ୍ଚାୟତବାସୀ କଂଗ୍ରେସକୁ ପ୍ରତ୍ୟାଖ୍ୟାନ କରି ବିଜେଡି ଉପରେ ଭରଷା କରିଛନ୍ତି । ନିର୍ବାଚନ ଜିତିବା ପରେ ସବୁ ଭୋଟର ଆମର, ସେମାନଙ୍କର ବିକାଶର ଦାୟିତ୍ବ ଆମର । ଏଥିରେ କୌଣସି ବାଛ ବିଚାର ନକରି ସମସ୍ତଙ୍କ ପାଇଁ କାମ କରିବାକୁ ଆହ୍ବାନ ଓ ପରାମର୍ଶ ଦେଇଛନ୍ତି ସାଂଗଠନିକ ସଂପାଦକ । ଗାଁ ଗାଁରେ ପ୍ରତ୍ୟକ ଲୋକଙ୍କର ହିତ ପାଇଁ କାମ କରିବାକୁ ସଂକଳ୍ପ ନେବାକୁ ପରାମର୍ଶ ଦେଇଛନ୍ତି ପ୍ରଣବ ।
ସେ ଆହୁରି କହିଛନ୍ତି ଯେ, ମୁଖ୍ୟମନ୍ତ୍ରୀଙ୍କ ବାର୍ତ୍ତାକୁ ଲୋକଙ୍କ ପାଖରେ କେବଳ ପହଞ୍ଚାଇଲେ ହେବ ନାହିଁ ବରଂ ପ୍ରତ୍ୟକଟି ଶ୍ରେଣୀର ଶେଷ ଲୋକଙ୍କ ପାଖରେ ସରକାରୀ ଯୋଜନା କିଭଳି ପହଞ୍ଚାଯାଇପାରିବ ସେ ଦିଗରେ କାମ କରିବା ଉଚିତ । ଦୀର୍ଘ ୪୨ ବର୍ଷ ପରେ କଂଗ୍ରେସକୁ ପ୍ରତ୍ୟାଖ୍ୟାନ କରି ପୂର୍ବତନ ଉପମୁଖ୍ୟମନ୍ତ୍ରୀ ବସନ୍ତ ବିଶ୍ବାଳଙ୍କ ଗଡ଼ ଦଖଲ କରିଛନ୍ତି ନିବେଦିତା । ରଂଜୀବ ଓ ଚିରଞ୍ଜିବୀଙ୍କ ସତ ଚେଷ୍ଟା ସତ୍ବେ କଂଗ୍ରେସ ତୁଳଙ୍ଗରେ ହାରିବା ଲୋକଙ୍କର କଂଗ୍ରେସ ପ୍ରତି କ୍ରୋଧ ଓ ବିଜେଡି ପ୍ରତି ଭଲପାଇବାକୁ ଦର୍ଶାଇଛି । ତେଣୁ ତୁଳଙ୍ଗୁ ରାଜ୍ୟର ଏକ ପ୍ରମୁଖ ଏବଂ ସର୍ବାଙ୍ଗିନ ବିକଶିତ ପଞ୍ଚାୟତ ଭାବେ ଗଢ଼ିତୋଳିବାକୁ ନିବେଦିତା କାମ କରିବେ ବୋଲି କହିଛନ୍ତି ।
ତିର୍ତ୍ତୋଲ ବିଧାନସଭା ଉପ ନିର୍ବାଚନ ପୂର୍ବରୁ ନିବେଦିତାଙ୍କ ଶ୍ବଶୁର କୃଷ୍ଣ ମଲ୍ଲିକ କଂଗ୍ରେସ ଛାଡ଼ି ବିଜେଡିରେ ସାମିଲ ହୋଇଥିଲେ । ଆଉ ଏଥର ତିର୍ତ୍ତୋଲରେ କୃଷ୍ଣ କେବଳ ନିବେଦିତାଙ୍କୁ ଜିତାଇ ନାହାନ୍ତି ବରଂ ବିଜେଡି ପ୍ରତି ଲୋକଙ୍କର ଥିବା ଭଲପାଇବା ଓ ଆସ୍ଥାକୁ ଭୋଟରେ ରୂପାନ୍ତରିତ କରି ମୁଖ୍ୟମନ୍ତ୍ରୀଙ୍କ ନୀତି ଆଦର୍ଶକୁ ଗାଁ ଗାଁରେ ପହଞ୍ଚାଇବାର ସଂକଳ୍ପକୁ ସାକାର କରିବାକୁ କାମ କରୁଛନ୍ତି । …
