ଆଶା, ସମ୍ଭାବନା ଓ ଉତ୍କର୍ଷର ବର୍ଷ ହେଉ ୨୦୨୧ : ପ୍ରଣବ
* ରାଜ୍ୟବାସୀଙ୍କ ପାଇଁ ଏକୋଇଶି ହେଉ ସୁଖ ଓ ସମୃଦ୍ଧିର ବର୍ଷ
* ନୂଆ ଓଡ଼ିଶା ଗଠନର ପୁରୋଧା ସାଜନ୍ତୁ ଛାତ୍ର ଓ ଯୁବ ସମାଜ
* ଦୁର୍ନୀତି, ଅପରାଧମୁକ୍ତ ସୁଶାସନ ସହ ସଂଗଠନକୁ ମଜଭୁତ୍ ଦିଗରେ ଗୁରୁତ୍ୱ
ଭୁବନେଶ୍ୱର : ମାନବ ସଭ୍ୟତାର ବର୍ଷ ଗଣନାରେ ସାମିଲ ହୋଇଛି ଆଉ ଏକ ବର୍ଷ । ସ୍ୱପ୍ନ, ସମ୍ଭାବନା, ଆଶା, ଆକାଙ୍ଖ୍ୟା ଏବଂ କେତେ କଣ ଅସୁମାରୀ ଭାବନାକୁ ନେଇ ଉପନୀତ ହୋଇଛି ବର୍ଷ ୨୦୨୧ । ସକାଳର ସୂର୍ଯ୍ୟୋଦୟ ସହ ବିଶ୍ୱ କ୍ୟାଲେଣ୍ଡରରେ ଯୋଡ଼ିହୋଇ ଯାଇଛି ଏ ଦଶନ୍ଧିର ପ୍ରଥମ ବର୍ଷର ପ୍ରଥମ ଦିନ । ୨୦୨୦ ସହିତ ବିଦାୟ ନେଇଛି କେତେ ଦୁଃଖ, କଷ୍ଟ, ଯନ୍ତ୍ରଣା ଓ ଜାତନା । ରାଜ୍ୟବାସୀ ମଧ୍ୟ ପ୍ରଥମ ଥର ପାଇଁ କରୋନାର ଘାତ ପ୍ରତିଘାତ ଭିତରେ ଗତି କରିଛନ୍ତି । ସମସ୍ତେ ଅନୁଭବ କରିଛନ୍ତି ମହାମାରୀର କରାଳ କଷଣ । ଏହାରି ଭିତରେ ସାହସର ସହିତ ବହୁ କ୍ଷେତ୍ରରେ ରାଜ୍ୟବାସୀ ମୁକାବିଲା ମଧ୍ୟ କରିଛନ୍ତି । ରାଜ୍ୟ ସରକାରଙ୍କ ଦୂରଦର୍ଶୀ ପଦକ୍ଷେପ ଏବଂ ବହୁ ଆଗୁଆ ପଦକ୍ଷେପ କାରଣରୁ ଲକ୍ଷ ଲକ୍ଷ ଲୋକଙ୍କର ଜୀବନ ବଞ୍ଚାଯାଇ ପାରିଛି । ପ୍ରଥମ କରି ଯାହା ଯାହା ଘଟିଲା ସେ ସବୁର ସଫଳ ମୁକାବିଲା କଲେ ନବୀନ ପଟ୍ଟନାୟକ ସରକାର । ତେବେ ଏହାର ସାରଥି ଥିଲେ ସଂଗଠନ ସଂପାଦକ ପ୍ରଣବ ପ୍ରକାଶ ଦାସ(ବବି ) । ସବୁ ବିଭାଗ ମଧ୍ୟରେ ସମନ୍ବୟ ହେଉ କିମ୍ବା ସଂଗଠନର ଲୋକଙ୍କୁ ବ୍ୟବହାର କରି ପ୍ରବାସୀଙ୍କୁ ସହାୟତା କିମ୍ବା ପ୍ରତି ପଞ୍ଚାୟତରେ ସଫଳ କ୍ୱାରେଣ୍ଟାଇନର ପରିଚାଳନା ସବୁ କିଛି ସଠିକ୍ ଢଙ୍ଗରେ କରାଯାଇପାରିଲା । ତେବେ ୨୦୨୦ର ବିଦାୟ ସହିତ ଏ ଦୁଃଖ ଓ କଷ୍ଟ ମଧ୍ୟ ଅପସରି ଯାଇଛି ।
୨୦୨୧ ଆସିବା ସହ ଆମ ସାମ୍ନାକୁ ଆସିଛି ଅସୁମାରୀ ସ୍ବପ୍ନ ଏବଂ ସମ୍ଭାବନା । ସରକାରଙ୍କର ଦୁର୍ନୀତି ମୁକ୍ତ ପ୍ରଶାସନର ଆହ୍ୱାନ ସମସ୍ତଙ୍କୁ ଅନୁପ୍ରାଣିତ କରିବା ବୋଲି ଆଶା କରାଯାଉଛି । ଏ ବର୍ଷ ଲୋକଙ୍କ ମଧ୍ୟରେ ଭରିଦେଓ ଆନନ୍ଦ ଉଲ୍ଲାସ । ଲେକେ ଖୁସି ହୁଅନ୍ତୁ ଏବଂ ଭୁଲି ଯାଆନ୍ତୁ କରୋନାର ସେ କାଳ କଥାକୁ ।
ନୂଆ ଓଡ଼ିଶା ଗଠନର ପ୍ରକ୍ରିୟାରେ ସମସ୍ତେ ସାମିଲ ହେବାକୁ ଆହ୍ବାନ ଦେଇଛନ୍ତି ସଂଗଠନ ସଂପାଦକ । ବିଶେଷକରି ଆମ ରାଜ୍ୟର ଯୁବକ ଏବଂ ଛାତ୍ରଙ୍କର ଏଥିରେ ଏକ ବଡ଼ ଭୂମିକା ରହିଛି । କାରଣ ଆମ ପୂର୍ବ ପୁରୁଷଙ୍କର ମହାନ କାର୍ଯ୍ୟଶୈଳୀକୁ ମନେପକାଇବା ସହ ସେମାନଙ୍କ କଥାରେ ଉଦବୁଦ୍ଧ ହୋଇ ମୁଖ୍ୟମନ୍ତ୍ରୀଙ୍କ ନେତୃତ୍ୱରେ ଏ ରାଜ୍ୟର ପ୍ରଗତିରେ ସେମାନେ ସାମିଲ ହେବା ଦରକାର । କାରଣ ନୂଆ ଓଡ଼ିଶା ଆସନ୍ତାକାଲି ସାରା ଭାରତକୁ ଦିଗଦର୍ଶନ ଦେବାର ସକ୍ଷମତା ବହନ କରୁଛି । ଶ୍ରୀ ଦାସଙ୍କର ବହୁ ପ୍ରେରଣାଦାୟୀ ବାର୍ତ୍ତା ଆଜି ସମସ୍ତଙ୍କୁ ନୂଆ ଓଡ଼ିଶା ଗଠନରେ ସାମିଲ କରିବାକୁ ପ୍ରେରଣା ଦେଇଛି । ସଂଗଠନକୁ ମଜଭୁତ କରିବା ସହ ଲୋକଙ୍କ ପାଖରେ ସେବା ପହଞ୍ଚାଇବାକୁ କେବେବି କୁଣ୍ଠାବୋଧ ନକରିବାକୁ ସେ କହିଛନ୍ତି । କାରଣ ମୁଖ୍ୟମନ୍ତ୍ରୀଙ୍କ ଉପରେ ପ୍ରତିଦିନ ଲୋକଙ୍କର ଆସ୍ଥା ଓ ଭରଷା ବଢ଼ି ବଢ଼ି ଚାଲିଛି । ନୂଆ ବର୍ଷରୁ ଏହାକୁ ଆହୁରି ଦୃଢତାର ସହ ନେଇ ସମସ୍ତେ ଜନସେବାରେ ମନୋନିବେଶ କରିବାକୁ ପ୍ରଣବ ଆହ୍ବାନ ଦେଇଛନ୍ତି । ତେବେ ଏ ବର୍ଷ ମଙ୍ଗଳମୟ ହେଉ ଓ ସୁଖ ସମୃଦ୍ଧିର ବର୍ଷ ହେଉ ବୋଲି ସେ ଆଶା କରିଛନ୍ତି ।…
