ଭୁବନେଶ୍ୱର : ଦିନକୁ ଦିନ ରାଜ୍ୟରେ କରୋନା ତାର କାୟା ମେଲାଇ ଚାଲିଛି।କମିବାର ନାଁ ଧରୁ ନାହିଁ। ଏଥିମଧ୍ୟରେ ଆସନ୍ତାକାଲି ଠାରୁ ଦେଶରେ ଅନଲକ୍ ୨.୦ ଆରମ୍ଭ ହେବାକୁ ଯାଉଛି। ଏଥିପାଇଁ ପାଇଁ ଆଜି ରାଜ୍ୟ ସରକାର ନୂତନ ଗାଇଡ଼ଲାଇନ୍ ଜାରି କରିଛନ୍ତି। ଏହି ନିୟମ ସବୁ ଆସନ୍ତାକାଲି ଠାରୁ ରାଜ୍ୟରେ ଲାଗୁହେବ । ଏ ନେଇ ଆଜି ରାଜ୍ୟ ସରକାରଙ୍କ ସ୍ୱତନ୍ତ୍ର ରିଲିଫ କମିଶନର (ଏସଆରସି)ଙ୍କ ପକ୍ଷରୁ ନୋଟିସ ଜାରି ହୋଇଛି। ଏହି ନିୟମ ଜୁଲାଇ ୩୧ ତାରିଖ ପର୍ଯ୍ୟନ୍ତ ବଳବତ୍ତର ରହିବ।
ତେବେ ଆସନ୍ତୁ ଜାଣିବା ଏହି ସମୟରେ କଣ କଣ ବନ୍ଦ ରହିବ-
୧ – ସିନେମା ହଲ, ଜିମଖାନା, ସୁଇମିଂ ପୁଲ, ଏଣ୍ଟରଟେନମେଣ୍ଟ କଂପ୍ଲେକ୍ସ, ଥିଏଟର, ଅଡ଼ିଟୋରିୟମ, ଆସେଂବ୍ଲି ହଲ ଏବଂ ଏହିପରି ସମସ୍ତ ସଭା ସମିତି ବୈଠକଖାନା ।
୨-ସମସ୍ତ ଧର୍ମାନୁଷ୍ଠାନ/ ସର୍ବସାଧାରଣଙ୍କ ପୂଜାସ୍ଥଳୀ
୩ – ଯାତ୍ରୀମାନଙ୍କ ଲାଗି ଅନ୍ତର୍ଜାତୀୟ ବିମାନ ଚଳାଚଳ, ଏମଏଚଏ ଦ୍ୱାରା ଅନୁମତିପ୍ରାପ୍ତ ବିମାନକୁ ଛାଡ଼ି
୩ – ସାମାଜିକ/ରାଜନୈତିକ/କ୍ରୀଡ଼ା, ମନୋରଞ୍ଜନ/ଶିକ୍ଷା ଅନୁଷ୍ଠାନ / ସାଂସ୍କୃତିକ ତଥା ଧର୍ମୀୟ ଉତ୍ସବ ଗୁଡ଼ିକ
୫ – ସ୍କୁଲ, କଲେଜ ଏବଂ ଅନ୍ୟ ଶିକ୍ଷାନୁଷ୍ଠାନ / ତାଲିମ କେନ୍ଦ୍ର/ କୋଚିଂ ସେଣ୍ଟର ଗୁଡ଼ିକରେ ପାଠପଢା ୩୧ ଜୁଲାଇ ପର୍ଯ୍ୟନ୍ତ ବନ୍ଦ ରହିବ । ମାତ୍ର ପରୀକ୍ଷା କିମ୍ବା ଖାତାଦେଖା ଲାଗି ଅନୁମତି ରହିଛି ।
