ଭୁବନେଶ୍ୱର : ସରକାର ଓ ଜନସାଧାରଣଙ୍କ ମଧ୍ୟରେ ଗଣମାଧ୍ୟମ ସମ୍ପର୍କର ସେତୁ ଭାବେ କାର୍ଯ୍ୟକରି ଆସୁଥିବା ବେଳେ ଜନମତ ଜାଗ୍ରତ କରିବାରେ ଏହାର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ବାଚସ୍ପତି ଶ୍ରୀମତୀ ପ୍ରମିଳା ମଲ୍ଲିକ ମତବ୍ୟକ୍ତ କରିଛନ୍ତି।
ଓଡ଼ିଶା ସାମ୍ବାଦିକ ୟୁନିଅନ (ଓୟୁଜେ) ର ୨୬ତମ ଦ୍ଵିବାର୍ଷିକ ସମ୍ମିଳନୀ ଓ ପ୍ରତିଷ୍ଠା ଦିବସ ସ୍ଥାନୀୟ ଜୟଦେବ ଭବନ ଠାରେ ଉଦଘାଟନ କରି ବାଚସ୍ପତି ଶ୍ରୀମତୀ ମଲ୍ଲିକ କହିଲେ ଯେ ଗଣତନ୍ତ୍ର ର ୪ଟି ଯାକ ସ୍ତମ୍ବ ପରସ୍ପର ନିର୍ଭରଶିଳ ହୋଇଥିବା ବେଳେ ସବୁଠାରୁ ଶକ୍ତିଶାଳୀ ଚତୁର୍ଥ ସ୍ତମ୍ବ ର ଭୂମିକା ନିଆରା ଓ ସ୍ଵତନ୍ତ୍ର । ଏହି ପରିପେକ୍ଷିରେ ସାମ୍ବାଦକମାନଙ୍କ ସାମୁହିକ ସ୍ୱାର୍ଥ ଦୃଷ୍ଟିରୁ ଓୟୁଜେ ର ପ୍ରମୁଖ ଭୂମିକା ରହିଛି ବୋଲି ମତବ୍ୟକ୍ତ କରିବା ସହ ସାମ୍ବାଦିକ ମାନଙ୍କ ଲାଗି ୟୁନିଅନ୍ ପକ୍ଷରୁ ଉଠାଯାଇଥିବା ପେନସନ ଓ ପ୍ରୋଟେସନ୍ ଦାବିର ଯଥାର୍ଥତା ରହିଛି ବୋଲି ଦର୍ଶାଇବା ସହ ଏ ଦିଗରେ ତାଙ୍କ କାର୍ଯ୍ୟ ପରିସର ମଧ୍ୟରେ ଯାହା ସମ୍ଭବ ତାହା କରାଯିବ ବୋଲି ପ୍ରତିଶ୍ରୁତି ଦେଇ ଥିଲେ । 
ସ୍ଵତନ୍ତ୍ର ଅଟିଥି ଭାବେ ଯୋଗଦେଇ ଗୃହ ରାଷ୍ଟ୍ର ମନ୍ତ୍ରୀ ତୃଷାକ୍ରାନ୍ତି ବେହେରା ଓୟୁଜେ ର ଦାବି ବାବଦରେ ସରକାର ସମ୍ପୂର୍ଣ୍ଣ ସଚେତନ ଅଛନ୍ତି ଓ ଏ ବାବଦରେ ଅନୁକୂଳ ନିଷ୍ପତି ନିଆଯିବ ବୋଲି ପ୍ରତିଶ୍ରୁତି ଦେଇଥିଲେ । ବିଶେଷ ଅତିଥି ଭାବେ ଯୋଗଦେଇ ଏନୟୁଜେ (ଆଇ) ର ସର୍ବଭାରତୀୟ ସଭାପତି ରାସ ବିହାରୀ ସାମ୍ବାଦିକ ମାନଙ୍କୁ ମିଳୁଥିବା ସୁବିଧା ସୁଯୋଗକୁ ବିଭିନ୍ନ ରାଜ୍ୟରେ ପ୍ରତ୍ୟାହାର କରି ନିଆଯାଉଥିବାରୁ ଉଦବେଗ ପ୍ରକାଶ କରିଥିଲେ । ଉତ୍ସବରେ ଅଧ୍ୟକ୍ଷତା କରି ଓୟୁଜେ ସଭାପତି ପ୍ରସନ୍ନ ମହାନ୍ତି ପେନସନ ଓ ପ୍ରୋଟେସନ୍ ଦାବିକୁ ୟୁନିଅନ୍ ଜୋରଦାର କରିବ ବୋଲି ଉଲ୍ଲେଖ କରିଥଲେ । ଅନ୍ୟତମ ଅତିଥି ବିଧାୟକ ସୁରେଶ ଚନ୍ଦ୍ର ରାଉତ ରାୟ, ବିଧାୟକ ଅନନ୍ତ କୁମାର ଜେନା ସାମ୍ବାଦିକ ମାନଙ୍କ କଲ୍ୟାଣ ପାଇଁ ଓୟୁଜେ ନିରବଚ୍ଛିନ୍ନ ଭାବେ କାର୍ଯ୍ୟ କରି ଆସୁଛି ଓ ୟୁନିଅନ ଉଠାଇଥିବା ଦାବି ଯଥାର୍ଥ ବୋଲି ମତବ୍ୟକ୍ତ କରିଥିଲେ ।
ପ୍ରାରମ୍ଭରେ ବରିଷ୍ଟ ସାମ୍ବାଦିକ ଅକ୍ଷୟ ସାହୁ ସ୍ଵାଗତ ଭାଷଣ ଓ ସାଧାରଣ ସଂପାଦକ ଅଶୋକ ନନ୍ଦ ଧନ୍ୟବାଦ ଦେଇ ଥିଲେ । ଏହି ଅବସରରେ ୟୁନିଅନ ପକ୍ଷରୁ ଦୁଇ ଜଣ ପ୍ରତିଷ୍ଟାତା ସଦସ୍ୟ ଶେଷ ଦେବ ମିଶ୍ର ଓ ହଳଧର ଧୀର ଙ୍କ ସମେତ ଚୌଧୁରୀ ଅମିତାବ ଦାସ , ଥବିର ସାମଲ , ସ୍ୱାତୀ ଜେନା , ଶୁଭଦର୍ଶିନୀ ମିଶ୍ର , ଜଗଦୀଶ ଦାସ , ଲକ୍ଷ୍ମୀଧର ମହାପାତ୍ର , ନବୀନ ଚନ୍ଦ୍ର ସାହୁ , ସରୋଜ ମଲ୍କିକ ଙ୍କୁ ଓୟୁଜେ ମିଡ଼ିଆ ଆୱାର୍ଡ 2023 ପ୍ରଦାନ କରାଯାଇଥିଲା ।
