ଭୁବନେଶ୍ବର : ଓଡ଼ିଶା ସାମ୍ବାଦିକ ଭବନ ପରିସରରେ ଓୟୁଜେର ନବ ଗଠିତ ଏକଜିକ୍ୟୁଟିଭ୍ ବଡି ମେମ୍ବରଙ୍କ ପ୍ରଥମ ବୈଠକ ଅନୁଷ୍ଠିତ ହୋଇଯାଇଛି । ଓୟୁଜେ ସଭାପତି ପ୍ରସନ୍ନ ମହାନ୍ତିଙ୍କ ଅଧ୍ୟକ୍ଷତାରେ ଆୟୋଜିତ ବୈଠକରେ ନବଗଠିତ ଏକଜିକ୍ୟୁଟିଭି ବଡିର ସମସ୍ତ ସଦସ୍ୟ ଯୋଗ ଦାନ କରିଥିଲେ । ଏହି ଅବସରରେ ଓୟୁଜେ ପକ୍ଷରୁ ଆଗାମୀ ରଣନୀତି ପ୍ରସ୍ତୁତ କରାଯାଇଛି । ଆଗାମୀ ୨ ବର୍ଷ ପାଇଁ ରୋଡ୍ ମ୍ୟାପ୍ ତିଆରି କରିବା ସହ ସାମ୍ବାଦିକଙ୍କ ହକ୍ ପାଇଁ ସବୁବେଳେ ଓୟୁଜେ ସ୍ବର ଉତ୍ତୋଳନ କରି ସରକାରଙ୍କ ଦୃଷ୍ଟି ଆକର୍ଷଣ କରିବା ଜାରି ରଖିବ ବୋଲି ମତ ରଖିଛନ୍ତି ଓୟୁଜେ ସଭାପତି । ହିମାଚଳ ପ୍ରଦେଶ, ମଧ୍ୟପ୍ରଦେଶ ଢାଞ୍ଚାରେ ଓଡିଶାରେ ସାମ୍ବାଦିକ ସୁରକ୍ଷା ତଥା ସାମ୍ବାଦିକଙ୍କୁ ପେନସନ୍ ବ୍ୟବସ୍ଥା ନେଇ ରାଜ୍ୟ ସରକାରଙ୍କ ଦୃଷ୍ଟି ଆକର୍ଷଣ କରିବାକୁ ପୁଣି ଥରେ ନିଷ୍ପତ୍ତି ଗ୍ରହଣ ହୋଇଛି । ଏହି ଅବସରରେ କିଛି ନୂଆ, ପୁରୁଣା ସଦସ୍ୟଙ୍କୁ ନେଇ ବିଭିନ୍ନ କମିଟି ଗଠନ କରାଯାଇଛି । ବରିଷ୍ଠ ସାମ୍ବାଦିକ ତଥା ଓଡିଶା ସାମ୍ବାଦିକ ୟୁନିଅନର ପୂର୍ବତନ ସାଧାରଣ ସମ୍ପାଦକ ଅଶୋକ ନନ୍ଦ ଓୟୁଜେ ଟ୍ରିବୁନାଲର ଅଧ୍ୟକ୍ଷ ଭାବେ ମନୋନୀତ ହୋଇଛନ୍ତି । ଓୟୁଜେ ଭବନରେ ଶୁକ୍ରବାର ଦିନ ଅନୁଷ୍ଠିତ ନବ ନିର୍ବାଚିତ କର୍ମକର୍ତାମାନଙ୍କ ପ୍ରଥମ ବୈଠକ ରେ ସଂଗଠନ କୁ ଅଧିକ କ୍ରିୟାଶୀଳ କରିବା ଲାଗି ବରିଷ୍ଠ ସଦସ୍ୟମାନଙ୍କୁ ବିଭିନ୍ନ ଦାୟିତ୍ବ ନ୍ୟସ୍ତ କରାଯାଇଛି । କାର୍ଯ୍ୟାଳୟ ସମ୍ପାଦକ ଭାବେ ସୁଧାଂଶୁ ପରିଡାଙ୍କୁ ମନୋନୀତ କରାଯାଇଛି । ସେହିପରି କଲ୍ୟାଣ କମିଟିର ଅଧ୍ୟକ୍ଷ ଭାବେ ବରିଷ୍ଠ ସଦସ୍ୟ ଆଚାର୍ଯ୍ୟ ବିଶ୍ୱରଂଜନ, ଓୟୁଜେ ଲିଗାଲ ସେଲ୍ର ଅଧ୍ୟକ୍ଷ ସମରଜିତ ମହାନ୍ତି, ସନ୍ତୋଷ କୁମାର ସିଂହ ଦେଓଙ୍କୁ ମୁଖ୍ୟ ମିଡ଼ିଆ ସଂଯୋଜକ ଭାବେ ମନୋନୀତ କରାଯାଇଛି । ଭୁବନେଶ୍ବରର ଯୁବ ସାମ୍ବାଦିକ ଅଶ୍ବିନୀ କୁମାର ସାହୁ ମଧ୍ୟ ରାଜ୍ୟ କାର୍ଯ୍ୟକାରିଣୀକୁ ମନୋନୀତ ହୋଇଛନ୍ତି । କୋରାପୁଟର ବରିଷ୍ଠ ସାମ୍ବାଦିକ ନବୀନ ଚନ୍ଦ୍ର ସାହୁ ଓ ଯାଜପୁରର ଅରୁଣ ରାଉତରାୟ ରାଜ୍ୟ କାର୍ଯ୍ୟକାରିଣୀକୁ ସ୍ୱତନ୍ତ୍ର ନିମନ୍ତ୍ରିତ ସଦସ୍ୟ ଭାବେ ମନୋନୀତ ହୋଇଛନ୍ତି । ଓୟୁଜେର ବରିଷ୍ଠ ଉପସଭାପତି ତଥା ରାଜ୍ୟ ବାର୍ କାଉନସିଲ୍ ଉପାଧ୍ୟକ୍ଷ ଆଡଭୋକେଟ୍ ରାଜୀବ ମହାନ୍ତିଙ୍କୁ ଏହି ଅବସରରେ ସମ୍ବର୍ଦ୍ଧିତ କରାଯାଇଥିଲା । ନିକଟରେ ଆଡଭୋକେଟ୍ ରାଜୀବ ମହାନ୍ତି, ଷ୍ଟେଟ୍ ବାର୍ କାଉନସିଲର ଭାଇସ୍ ଚେୟାରମ୍ୟାନ୍ ଭାବେ ନିର୍ବାଚିତ ହୋଇଛନ୍ତି ।
