ଭୁବନେଶ୍ୱର : ଘୋଷଣା ହୋଇନି ତାରିଖ । ହେଲେ ଉପନିର୍ବାଚନ ପାଇଁ ପାଗ ଭିଡ଼ିଲେଣି ରାଜ୍ୟର ତିନି ପ୍ରମୁଖ ଦଳ । ପିପିଲି ବିଧାୟକ ପ୍ରଦୀପ ମହାରଥୀଙ୍କ ମୃତ୍ୟୁ ପରେ ଏହି ଆସନରେ ଉପନିର୍ବାଚନ ହେବାକୁ ଯାଉଛି । ଏଥିପାଇଁ ଏବେ ପିପିଲି ଠାରୁ ଭୁବନେଶ୍ୱର ଯାଏଁ ସବୁଠି ନେତାଙ୍କ ଭିତରେ ଟିକେଟ ପାଇବା ପାଇଁ ପ୍ରତିଯୋଗିତା ଆରମ୍ଭ ହୋଇଯାଇଛି । ବିଜେଡି ଟିକେଟ ପାଇବାକୁ ମହାରଥୀଙ୍କ ଧର୍ମପତ୍ନୀ ଆଶାବାଦୀ ଥିବା ଜଣାପଡିଛି । ଅନ୍ୟପଟେ କଂଗ୍ରେସରୁ ମଧ୍ୟ ୫ ଜଣ ପ୍ରାର୍ଥୀ ଦାବିଦାର ଥିବା କଂଗ୍ରେସ ବିଧାୟକ ସୁର ରାଉତ ରାୟ କହିଛନ୍ତି । ସେହିପରି ବିଜେପି ମଧ୍ୟ ପିପିଲି ପାଇଁ ପ୍ରସ୍ତୁତ ଥିବା କହିଛି।
ପିପିଲି ବିଧାୟକ ପ୍ରଦୀପ ମହାରଥୀଙ୍କ ଅକାଳ ଦେହାନ୍ତ ପରେ ପିପିଲିରେ ଉପନିର୍ବାଚନ ହେବ । କିନ୍ତ, ଏ ଯାଏଁ ନିର୍ବାଚନ ତାରିଖ ଘୋଷଣା ହୋଇନାହିଁ । ହେଲେ ପ୍ରାର୍ଥୀ ହେବା ପାଇଁ ଆଶାୟୀ କିନ୍ତୁ, ମନ ବଳେଇଲେଣି । ରାଜ୍ୟର ୩ ପ୍ରମୁଖ ରାଜନୈତିକ ଦଳ ଆରମ୍ଭ କରିଦେଲେଣି ପ୍ରାର୍ଥୀ ଖୋଜା । ବିଜେଡି ପିପିଲିରେ କାହାକୁ ପ୍ରାର୍ଥୀ କରିବ ସେ ନେଇ ଦଳ ପକ୍ଷରୁ କୌଣସି ସୂଚନା ମିଳିନଥିଲେ ମଧ୍ୟ ସ୍ବର୍ଗତ ପ୍ରଦୀପ ମହାରଥୀଙ୍କ ପତ୍ନ ପ୍ରତିଭା ମହାରଥୀ ପ୍ରାର୍ଥୀ ହେଲେ ଖୁସି ହେବେ ବୋଲି କହିଛନ୍ତି । ହେଲେ ବିଜେଡି ସୁପ୍ରିମୋ ସବୁ ନିଷ୍ପତ୍ତି ନେବେ ବୋଲି ସେ ସିଧାସିଧା ଗଣମାଧ୍ୟମକୁ କହିଛନ୍ତି ।ସେହିପରି ବିରୋଧୀ କଂଗ୍ରେସ ଓ ବିଜେପି ପିପିଲି ଉପନିର୍ବାଚନ ପାଇଁ କସରତ ଆରମ୍ଭ କରିଦେଇଛନ୍ତି । ପିପିଲି ପାଇଁ କଂଗ୍ରେସର ୫ଜଣ ପ୍ରାର୍ଥୀ ଆଶାୟୀ ଥିବା ବେଳେ ଦଳ କାହାକୁ ପ୍ରାର୍ଥୀ କରିବ ତାର ବିଚାର ହାଇକମାଣ୍ଡ କରିବ ବୋଲି ବିଧାୟକ ସୁରେଶ ରାଉତରାୟ କହିଛନ୍ତି । ସେପଟେ ବିଜେପି ବି ଉପନିର୍ବାଚନ ପାଇଁ ଆଗୁଆ ପ୍ରସ୍ତୁତି କରିଛି । ଉପନିର୍ବାଚନରେ ଦଳ କାାହାକୁ ପ୍ରାର୍ଥୀ କରିବ ତାହା ଆଲୋଚନା ହୋଇଥିବା ବେଳେ. ନିର୍ବାଚନ ପାଇଁ ଦଳ ସଂପୂର୍ଣ୍ଣ ତୟାର ବୋଲି କହିଛି।
