ଭୁବନେଶ୍ୱର : ରାଜସ୍ଥାନ ରାଜନୀତି ଏବେ ସରଗରମ । କ୍ଷମତାରେ ଥିବା କଂଗ୍ରେସ ସରକାରରେ ଏବେ ସୃଷ୍ଟି ହୋଇଛି ଫାଟ । ୨୦୧୮ ବିଧାନସଭା ନିର୍ବାଚନରେ କଂଗ୍ରେସ ଦଳର ଫାଇଟର ପାଇଲଟ୍ ବୋଲାଉଥିବା ସଚିନ ପାଇଲଟ୍ ଏବେ ଶତ୍ରୁ ଶିବିର ବିଜେପି ମୁହାଁ ହୋଇଥିବା ଚର୍ଚ୍ଚା ଜୋର ଧରିଛି । ୨୦୧୮ରେ ଦଳର ମଙ୍ଗ ଧରିଥିବା ପାଇଲଟ୍ ମାତ୍ର ୨ବର୍ଷ ମଧ୍ୟରେ ଏବେ କାହିଁକି ଦଳରୁ ବାହାରି ଯିବାକୁ ଚାହୁଁଛନ୍ତି । ଦଳରେ ତାଙ୍କ ଯୋଗଦାନ କଂଗ୍ରେସକୁ ସେତେବେଳେ ବିଜୟ ଆଣିଦେଇଥିବା ବୋଲି ରାହୁଲ ମଧ୍ୟ ପାଇଲଟଙ୍କୁ ଖୁବ ପ୍ରଶଂସା କରିଥିଲେ । ମଧ୍ୟପ୍ରଦେଶ କଂଗ୍ରେସ ଶିବିରରେ ବିଦ୍ରୋହ ହେବାର ୪ମାସ ପରେ ରାଜସ୍ଥାନ ଉପମୁଖ୍ୟମନ୍ତ୍ରୀ ସଚିନ ପାଇଲଟ୍ଙ୍କ ଚିନ୍ତାଧାରାରେ ବହୁ ପରିବର୍ତନ ଆସିଥିବା ଚର୍ଚ୍ଚା ହୋଇଛି ।
ସଚିନ ପାଇଲଟଙ୍କ ବିଦ୍ରୋହ ଘୋଷଣା କଂଗ୍ରେସ ଓ ସରକାରଙ୍କ ପାଇଁ ଏବେ ଅଡ଼ୁଆ ପରିସ୍ଥିତି ସୃଷ୍ଟି କରିଛି। ସଚିନ ଦିଲ୍ଲୀରେ ଡେରା ପକାଇ ବସିଥିବା ବେଳେ ରାଜସ୍ଥାନରେ ଘନଘନ ବୈଠକ ହେବାରେ ଲାଗିଛି। ମୁଖ୍ୟମନ୍ତ୍ରୀ ହେବାର ଲୋଭ ରଖିଥିବା ସଚିନ ପାଇଲଟଙ୍କ ଏଭଳି ବିଦ୍ରୋହ ଘୋଷଣା ନୂଆ କଥା ନୁହେଁ। ମାର୍ଚ୍ଚ ମାସରୁ ଇତି ମଧ୍ୟରେ ସଚିନ ପାଇଲଟ ୩ଥର ଏମିତି ବିଦ୍ରୋହ ଘୋଷଣା କରି ରାଜସ୍ଥାନ ସରକାରଙ୍କୁ ଅଡ଼ୁଆରେ ପକାଇଛନ୍ତି। ମୁଖ୍ୟମନ୍ତ୍ରୀ ହେବାକୁ ସଚିନ ଏତେମାତ୍ରାରେ ଆଶା ରଖିଛନ୍ତି ଯେ ବିଜେପି ସହ ଯୋଗାଯୋଗରେ ରହିଥିବା ମଧ୍ୟ ଚର୍ଚ୍ଚା ହୋଇଛି ।
ଆଉ ଏବେ ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କ ଅଧୀନସ୍ଥ ପୁଲିସ ବିଭାଗରୁ ଅପମାନଜନକ ନୋଟିସ ପାଇବା ପରେ ବିଦ୍ରୋହ ଘୋଷଣା କରିଥିବା ସଚିନ ପାଇଲଟଙ୍କୁ କଡ଼ା ଚ୍ୟାଲେଞ୍ଜ ଦେଇଛନ୍ତି ନିଜେ ମୁଖ୍ୟମନ୍ତ୍ରୀ। ବିଧାୟକ ଦଳ ବୈଠକ ପରେ ତାଙ୍କ ସହିତ ୧୦୨ ଜଣ ସଦସ୍ୟଙ୍କ ସମର୍ଥନ ରହିଥିବା ସେ ଦାବି କରିଛନ୍ତି। ତେବେ ଗେହଲଟଙ୍କ ଦାବିକୁ ସଚିନ ପାଇଲଟ ମାନିବାକୁ ପ୍ରସ୍ତୁତ ନାହାନ୍ତି। ସେ କହିଛନ୍ତି ଯେ ଗେହଲଟ କରିଥିବା ଦାବି ଭୁଲ। ମୋ ସହ ୨୫ରୁ ଅଧିକ ବିଧାୟକ ରହିଛନ୍ତି। ସଚିନଙ୍କ ଏହି ରଣହୁଙ୍କାର ପରେ ଗେହଲଟ ପାଲଟା ଜବାବ ରଖିଛନ୍ତି। ସେ କହିଛନ୍ତି, ଯେଉଁମାନେ ନିଜ ପାଖରେ ସରକାର ଗଠନ କରିବାକୁ କ୍ଷମତା ରଖିଛନ୍ତି ବୋଲି ଦାବି କରୁଛନ୍ତି, ସେମାନେ ସମସ୍ତଙ୍କ ସାମ୍ନାରେ ଏହାର ପ୍ରମାଣ ଦେବା ଦରକାର।
