ପୁରୀ :ଜଗତର ନାଥ ଜଗନ୍ନାଥ। ବିଶ୍ୱର ଦେବତା। ବର୍ଷକୁ ଥରେ ଭକ୍ତଙ୍କୁ ଦର୍ଶନ ଦେବାକୁ ଓଲ୍ହାଇ ଆସନ୍ତି ବଡ଼ଦାଣ୍ଡକୁ। ଜୁନ ୨୩ତାରିଖ ଏହି ପବିତ୍ର ଦିନ। ଘୋଷ ଯାତ୍ରା। ଏଥିପାଇଁ ଚଳଚଞ୍ଚଳ ଶ୍ରୀକ୍ଷେତ୍ର। ରଥ ଖଳାରେ କାରିଗର ବି ବ୍ୟସ୍ତ। ରଥ ନିର୍ମାଣରେ । କାରଣ ରଥରେ ହିଁ ବିଜେ ହେବେ ଶ୍ରୀଜୀଉ। ଆଉ ଦର୍ଶନ ଦେବେ କୋଟି କୋଟି ଭକ୍ତଙ୍କୁ। ସେଦିନ ଗୁହାରି ଶୁଣିବେ ମଣିମା। ଏହି ପବିତ୍ର ଦିନଟି ଏବେ ପାଖେଇ ଆସୁଛି। ଏପଟେ ଯାତ୍ରା ଯେତେ ପାଖୁଛି ସେପଟେ ପ୍ରଭୁଙ୍କ ଆଶୀଷରୁ ରଥ କାର୍ଯ୍ୟ ମଧ୍ୟ ସେତିକି ସରି ସରି ଆସୁଛି। ଯାହାକି ଏବେ ଶେଷ ପର୍ଯ୍ୟାୟରେ। ଶନିବାର ସନ୍ଧ୍ୟା ଶେଷ ସୁଦ୍ଧା ତାଳଧ୍ୱଜ ରଥର ୧୧ଟି ଚକ ଶେଷ ହୋଇ ଅନ୍ୟ ଦୁଇଟି ଚକ ମଧ୍ୟରୁ ଗୋଟିକରେ ପଇ ପିନ୍ଧାକାର୍ଯ୍ୟ ଚାଲିଥିବା ବେଳେ ଅନ୍ୟ ଚକଟିରେ ତୁମ୍ବରେ ଅର ସଂଯୋଗ ସରିଛି । ଦେବଦଳନ ରଥର ୧୦ଟି ଚକ ସମ୍ପୂର୍ଣ୍ଣ ହୋଇ ଅନ୍ୟ ଏକ ଚକରେ ପଇ ପିନ୍ଧାକାର୍ଯ୍ୟ ଚାଲିଛି । ନନ୍ଦିଘୋଷ ରଥର ୧୧ଟି ଚକ ସମ୍ପୂର୍ଣ୍ଣ ହୋଇ ଦୁଇଟି ତମ୍ବୁରେ ଅର ସଂଯୋଗ କାର୍ଯ୍ୟ ଚାଲିଥିବା ବେଳେ ଅନ୍ୟ ଦୁଇଟି ପିନ୍ଧରେ ପଇ ସଂଯୋଗ ସରି ବିଲେଇ ବାଡିଆ କାର୍ଯ୍ୟ ଚାଲିଛି। ଏବେ ସାରା ଦେଶରେ କରୋନା ଆତଙ୍କ । ସେଥିପାଇଁ ରଥ ନିର୍ମାଣରେ ୧୨ ଦିନ ବିଳମ୍ବ ହୋଇଥିଲା। ହେଲେ କାରିଗର ଓ ସେବାୟତଙ୍କ ଅକ୍ଳାନ୍ତ ପରିଶ୍ରମ ଫଳରେ କ୍ଷିପ୍ର ଗତିରେ ଆଗେଇ ଚାଲିଛି ରଥ କାମ।ଶ୍ରୀମନ୍ଦିର ପ୍ରଶାସନ ତରଫରୁ ମଧ୍ୟ କାରିଗରଙ୍କୁ ସବୁ ପ୍ରକାର ସୁବିଧା ଯୋଗାଇ ଦିଆଯାଇଛି। ବଡ଼ ଦିଅଁଙ୍କ ଇଚ୍ଛାରେ ସବୁ କିଛି ଚାଲେ। ସେ ଚାହିଁଲେ ମଧ୍ୟ ଏଥର ଭକ୍ତ ଭଗବାନଙ୍କ ନିଶ୍ଚୟ ଭେଟ ହେବ। କରୋନା ମହାମାରୀ ମଧ୍ୟ ପ୍ରଚେରୀ ହୋଇ ଛିଡା ହୋଇ ପାରିବନି । ସେଥିପାଇଁ ତ ତାଙ୍କୁ ଭାବର ଠାକୁର କୁହାଯାଏ। ତାଙ୍କୁ ଭାବରେ ଡାକିଲେ ସେ ନିଶ୍ଚୟ ଶୁଣନ୍ତି। ସେ ଥରେ ବଡ଼ଦାଣ୍ଡରେ ବିଜେ ହୋଇଗଲେ କରୋନା ମହାମାରୀ ମଧ୍ୟ ଦୁରେଇ ଯିବ। ଆଉ ଭକ୍ତ ଭଗବାନଙ୍କ ମିଳନ ହେବ। କାରଣ ଆଜିକି ୨ ମାସ ହେଲାଣି ଭକ୍ତ ଠାରୁ ଭଗବାନ ଦୂରରେ। ଭକ୍ତ ନିଜ ଠାକୁର ଘରେ ବସି ପ୍ରଭୁଙ୍କୁ ନୀତି ଝୁରୁଛି।ତାର ଟିକେ ଝଲକ ପାଇବା ପାଇଁ। ସେଥିପାଇଁ ସମସ୍ତେ ଘୋଷ ଯାତ୍ରାକୁ ଚାହିଁ ବସିଛନ୍ତି। ପ୍ରଶାସନ ମଧ୍ୟ ସେଥିପାଇଁ ବେଶ ତତ୍ପରତା ଦେଖାଉଛି।କେମିତି ଭକ୍ତ ଭଗବାନଙ୍କ ମିଳନ ହେବ। ସେ ନେଇ ସବୁ ସ୍ତରରେ ଚେଷ୍ଟା ଜାରି ରହିଛି।
